Pob ysgol yng Nghymru i ailagor yn llawn - lle bo hynny'n bosib - ar 1 Medi
Creu 900 o swyddi dysgu ychwanegol er mwyn helpu disgyblion yn dilyn y cyfnod clo
Rhybudd gan elusen fod ymfudwyr sy'n ffoi rhag trais yn y cartref mewn perygl o golli eu cefnogaeth wedi'r pandemig
Profiad mam o Sir Gâr sydd dal heb gael ei synnwyr arogl yn ôl ers cael Covid-19
Rheilffordd Yr Wyddfa i ddechrau rhedeg eto, ond methu mynd i'r copa oherwydd cyfyngiadau
Mae'r undeb sy'n cynrychioli penaethiaid, NAHT, wedi croesawu cyhoeddiad y Gweinidog Addysg am ragor o gyllid i gyflogi athrawon.
Dywedodd eu hysgrifennydd cyffredinol Rob Kelsall: "Mae'n hanfodol ein bod ni'n parhau i fuddsoddi yn y genhedlaeth nesaf os ydyn ni am drwsio'r niwed mae'r pandemig wedi'i wneud i addysg ein plant a phobl ifanc."
Y newyddion mawr heddiw yw bod Llywodraeth Cymru wedi cyhoeddi cyllid ar gyfer 900 o staff dysgu ychwanegol, er mwyn helpu'r disgyblion sydd wedi colli mwy na thymor o'u hastudiaethau oherwydd y cyfnod clo.
Bydd y pecyn cymorth £29m yn targedu disgyblion difreintiedig a phlant sy'n sefyll arholiadau, meddai'r llywodraeth.
Mae'r Gweinidog Addysg, Kirsty Williams wedi bod dan bwysau i egluro a fydd disgyblion yn dychwelyd yn llawn amser ym mis Medi.
Mae disgwyl iddi gyhoeddi rhagor am y cynlluniau hynny yng nghynhadledd i'r wasg Llywodraeth Cymru amser cinio.
Ffynhonnell y llun, Getty Images
BBC Cymru Fyw
Bore da, a chroeso i'n llif byw ni heddiw ar ddydd Iau, 9 Gorffennaf.
Fe ddown ni â'r diweddaraf i chi ar y pandemig coronafeirws yng Nghymru a thu hwnt yn ystod y dydd - yn gyntaf, dyma rai o straeon y bore 'ma.