Bydd Maes B yn croesawu'r gwersyllwyr cyntaf heno - ac mae'r paratoadau olaf ar waith cyn i'r giatiau agor...

Mae'r criw wedi rhyddhau'r holl fanylion sydd angen eu cofio cyn cyrraedd...

✅ Rhaid bod yn 16 neu'n hŷn i fynychu

✅ Peidiwch a phacio gwydr

✅ Cofiwch eich tocyn

Mae ‘na waith celf gan yr artist Manon Awst wedi cael ei ddadorchuddio ar y maes, er mwyn tynnu sylw at bwysigrwydd mawndiroedd a’r angen i ofalu am yr amgylchedd.

Bydd ‘Cerfluniau Gludiog’, sy’n cynnwys haenau o ddeunyddiau gan gynnwys gwair gwastraff a chregyn gleision, ar gael i’w weld ar stondin Cyfoeth Naturiol Cymru.

Pwrpas y gwaith yw archwilio cyfansoddiad unigryw mawndiroedd, sy’n gorchuddio tua 4% o dir Cymru ond yn storio 30% o garbon y tir.

“Rwyf wrth fy modd fy mod wedi gallu dangos fy ngwaith yn yr Eisteddfod Genedlaethol a gobeithio y gallwn gysylltu â chynulleidfaoedd amrywiol a chodi ymwybyddiaeth o bwysigrwydd mawndiroedd, nid yn unig yng Nghymru ond yn fyd-eang,” meddai Manon Awst.

Mae Llwyfan y Maes yn llawn dop efo sêr y sîn heno - pwy y'ch chi'n edrych 'mlaen at eu gwylio fwyaf?

Dyma Maria, Anahi a Luis sy'n wreiddiol o Ecwador, De America, a bellach yn byw yn Nottingham.

Er nad ydynt yn medru’r Gymraeg maent yn gallu siarad Sbaeneg a’u mamiaith Quichua.

Maen nhw’n gwneud yn siwr eu bod yn dod i’r Eisteddfod yn flynyddol ac yn mwynhau clywed a gweld diwylliant Cymru.

Mae plant a phobl ifanc Llŷn, Eifionydd ac Arfon wedi bod yn paratoi ar gyfer yr wythnos hon ers amser.

Fe fydd dwy ysgol leol yn cymryd rhan mewn sioe yn Y Sfferen yn y Pentref Gwyddoniaeth a Thechnoleg ddydd Mawrth sef Ysgol Bro Lleu ac Ysgol Pentreuchaf – sydd dafliad carreg o’r maes.

Mae’r sioe Y Peiriant Amser, sydd wedi’i pharatoi o dan arweiniad Y Galeri yng Nghaernarfon, yn gyfle i fynd ar daith drwy amser a thrwy gyfrwng cymeriadau eiconig bydd modd dysgu mwy am dechnoleg a gwyddoniaeth.

Dyw hi ddim yn 'Steddfod heb alw draw yn stondin Merched y Wawr.

Mae Merched Bethel yn brysur yn gweini paneidiau ers codi cyn cŵn Caer y bore 'ma!

Mae Elan Evans, sydd yn trefnu Maes B, yn dweud bod eu tocynnau gwersylla “bron â gwerthu mas”, a’u bod yn disgwyl y bydd hynny’n digwydd cyn diwedd yr wythnos ✨

Ond bydd dal modd prynu tocynnau i’r gigs yn unig, ar ben hynny.

Ychwanegodd y byddan nhw’n arbrofi gyda llwyfan agored heb do ym Maes B eleni i gynnig mwy o ofod i artistiaid.

Dydy hynny heb ddigwydd ers Eisteddfod Bro Morgannwg yn 2012.

Mae'r gynhadledd i'r wasg wedi dechrau ar y maes.

Wrth drafod costau i stondinwyr ar y maes eleni, mae swyddog cyfathrebu’r Eisteddfod, Gwenllian Carr, yn dweud nad yw prisiau stondinau wedi mynd i fyny.

Mae’n dweud fod hynny er bod costau i'r Brifwyl “wedi mynd fyny 30-40% ers y flwyddyn ddiwethaf”.

Ychwanegodd bod rhai stondinau bwyd heb ddod eleni am “resymau personol”.

BBC Radio Cymru

Cofiwch fod modd gwrando ar holl fwrlwm Boduan yn fyw ar BBC Radio Cymru drwy'r dydd

Wrth nodi chwarter canrif ers sefydlu Cymdeithas Eisteddfodau Cymru, mae galw am ragor o gydweithio rhwng eisteddfodau lleol.

Cafodd y gymdeithas ei ffurfio gydag Aled Lloyd Davies yn gadeirydd, Ellis Wyn Roberts yn is-gadeirydd a Gron Ellis yn ysgrifennydd.

Nawr, mae Ellis Wyn Roberts yn dweud ei fod "yn meddwl bod yr eisteddfodau lleol o bosib wedi ymbellhau wrth ei gilydd".

"Mae'r gwaith sy'n cael ei wneud gan Gymdeithas Eisteddfodau Cymru yn ardderchog, ond efallai bod pellter wedi codi."

BBC Radio Cymru

Roedd Jeremy Miles yn trafod ar raglen Dros Frecwast BBC Radio Cymru y bore 'ma ynglŷn ag ariannu'r Eisteddfod Genedlaethol.

"Ry'n ni wedi cynyddu grant craidd yr Eisteddfod Genedlaethol eleni i fwy na £1m dros y flwyddyn neu ddwy ddiwethaf," dywedodd.

"Bydd y Llywodraeth yn edrych ar y gefnogaeth y gallan nhw roi'r flwyddyn nesaf gan gydnabod pa mor bwysig yw sicrhau bod yr Eisteddfod yn hygyrch i gymaint o bobl a phosib."

Pan holwyd a fydd yna fwy o arian i'r Eisteddfod Genedlaethol allu ehangu ei hapêl y flwyddyn nesaf yn Rhondda Cynon Taf, dywedodd Jeremy Miles eu bod nhw mewn trafodaethau parhaus gyda'r Eisteddfod Genedlaethol ac y byddai'n cael trafodaethau pellach heddiw.

"Ry'n ni wastad yn gwneud popeth y gallwn ni i gefnogi'r Eisteddfod, mae'n Ŵyl bwysig iawn i ni fel cenedl."

Yn ôl gohebwyr Cymru Fyw ar y maes, mae'n ddigon sych dan draed er iddi bigo bwrw glaw am gyfnod y bore 'ma.

Ma 'na dipyn mwy o drainers a sandalau o gwmpas y lle erbyn hyn, yn hytrach na welis ac esgidiau cerdded!

Lisa o Dudweiliog a Cian o Bryncroes yn mwynhau 'Steddfod leol!

Prif seremoni ddoe oedd y Coroni - a Rhys Iorwerth o Gaernarfon oedd yn fuddugol.

Roedd pedwar bardd wedi dod i'r brig gan y beirniaid, ond roedd un yn "sefyll ar wahân i'r gweddill".

"Crefftwr gorau'r gystadleuaeth" oedd Rhys Iorwerth, meddai'r beirniaid, ac roedd yn "haeddu clod arbennig".

Ar ôl ennill y Gadair yn Eisteddfod Wrecsam 2011, dywedodd ei fod yn benderfynol o fwynhau'r seremoni y tro hwn.

Er iddo fwynhau, dywedodd ei fod yn dal i deimlo'r nerfau wrth eistedd yn y pafiliwn!

Darllenwch y cyfan yma.

Prif seremoni ddydd Mawrth yw Gwobr Goffa Daniel Owen. Dyma fanylion y gystadleuaeth.

Beth am fwynhau ychydig o ddrama yr wythnos hon? Mae gan y Theatr Genedlaethol ddigon i'ch cadw chi'n brysur...

Gwenllian Ellis yn barod am ddiwrnod o waith ar stondin ddillad.

Mae Gwenllian yn dod o Lŷn, ac fe wnaeth hi Ateb y Galw gyda BBC Cymru Fyw ychydig wythnosau yn ôl.

Roedd 'na ddigon o gystadlu yn y ddau bafiliwn ddoe - ond pwy lwyddodd i gyrraedd y brig?

Cliciwch yma am holl ganlyniadau dydd Llun a chlipiau o'r cystadlaethau.

Neu gallwch ddarllen holl ganlyniadau'r Brifwyl hyd yn hyn.

Gyda rhai o griw ifanc Maes B yn cyrraedd heddiw, dyma gynghorion Ryan o dîm Ambiwlans St John ar y maes.

1. Gwisgwch yn addas

2. Bwytewch ac yfwch ddigon

3. Gofalwch am eich gilydd

4. Er ei bod hi’n gymylog, gall yr haul gael cryn effaith arnoch chi felly byddwch yn ymwybodol o hyn.

Trwy gydol y dydd mae’r criw yn cynnal arddangosiadau diogelwch a chymorth cyntaf yn eu stondin ger y pentref bwyd.

Dyma Rhys, un o'r criw sy'n chwilio am gynnwys ar y maes, er mwyn dod â'r diweddaraf ar ein llif byw!

BBC Radio Cymru

Ddoe fe wnaeth yr Eisteddfod gyhoeddi mai ym Mhontypridd y bydd y Brifwyl yn cael ei chynnal y flwyddyn nesaf.

Fe ddywedodd Jeremy Miles, Gweinidog y Gymraeg ac Addysg, fod y brwdfrydedd eisoes i'w weld yn yr ardal - sy'n draddodiadol llai 'Cymraeg' nag ardal fel Llŷn ac Eifionydd.

"Mae rôl yr Eisteddfod yn hollbwysig i ni fel cenedl gyda'n hiaith ond yn llawer mwy na gŵyl un wythnos," dywedodd.

"Maen benllanw cyfnod o flwyddyn neu ddwy o weithio yn y gymuned a sicrhau ein bod ni'n creu'r cyfleoedd hynny i bobl ddefnyddio eu Cymraeg - a ry'n ni'n gweld hynny'n digwydd eisoes yn Rhondda Cynon Taf yn sgil y cynlluniau'r flwyddyn nesa'."

"Mae hi'n ardal lle mae angen hwb i'r Gymraeg os y'n ni am gyrraedd y targed o filiwn o siaradwyr," ychwanegodd yr Aelod o'r Senedd Plaid Cymru lleol Heledd Fychan.

"Pa well cyfle? Cael Eisteddfod yng nghanol bwrlwm tref prysur... mi allai fod mor bositif i'r Gymraeg."