Yn Hyde Park, bydd yr arch yn cael ei rhoi yn yr Hers Wladol ar gyfer y daith i Windsor.

Wrth i’r Hers Wladol adael Wellington Arch, bydd yr orymdaith yn rhoi Salíwt Frenhinol a bydd yr anthem 'God Save the King' yn cael ei chwarae eto.

Bydd y Brenin ac aelodau’ o'r Teulu Brenhinol wedyn yn gadael am Windsor.

Unwaith fydd gorymdaith yr arch a gorymdaith y Brenin wedi gadael Wellington Arch am Windsor, bydd clychau Abaty Westminster wedi’u pylu’n llawn (fully muffled) drwy’r prynhawn - dim ond ar ôl angladd brenhines neu frenin y mae hyn yn digwydd.

Bydd yr Hers Wladol yn mynd drwy Lundain gan basio atyniadau fel Cofeb Albert a’r Amgueddfa Astudiaethau Natur.

Yna fe fydd yn mynd drwy orllewin Llundain cyn cyrraedd cefn gwlad.

Mae digwyl i'r hers gyrraedd Windsor am 15:00 ac yno bydd gorymdaith arall yn digwydd.

"Mae’r ffaith bod pobl eisiau bod yn y ciw i weld yr arch yn dangos bod pobl eisiau bod yn rhan o hanes," meddai Non Vaughan-O’Hagan, cyn-gynorthwyydd personol i Ddeon Westminster, ar Newyddion S4C.

"Mae hynny’n tynnu cymuned at ei gilydd.

"Ar lefel rhyngwladol mae’n eithriadol bod y byd wedi dod yma.

"Gobeithio yn sgil hyn i gyd, gan nad oes agenda o gwbl, gobeithio bod y sgyrsiau i gyd sy’n digwydd yn gallu tyfu profiadau newydd i ni gyd."

BBC Radio Cymru

Roedd popeth am y gwasanaeth yn Abaty Westminster "oni bai am un anthem" yn "hollol draddodiadol" yn ôl yr hanesydd Dr Elin Jones.

"Emynau hollol Gristnogol, y gwasanaeth yn draddodiadol ac yn Anglicanaidd, ac roedd y gerddoriaeth hefyd yn draddodiadol.

"Gyda'r cysylltiadau yna gyda ei phriodas hi, o'n i'n meddwl bod e'n emosiynol iawn ac roedd y cyfan yn hardd iawn, yn urddasol iawn ac yn draddodiadol dros ben."

Ffynhonnell y llun, PA Media

Mae rhai hediadau i ac o faes awyr Heathrow wedi eu hatal am gyfnod - er mwyn peidio amharu ar yr orymdaith angladdol wrth iddi fynd i Hyde Park.

Dyw'r amharu ddim yn fawr, medd llefarydd ar ran y maes awyr ond mae'n debyg bod British Airways wedi canslo 50 hediad.

Ffynhonnell y llun, Getty Images

Mae’r arch wedi’i gwneud o dderw o Loegr ac wedi’i leinio â phlwm.

Cafodd ei chreu 30 mlynedd yn ôl ac mae wedi bod ym meddiant yr ymgymerwyr brenhinol presennol, Leverton & Sons, ers 1991.

Mae'r torfeydd eisoes wedi dechrau ymgynnull yn Windsor, ble bydd arch y Frenhines yn teithio heibio y prynhawn yma.

Fel nifer o drefi a dinasoedd eraill ar draws Cymru, mae Stryd Fawr Bangor hefyd yn llethol o dawel heddiw.

Mae nifer o siopau a busnesau ar gau yn ystod y dydd oherwydd yr angladd.

Un o'r bobl sydd ar y Mall y prynhawn 'ma yw Ann Jones, Cadeirydd Cenedlaethol Sefydliad y Merched.

Mae hi wedi cwrdd â'r Frenhines droeon a bu'n rhannu ei hatgofion gyda'n gohebydd Iwan Griffiths.

Mae'r orymdaith angladdol yn cerdded tua Hyde Park o dan arweiniad Heddlu Marchogol Brenhinol Canada – y Mounties. Mae yna saith grŵp ohonyn nhw - pob un â'i fand ei hun.

Mae aelodau o’r lluoedd arfog o’r DU a’r Gymanwlad, yr heddlu a’r Gwasanaeth Iechyd Gwladol hefyd yn cymryd rhan.

Mae'r Brenin a rhai aelodau o'r Teulu Brenhinol yn dilyn arch y Frenhines tra bod Camilla, y Frenhines Gydweddog, Tywysoges Cymru, Iarlles Wessex a Duges Sussex yn ymuno â’r orymdaith mewn ceir.

Dyw hi ddim yn orymdaith dawel gan bod y Magnelwyr Brenhinol yn tanio gynnau yn Hyde Park bob munud ac hefyd mae Big Ben yn canu bob munud.

Mae disgwyl i'r orymdaith gyrraedd Hyde Park erbyn 13:00.

Sion Pennar
Gohebydd BBC Cymru

Yma yn Hyde Park dechreuodd y torfeydd glapio pan gafodd arch y Frenhines ei chodi a'i chario allan o'r Abaty.

Mae sŵn y gwn yn tanio gerllaw yn rymus.

Rwan mae nifer yn gadael y parc i fynd i weld a allan nhw ddal cip o'r orymdaith sy'n pasio gerllaw.

Ymhlith y miloedd o bobl sydd eisoes ar y Mall mae Myfanwy Bunting, 50, ei gŵr Dean a'u merch Eden, 8, a deithiodd o Fro Morgannwg ddoe.

"Dwi'n meddwl ei bod hi'n bwysig i Eden wybod ein bod ni wedi cael brenhines fenywaidd ar yr orsedd am 70 mlynedd," meddai Myfanwy.

"Fe wnaeth hi waith arbennig."

Fel nifer o bobl, mae Myfanwy yn dal i ddod i arfer gyda'r syniad na fydd Elizabeth II yn teyrnasu mwyach.

"Roeddwn i'n meddwl ei bod hi'n anfarwol a'i bod hi am fyw am byth."

Mae'r cyn-delynores frenhinol, Claire Jones wedi bod yn adlewyrchu ar y gerddoriaeth a gafwyd yn y gwasanaeth.

"Roedden nhw'n ddewisiadau hynod o drawiadol ynglŷn â’r sefyllfa ry’n ni ynddo heddiw," meddai ar Newyddion S4C.

"Dwi’n siŵr iawn y byddai’r Brenin wedi bod yn agos iawn at ddewis pob darn o gerddoriaeth, o’r trwmpedi i Gôr Abaty Westminster.

"Roedd yr organyddion yn wych yn eu gwaith heddiw.

"Wrth ystyried y pwysau oedd arnyn nhw gyda’r byd yn gwylio, fel cerddor proffesiynol dwi’n gwybod yn iawn sut mae hi i chwarae mewn achlysur sydd â lot o bwysau.

"Dwi’n siŵr bod nifer o oriau wedi’u treulio yn paratoi am hyn.

"Roedd darn Judith Weir yn drawiadol iawn ac yn enwedig darn Hubert Parry.

"Pan roeddwn i’n gweithio i’r Brenin, y Tywysog Charles fel oedd e ar y pryd, roedd e’n hoff iawn o gerddoriaeth Hubert Parry.

"Felly roedd yna nifer o atgofion o’r ochr artistig a cherddorol, a’r elfen Albaneg gyda phibydd y Frenhines yn chwarae’n drawiadol iawn ar y diwedd."

Matthew Richards
Gohebydd BBC Cymru

Mae gweithwyr brys yn Wrecsam ymhlith y rheiny fu'n cymryd rhan yn y dau funud o dawelwch.

Fe wnaeth naw o ddiffoddwyr tân Green Watch, sydd wedi eu lleoli yng Nghanolfan Adnoddau'r Gwasanaeth Tân ac Ambiwlans, sefyll y tu allan o flaen eu cerbydau.

Ochr yn ochr â nhw roedd staff a pharafeddygon o'r gwasanaeth ambiwlans hefyd.

Mae'r dorch sydd ar arch y Frenhines yn cynnwys blodau gafodd eu dewis gan y Brenin Charles.

Wedi'u torri o erddi Palas Buckingham, Clarence House a Highgrove House, mae'r blodau a'r dail wedi'u dewis oherwydd eu symbolaeth.

Ffynhonnell y llun, Getty Images

Maen nhw’n cynnwys rhosmari - i gofio - a myrtwydd a gafodd ei dyfu o sbrigyn yn nhusw priodas y Frenhines.

Yn eu plith mae na dderw o Loegr i symboleiddio cryfder cariad, pelargoniums, rhosod yr ardd a dahlias.

Mae'r blodau yn liwiau o aur, pinc, coch tywyll a gwyn, i adlewyrchu’r Faner Frenhinol.

Mae'r nodyn sydd ar y dorch yn cynnwys neges sy'n dweud: "Er cof cariadus a theyrngar" ac mae wedi ei llofnodi gan y Brenin Charles.

Mae staff y teulu brenhinol wedi dod allan o Balas Buckingham i sefyll ger y llwybr ble bydd yr arch yn ymdeithio.

Chris Dearden
Gohebydd BBC Cymru

Mae tua 55 o bobl wedi dod i Theatr Colwyn i wylio'r angladd ar y sgrin fan hyn.

Dywedodd staff bod nifer o bobl wedi dod oherwydd fel arall bydden nhw'n gwylio'r peth o adref, ond mae teuluoedd a grwpiau eraill yma hefyd.

Dydy'r theatr ddim yn llawn - mae'n gallu dal tua 300 - ond mae awyrgylch dymunol ond tawedog yma.

Nesaf fe fydd arch y Frenhines yn teithio i Gornel Hyde Park - heibio'r Mall.

Mae Harry Squibs, 57, o Borthcawl yn un o'r rheiny sydd wedi bod yn gwneud ei ffordd ar hyd Pall Mall.

Dywedodd fod y Frenhines "wedi cadw cwmni i mi ar Ddydd Nadolig".

"Mae 'na sawl rheswl [pam nes i ddod], mwy i wneud gyda fy mherthnasau oedd yn y lluoedd arfog - pob un o'r tri, y fyddin, y llu awyr a'r llynges," meddai.

"Fe fu sawl un ohonyn nhw farw'n ddiweddar. Hefyd roedd fy mam yn byw yma pan oedd hi'n ifanc, a bu hi farw'n ddiweddar gyda dementia."