Wrth gloi ei araith dywedodd Mr Sunak nad mater o "economeg" yw hyn ond "gwerthoedd".

"Rwy'n credu yng nghryfder a gwydnwch pobl Prydain," meddai.

Ychwanegodd: "Wnawn ni ddim cael ein diffinio gan yr argyfwng hwn ond gan ein hymateb iddo."

Mae Canghellor y DU, Rishi Sunak wedi gwneud ambell i gyhoeddiad arall hefyd gan gynnwys bod y llywodraeth am roi £2,000 i gwmnïau i'w hannog i gyflogi prentisiaid.

Bydd y cwmnïau hefyd yn cael £1,500 i gyflogi rhai dros 25 oed, meddai.

Llywodraeth Cymru

Wrth ymateb i'r adroddiad heddiw ar gartrefi gofal, mae Dr Goodall yn dweud y bydd Llywodraeth Cymru'n "adolygu" yr argymhellion ac ymateb i'r pryderon.

Dywedodd bod swyddogion iechyd "wir wedi ceisio" sicrhau bod pwyslais ar gartrefi gofal.

Ychwanegodd ei fod eisiau "sicrhau" bod cymorth i'r sector gofal mewn gwahanol ffyrdd, gan gynnwys cyllid, offer diogelwch, a staffio.

Llywodraeth Cymru

Yn ôl at Dr Andrew Goodall, wrth iddo ateb cwestiynau gan aelodau o'r wasg.

Mae prif weithredwr y gwasnaeth iechyd yng Nghymru'n dweud bod "wir angen i'r cyhoedd ystyried" gwisgo masgiau pan maen nhw mewn ardaloedd cyhoeddus cyfyngedig.

Er nad oes gorfodaeth i wisgo masg yng Nghymru, dywedodd Dr Goodall fod Sefydliad Iechyd y Byd yn cynghori gwneud.

Ychwanegodd fod yr WHO yn adolygu eu cyngor ar sut mae'r feirws yn lledaenu yn yr awr.

Yn sgil y pandemic mae’r sector lletygarwch wedi ei effeithio yn ddrwg meddai Rishi Sunak.

Dywedodd felly ei fod am dorri treth ar werth (TAW) ar gyfer bwyd, llety ac atyniadau.

“Bydd TAW yn cael ei leihau o ddydd Mercher nesaf tan Ionawr 12 o 20% i 5%,” meddai.

Ffynhonnell y llun, Tŷ'r Cyffredin

Cyhoeddiad arall y mae wedi gwneud yw cynllun i annog pobl ifanc i allu cael gwaith.

Bydd y cynllun yn “talu cyflogwyr i greu swyddi newydd i unrhyw un rhwng 16-14 oed sydd mewn perygl o fod yn ddi-waith am gyfnod hir,” meddai’r Canghellor.

Ychwanegodd y byddant yn swyddi “teidi” a’i fod yn annog cyflogwyr i gymryd rhan yn y cynllun.

Mae’r canghellor newydd gyhoeddi “bonws” i gyflogwyr sydd yn dod a gweithwyr oedd ar y cynllun saib o'r gwaith, neu ffyrlo, yn ôl i’r gwaith.

Os bydd y cyflogwr yn dod a rhywun yn ôl i’r gwaith a’u bod dal yn cael ei cyflogi ym mis Ionawr bydd y llywodraeth yn talu £1,000 o fonws i’r cwmni.

“Os ydych chi yn cefnogi eich gweithwyr fe wnawn ni eich cefnogi chi,” meddai.

Dywedodd y canghellor bod y mesurau cefnogaeth economaidd mae’r llywodraeth wedi cyflwyno ymhlith y rhai mwyaf yn y byd.

Ond er hyn mae’n cydnabod bod y DU yn wynebu heriau “dwfn” ac y bydd yna nifer “arwyddocaol” o swyddi yn diflannu.

Yn y cyfamser, mae'r Canghellor Rishi Sunak wrthi'n datgan cynlluniau Llywodraeth y DU ar gyfer yr economi yn sgil y feirws.

Dywedodd y bydd y llywodraeth yn gwneud “popeth allwn ni” er mwyn arbed swyddi.

“Fydd neb yn cael eu gadael heb obaith,” meddai.

“Pan fydd problemau yn codi fe wnawn ni eu hwynebu. Pan fydd yna angen am gefnogaeth fe wnawn ni ei ddarparu. Pan fydd heriau yn codi, fe wnawn ni eu datrys.”

Ffynhonnell y llun, Tŷ'r Cyffredin

Llywodraeth Cymru

Ychwanegodd Dr Goodall fod mwy o bobl yn cael eu cyfeirio at y gwasanaeth iechyd oherwydd amheuaeth o ganser.

Dywedodd fod y pandemig wedi lleihau capasiti ar gyfer triniaethau canser, ond bod y gwasanaeth yn ceisio cyflwyno "modelau newydd o ofal".

Roedd rhai triniaethau, gan gynnwys enosgopi, yn anodd oherwydd y risg o ymledu'r haint.

Ond dywedodd bod sgrinio ar gyfer canser serfigol, canser y fron a chanser y coluddyn wedi ailddechrau.

Ychwanegodd ei fod yn bwriadu cynnal cynhadledd ganser yn nes ymlaen yn yr wythnos i drafod eu cynlluniau.

Llywodraeth Cymru

Mae’r byrddau iechyd yn paratoi ar gyfer y gaeaf nawr meddai Dr Andrew Goodall.

Dywedodd y byddai eu cynlluniau yn cynnwys gwneud yn siŵr eu bod digon o gapasati pe byddai yna ail don o’r pandemig neu fod yna gynnydd yn yr achosion o’r Coronafeirws.

Llywodraeth Cymru

Mae Dr Goodall yn dweud eu bod yn cymryd "nifer o gamau" i gynyddu capasiti, gan gynnwys clinigau diagnostig cyflym, fel bod pobl sydd â phroblemau iechyd eraill onibai am Covid-19 hefyd yn gallu cael gofal yn saff.

Dywedodd bod ysbytai yn edrych ar drefniadau gwahanol ar gyfer gofal brys, "er enghraifft, wrth gyflwyno system ffonio'n gyntaf ar gyfer adrannau brys er mwyn lleihau ciwiau a goresgyn heriau ymbellhau cymdeithasol".

"Hoffwn bwysleisio bod gwasanaethau brys wastad ar gael i bobl sydd angen gofal a trhiniaeth achub bywyd," meddai.

Llywodraeth Cymru

Mae Dr Andrew Goodall yn dechrau drwy nodi bod pob awdurdod lleol yng Nghymru "yn adrodd llai o achosion positif" bellach, a hynny er bod "mwy a mwy o brofion bob dydd".

Mae 529 o gleifion Covid-19 yn ysbytai Cymru bellach, sydd 60% yn is na'r brig ym mis Ebrill.

Ychwanegodd bod capasiti ychwanegol mewn ysbytai bellach, gyda dros hanner y gwlâu gofal dwys yn wag.

Mae mwy o wasanaethau iechyd eraill hefyd ar gael i gleifion bellach wrth i'r pandemig Covid-19 gilio, meddai.

Llywodraeth Cymru

Dr Andrew Goodall, prif weithredwr y gwasanaeth iechyd yng Nghymru, fydd yn arwain cynhadledd i'r wasg Llywodraeth Cymru y prynhawn 'ma.

Tua'r un pryd, fe fydd y Canghellor Rishi Sunak yn siarad yn Nhŷ'r Cyffredin i amlinellu rhagor o gamau er mwyn helpu busnesau a gweithwyr yn ariannol drwy'r pandemig.

Fe wnawn ni'ch diweddaru chi gyda'r prif bwyntiau gan y ddau fel maen nhw'n dod.

Mae Ysgrifennydd Cymru wedi dweud fod Llywodraeth y DU yn parhau i gynnal "trafodaethau cyson" gydag Airbus yn ystod y pandemig.

Daw hynny wedi i'r cwmni awyrennau gyhoeddi y bydd 1,400 o swyddi'n mynd yn eu safle ym Mrychdyn.

Ond dywedodd Mr Hart fod y diwydiant awyrofod wedi derbyn "rhwng £6bn-£10bn o gymorth Llywodraeth y DU hyd yma", a'u bod yn agored i "drafodaethau pellach".

Daeth hynny mewn ymateb i gwestiwn gan yr AS Llafur, Nia Griffith ynghylch cymorth penodol i helpu'r diwydiant i adfer yn dilyn Covid-19.

Ffynhonnell y llun, Reuters

Llywodraeth Cymru

Mae'r Prif Weinidog Mark Drakeford wedi dweud na fyddai gwisgo masgiau yn "datrys popeth" wrth daclo'r coronafeirws.

Dywedodd wrth Aelodau o'r Senedd y bydd Llywodraeth Cymru'n parhau i adolygu'r dystiolaeth.

Ond ychwanegodd bod y prif swyddog meddygol Dr Frank Atherton yn poeni y byddai pobl oedd yn gwisgo mygydau yn "ymddwyn mewn ffyrdd allai gynyddu'r risg" o ymledu'r haint.

Dywedodd Caroline Jones o Blaid Brexit ei bod hi eisiau gweld masgiau yn dod yn orfodol mewn mannau cyhoeddus gan fod y feirws yn ymledu drwy "anadlu a siarad" yn ogystal â pheswch a thisian.

Ffynhonnell y llun, Getty Images

BBC Wales Politics

Mae'r corff sy'n cynrychioli undebau llafur yng Nghymru wedi annog y llywodraeth i gyhoeddi dyddiad ar gyfer ailagor y diwydiant lletygarwch dan do.

Dywedodd TUC Cymru fod llawer o weithwyr yn poeni am eu swyddi pan fydd cynllun ffyrlo Llywodraeth y DU yn dod i ben.

Bydd tafarndai a bwytai yn cael ailagor y tu allan o 13 Gorffennaf, ac mae gweinidogion wedi dweud y bydd penderfyniad pellach ar ailagor dan do yn cael ei wneud ar ôl gweld effaith hynny.

Ffynhonnell y llun, Getty Images

Unite

Bydd cynrychiolwyr o undeb Unite yn cyfarfod â chwmni Rowan Foods heddiw am y tro cyntaf ers pythefnos i drafod tâl absenoldeb.

Roedd y ffatri fwyd yn Wrecsam yn ganolbwynt i glwstwr o achosion o Covid-19, gydag Iechyd Cyhoeddus Cymru'n dweud bod 289 o achosion bellach wedi'u cadarnhau.

Ond codwyd pryderon pan ddywedodd rhai gweithwyr wrth BBC Cymru eu bod wedi gorfod parhau i weithio wrth aros am ganlyniadau eu profion.

Roedd y cwmni hefyd ond wedi bod yn rhoi tâl salwch statudol i weithwyr oedd i ffwrdd oherwydd y feirws, gan arwain at bryderon fod rhai ddim yn aros adref gan na allen nhw fforddio gwneud hynny.

Plaid Cymru

Mae arweinydd Plaid Cymru wedi galw "symud tuag at system orfodol o ran gwisgo masgiau mewn amgylchiadau cyhoeddus y tu fewn" wrth i'r mesurau Covid-19 gael eu llacio.

"Mae'r wybodaeth ddiweddara' gan wyddonwyr a'r penderfyniad gan Sefydliad Iechyd y Byd i dderbyn bod yna awgrym nawr bod y firws yn gallu cael ei gludo ar yr aer, yn golygu bod yn rhaid i ni symud tuag at y math o bolisi ru'n ni'n weld ar fasgiau yn yr Alban a chael canllawiau," meddai ar raglen Post Cyntaf BBC Radio Cymru.

"Mae'n rhaid i ni ymateb yn fuan iawn i'r dewis sy'n dod a rhoi canllawiau i gwmnïau a siopau ac adeiladau cyhoeddus o ran systemau awyru ac yn y blaen am y gall hyn fod yn ffordd arall amddiffyn pobl."

Ychwanegodd y bydd ef ei hun yn gwisgo mwgwd yn y Senedd heddiw pan mae'n debygol o fod "yn agos at bobl eraill".

Bydd rhai o Aelodau Senedd Cymru'n cael dychwelyd i'r siambr ddydd Mercher am y tro cyntaf ers mis Mawrth.

Yn ystod y cyfnod clo mae cyfarfodydd y Senedd wedi cael eu cynnal ar Zoom.

Fe fydd y sesiwn 'hybrid' ddydd Mercher yn gweld rhai aelodau yn mynychu'r cyfarfod yn adeilad y Senedd, tra bod eraill yn cysylltu ar-lein.

Bydd modd i uchafswm o 20 aelod fod yn y siambr ar unrhyw adeg, gyda'r 40 arall yn gallu ymuno ar Zoom.