Wrth i'r sector dwristiaeth ailagor ymhellach ddydd Sadwrn - gyda llety gwyliau yn croesawu ymwelwyr eto - y neges i bobl sy'n aros yng Nghymru yw gwneud hynny'n ddiogel a rhoi ystyriaeth i gymunedau lleol.

Wrth i westai, bythynnod gwyliau a pharciau carafanau ddechrau prysuro fe fydd poblogaeth sawl rhan o Gymru yn cynyddu'n sylweddol.

Mae'r Prif Weinidog, Mark Drakeford, wedi annog pobl sy'n ymweld â chefn gwlad, traethau ac ardaloedd o harddwch naturiol i wneud hynny'n ddiogel.

Yn y canolbarth mae darparwyr llety yn ceisio taro cydbwysedd gofalus rhwng ailgychwyn eu busnesau a denu pobl i mewn, tra'n amddiffyn ardal sydd wedi cael lefel isel o achosion Covid-19.

Yn ôl Iechyd Cyhoeddus Cymru mae 302 o achosion wedi'u cadarnhau ym Mhowys, a dim ond 59 yng Ngheredigion.

Ffynhonnell y llun, Robert Kidd/Geograph

Twitter

Dyma'r hyn sydd gan BBC Bitesize dan sylw heddiw:

Gyda chymaint o gyfyngiadau'n cael eu llacio ar ddyddiau gwahanol, mae'n werth eich atgoffa o'r dyddiadau pwysig yn yr wythnosau i ddod:

• Yfory fe fydd busnesau sy'n cynnig gwyliau hunan-arlwyo neu wely a brecwast yn cael ailagor
• Ddydd Llun fe fydd siopau trin gwallt, tafarndai a bwytai gyda gwasanaeth awyr agored yn ailagor
• Ar 20 Gorffennaf fe fydd parciau chwarae a chanolfannau cymunedol yn cael agor eu giatiau a'u drysau eto
• Ar 25 Gorffennaf bydd safleoedd gwersylla'n cael croesawu ymwelwyr eto
• Ar 27 Gorffennaf fe fydd y farchnad dai yn agor yn llawn eto, ac fe fydd pobl yn cael mynd i sinemâu, orielau ac amgueddfeydd hefyd.

Fe fydd disgwyl i bob busnes sydd yn ailagor i gydymffurfio gyda rheolau pellter cymdeithasol, ac fe fydd camau diogelwch mewn grym i ddiogelu iechyd y cyhoedd.

Ffynhonnell y llun, Getty Images

BBC Radio Wales

Bydd busnesau yn aros yn eiddgar am gyhoeddiad y prif weinidog Mark Drakeford am lacio cyfyngiadau dros y tair wythnos nesaf yn ddiweddarach heddiw.

Yn gynharach y bore ma roedd perchennog un busnes yn hallt iawn ei feirniadaeth o'r ffordd y mae'r llywodraeth wedi rheoli'r cyfyngiadau hyd yn hyn.

Wrth siarad ar BBC Radio Wales, dywedodd Ashford Price, cadeirydd Cymdeithas Atyniadau Ymwelwyr Cymru a pherchennog ogofâu Dan yr Ogof: "Nid yw'r prif weinidog yn deall bod atyniadau twristaidd wedi bod ar gau ers mis Hydref y llynedd.

"Nid ydyn nhw wedi derbyn unrhyw refeniw, mae ganddyn nhw i gyd orddrafftiau enfawr, mae Llywodraeth Cymru wedi eu hannog i dderbyn benthyciadau enfawr er mwyn goroesi.

"Rydw i wedi gweithio yn y maes twristiaeth ers 47 mlynedd ac rydw i wedi mynd trwy ddau argyfwng Traed a'r Genau, rydyn ni wedi cael cyfnodau o ddirwasgiad economaidd, ond mae Llywodraeth Cymru wedi gwneud mwy i ddifrodi twristiaeth na phob un o'r rhain wedi eu cyfuno.

"Mae mor ddifrifol â hynny," meddai.

Ffynhonnell y llun, Dan yr Ogof

BBC Radio Wales

Mae'r prif weinidog Mark Drakeford wedi bod yn rhoi rhagflas o'r hyn fydd yn ei gyhoeddi yn y gynhadledd ddyddiol i'r wasg am 12:30 heddiw.

Fe fydd yn amlinellu sut y bydd y llywodraeth yn llacio'r cyfyngiadau ar wahanol sectorau yn ystod y tair wythnos nesaf.

Wrth siarad ar BBC Radio Wales yn gynharach, dywedodd: "Ddydd Llun bydd mwyafrif helaeth yr atyniadau dan do yn gallu ailagor, felly hwb mawr i'r diwydiant twristiaeth.

“Bydd sinemâu, orielau amgueddfeydd a gwasanaethau cyswllt agos eraill i allu ailagor yn nhrydedd wythnos y cylch hwn," meddai. Mae BBC Cymru'n deall fod hyn yn cyfeirio at gyfnod o 27 Gorffennaf ymlaen.

Ychwanegodd ei fod yn gobeithio cyhoeddi newyddion ar gyfer bwytai sy'n gwasanaethu cwsmeriaid y tu mewn yn y gynhadledd i'r wasg yn ddiweddarach.

Wrth drafod ailagor campfeydd dan do, dywedodd: “Rydyn ni'n mynd i ddefnyddio'r tair wythnos nesaf i siarad â'r sectorau hyn am ailagor yn ddiogel."

Ychwanegodd: “Byddwn yn dweud heddiw y bydd addoldai yn gallu agor am nifer cyfyngedig o wasanaethau pwysig... lle mae awdurdodau eglwysig yn hyderus bod ganddyn nhw bethau ar waith i wneud hynny'n ddiogel.

“Rydyn ni mewn trafodaethau gyda'r DVLA a'r undebau llafur ynghylch ailagor gwersi gyrru.

"Nid oeddem yn gallu dod â'r trafodaethau hyn i ben mewn amser i mi allu gwneud y rhan yma o'r cyhoeddiad heddiw.

"Bydd y trafodaethau hynny'n parhau'r wythnos nesaf ac rwy'n obeithiol y byddwn yn gallu dweud rhywbeth am hyn yn eithaf buan.”

Ffynhonnell y llun, Getty Images

Twitter

Dyna'r neges o'r gorllewin wrth i'r ardal ailagor i ymwelwyr.

Dafydd Llywelyn, Comisiynydd Heddlu a Throsedd Dyfed Powys fu'n siarad gyda gohebydd Newyddion BBC Cymru, Iola Wyn, wrth i fusnesau baratoi.

Post Cyntaf
BBC Radio Cymru

Mae'r Gweinidog dros Gysylltiadau Rhyngwladol, Eluned Morgan, wedi bod yn siarad ar raglen y Post Cyntaf ar BBC Radio Cymru heddiw.

Dywedodd y gweinidog fod Cymru "mewn sefyllfa nawr ble y gallwn ni lacio" y cyfyngiadau gan fod nifer yr achosion o coronafeirws yn gostwng.

"Mae hyn yn cyd-fynd gyda'r diwydiant twristiaeth yn awyddus iawn i ail-ddechrau ond mae'n werth dweud unwaith eto mai iechyd yw'r flaenoriaeth i ni a'n bod ni ond yn gallu agor os fydd hyn yn parhau.

"Fe fydd hi yn ofynnol i bobl sicrhau eu bod nhw'n parhau i fod yn ofalus a sylweddoli nad yw'r firws wedi diflannu."

Ychwanegodd: "Maen bosib nawr i neud 15,000 o brofion y dydd sy'n golygu bod y capasiti yna os yw'r feirws yn ail godi a'n bod ni yn gallu dilyn y trywydd i weld o ble mae'r feirws wedi codi a dilyn y bobl falle sydd wedi dod i gysylltiad â'r feirws.

"Wrth i ni ailagor mae'n rhaid i ni ddeall ei bod hi yn debygol y bydd pobl yn dod i fwy o gysylltiad ac felly mae'n rhaid i ni gyd fod yn wyliadwrus."

Dywedodd y byddai'r rheol dau fetr yn parhau am y tro yma yng Nghymru, a hynny ar sail tystiolaeth wyddonol: "Ryda’n ni wedi cael cyngor gwyddonol yn dweud hollol glir bod cadw dau fetr llawer gwell na gostwng hynny i fetr neu lai ac felly mae'r rheol hon yn debygol o barhau.

"Ond ry'n ni yn cydnabod bod rhai diwydiannau lle nad yw hi yn bosib cadw at y mesur yma ac os bydd pobl yn gorfod nesáu o'r dau fetr yna bydd yn rhaid rhoi mesurau yn eu lle i ddiogelu'r bobl y maen nhw'n dod i gysylltiad â nhw... bydd yn rhaid i bobl trin gwallt wisgo PPE, bydd angen i bobl mewn gwestai a llefydd bwyta i ystyried pa fesurau sydd angen eu rhoi mewn lle," meddai.

BBC Radio 5 Live

Nid yw'r Prif Weinidog Mark Drakeford wedi diystyru "gwyliau treth stamp" ar gyfer pob sydd am brynu eiddo yng Nghymru.

Wrth siarad ar BBC 5Live yn gynharach, dywedodd Mr Drakeford y byddai'n trafod y mater yn ddiweddarach heddiw gyda'r Gweinidog Cyllid, Rebecca Evans.

"Byddwn yn edrych ar ein hopsiynau - roedd gennym ni gynnig mwy hael na Lloegr cyn y cyhoeddiad ddydd Mercher.

"Dwi ddim yn dychmygu bod pobl yn tynnu allan o gytundebau oherwydd y cyhoeddiad ddydd Mercher" ychwanegodd, wrth ddisgrifio cyhoeddiad Canghellor y DU, Rishi Sunak am 'wyliau' o dalu treth stamp ar eiddo o dan £500,000 tan 31 Mawrth yn Lloegr.

Mae'r grym i drethu yn y maes yma wedi ei ddatganoli i Gymru a Threth Trafodiadau Tir sydd yn bodoli yma ers Ebrill 2018.

Dywedodd Mr Drakeford ei fod yn gobeithio y byddai'r farchnad dai yn ailagor yn llawn ar Orffennaf 27.

Bydd parciau chwarae a chanolfannau cymunedol yn cael ailagor yng Nghymru o 20 Gorffennaf.

Fe fydd prif weinidog Cymru yn gwneud y cyhoeddiad yn ddiweddarach dydd Gwener, fel rhan o'r adolygiad tair wythnosol o'r cyfyngiadau coronafeirws.

Mae disgwyl hefyd i Mark Drakeford roi awgrym pendant ynglŷn ag ailagor rhagor o'r sector diwydiant harddwch.

Fe fydd siopau tatŵs a busnesau eraill o fewn y diwydiant harddwch yn cael neges i ddechrau paratoi ar gyfer ailagor ar 27 Gorffennaf "os bydd amodau yn caniatáu hynny".

Ffynhonnell y llun, Getty Images

BBC Cymru Fyw

Bore da a chroeso i lif byw dyddiol BBC Cymru Fyw ar ddydd Gwener 10 Gorffennaf.

Fe fyddwn yn dod a'r diweddaraf chi am ymateb Cymru i bandemig coronafeirws drwy gydol y dydd.

Amser cinio fe fyddwn yn troi ein sylw at ddiweddariad dyddiol Llywodraeth Cymru am sefyllfa'r pandemig - gyda disgwyl y bydd Mark Drakeford yn cyhoeddi mesurau i lacio rhagor o gyfyngiadau dros yr wythnosau nesaf.

Yn fuan wedyn fe fyddwn yn cyhoeddi nifer yr achosion a marwolaethau Covid-19 yma yng Nghymru wrth i Iechyd Cyhoeddus Cymru ryddhau eu hystadegau am 14:00.

Fe fydd y penawdau perthnasol a straeon o bob cwr o'r wlad am sefyllfa Covid-19 i gyd yma ar y llif byw i chi.

Arhoswch gyda ni am y datblygiadau diweddaraf.