Diolch am ddilyn y cyfan unwaith eto ar ddydd Iau yr Eisteddfod. Bydd criw Cymru Fyw yn ôl 'fory!

Bu'n ddiwrnod arall o uchafbwyntiau... a rhagor i ddod heno wrth gwrs.

Gruffydd Siôn Ywain yw enillydd y Fedal Ddrama.

Lisa Dafydd yw enillydd Gwobr Goffa Osborne Roberts, Y Rhuban Glas.

Mae Gwilym, Adwaith, Mellt, Alffa a Cherddorfa'r Welsh Pops yn paratoi i berfformio yng Ngig y Pafiliwn heno.

I gloi'r cyfan bydd Parti Pinc yn y Pafiliwn am 23:00 heno.

Welwn ni chi 'fory! 😎

Mae'n prysuro yno wedi seremoni'r Fedal Ddrama. Fyddwch chi ymhlith y dorf?

Mae digon o ddewis... os y'ch chi'n hoffi pinc!

Roedd Caffi Maes B yn llawn wrth wrando ar Mared Williams. Fe fydd hi hefyd yn canu gyda’i band ar Lwyfan y Maes yfory.

Llongyfarchiadau mawr i Gruffydd Siôn Ywain, enillydd y Fedal Ddrama eleni.

Daeth i'r brig mewn cystadleuaeth a ddenodd 15 o ymgeiswyr a chafodd ei anrhydeddu ar lwyfan y Pafiliwn yn Nhregaron ddydd Iau.

Mae Gruffydd, sy'n wreiddiol o Ddolgellau ond sydd bellach yn byw yn Llundain, hefyd yn derbyn rhodd ariannol o £750.

Wrth draddodi ar ran ei chyd-feirniaid, dywedodd Janet Aethwy fod y ddrama fuddugol yn "stori afaelgar wedi ei saernïo'n gelfydd".

"Mae'n ddrama hyderus a chrefftus sy'n portreadu perthynas cwpwl gwrywaidd sy'n chwilio am fam fenthyg er mwyn creu teulu, a'u perthynas hwy gyda ffrind benywaidd," meddai Janet Aethwy am y ddrama fuddugol.

"Mae'r themâu yn gyfredol a dadleuol a pherthnasol i gynulleidfa heddiw ac mae'r cymeriadau yn gwbl gredadwy, yn gelfydd a chrwn.

"Mae'r ddeialog yn ffraeth ac yn emosiynol ac yn llifo'n wych.

"Mae'r dramodydd yn defnyddio ei gymeriadau i wthio'r plot yn ei flaen yn araf a phwyllog ac mae sicrwydd y bwriad wrth adeiladu'r stori yn dal ein sylw wrth i ni fuddsoddi yn nhynged y cymeriadau."

Llwyddodd y dramodydd o Ddolgellau i lunio "stori afaelgar wedi ei saernïo'n gelfydd", medd y beirniaid.

Cliciwch yma i wylio.

Mi fyddwn ni'n clywed ymhen rhai munudau a oes teilyngdod yn seremoni'r Fedal Ddrama.

Janet Aethwy, ar ran ei chyd-feirniaid Sharon Morgan a Sera Moore Williams, fydd yn datgelu, os oes teilyngdod, ffugenw'r buddugol.

Y dasg oedd cyfansoddi drama lwyfan a doedd dim unrhyw gyfyngiad o ran hyd.

Seremoni fer fydd hon a dyw'r Archdderwydd na'r Orsedd ddim yn rhan o'r seremoni.

Mae'r buddugol yn ennill y fedal (er cof am Urien Wiliam) a £750 o Gronfa Goffa Huw Roberts, Pwllheli.

Drama sydd â photensial i'w datblygu ymhellach o gael gweithio gyda chwmni proffesiynol fydd y ddrama fuddugol.

Cofiwch y gallwch chi wylio'r holl gystadlu ar y llwyfan yma.

Mae seremoni'r Fedal Ddrama yn dechrau nawr.

Daeth nifer draw i Lwyfan y Llannerch i glywed sgwrs rhwng rhai o nofelwyr Gwasg Carreg Gwalch.

Haf Llywelyn, Angharad Tomos, Rebecca Thomas a Gareth Evans oedd yno yn trafod pa mor berthnasol yw ein hanes i bobl ifanc Cymru heddiw?

Yr Athro Richard Wyn Jones fu'n trafod y cwestiwn ym Mhabell Cymdeithasau 2 brynhawn yma.

Roedd y lle dan ei sang wrth i Richard egluro pam fod y blaid wedi ennill etholiad ar ôl etholiad yng Nghymru.

Yn ystod y cyfnod clo, bu Jenny M Thomas (Bush Gothic) ac Angharad Jenkins (Calan) yn cydweithio.

Roedd y naill yn Awstralia a'r llall yng Nghymru.

Daeth y ddwy at ei gilydd am y tro cyntaf i chwarae yn y Tŷ Gwerin.

Ffynhonnell y llun, Adwaith

Bydd band Adwaith yn perfformio yng Ngig y Pafiliwn heno ac yn cloi Maes B am y tro cyntaf erioed eleni.

Wrth siarad gyda BBC Cymru Fyw, dywedodd y dair o Gaerfyrddin eu bod yn gobeithio ysbrydoli cenhedlaeth newydd o ferched yng Nghymru.

Saith mlynedd yn ôl yn 2015 fe ddychwelodd y gitarydd Holly Singer, y basydd Gwenllian Anthony a'r drymiwr Heledd Owen o Eisteddfod Meifod gyda'r un freuddwyd ar eu meddyliau - creu Adwaith.

"Wnaethon ni ddechrau'r band ar ôl dod yn ôl o Maes B - felly mae'n teimlo fel full circle moment," meddai Gwenllian Anthony.

"Nes i fyth gweld ni yn headlinio Maes B. Fi'n teimlo fel weithiau… yn amlwg ni yn y sin Cymraeg ond ei fod e yn one foot in, one foot out."

Adwaith ydi'r ail grŵp benywaidd yn unig i gloi nos Sadwrn fawr Maes B.

Darllenwch ragor yma.

Eisteddfod Genedlaethol Cymru

Gwilym, Adwaith, Mellt, Alffa a Cherddorfa'r Welsh Pops fydd yn serennu ar y llwyfan yng Ngig y Pafiliwn heno 🎺🎶

Llongyfarchiadau mawr i Lisa.

Yn nhafarn y Talbot, Tregaron brynhawn Iau roedd yna gyfle i gofio am y cynhyrchydd Lowri Gwilym. Hi gafodd y syniad i ffurfio rhaglen Beti a’i Phobol.

Yn ddiweddarach bu’n gomisiynydd S4C. Cafodd ei magu’n rhannol ym Mro’r Eisteddfod - yn Nhrefenter.

Mae criw Cyw yn arwain sesiwn meddwlgarwch yn y Pentref Plant tra bod yr haul yn gwenu'n braf.

Mae Prifysgol Cymru y Drindod Dewi Sant yn dathlu 200 mlynedd ers ei sefydlu - Maes yr Eisteddfod yn lle gwych i ddenu pawb at ei gilydd.

Elis Derby fu wrthi...