Dyna ddiwedd ein llif byw am heddiw.

Cofiwch am ein tudalen ganlyniadau, ble mae modd gwylio uchafbwyntiau o gystadlaethau'r dydd yn y Pafiliwn.

Fe fydd criw Cymru Fyw yn crwydro'r Maes eto bore yfory. Diolch am ddilyn!

Fe gafodd Cymru Fyw sgwrs gyda Owain Rhys, enillydd Coron Eisteddfod Wrecsam 2025.

Fe wnaeth egluro mai profiadau personol y flwyddyn ddiwethaf oedd yr ysgogiad i ysgrifennu:

"Fe wnaeth y caneuon ddod - roedd rhaid i mi ganu am y profiad oedd gen i. Roeddwn eisiau ei roi ar glawr. A digwydd bod roedd y testun yn ffitio... dyna'r tro cyntaf dwi wedi gweithio ffordd yna, yn lle trio cael rhywbeth i ffitio'r testun."

Gwyliwch yn cyfweliad llawn isod.

Fe enillodd Joe Morgan o Gaerdydd fedal Bobi Jones yn Eisteddfod yr Urdd eleni, ac mae wedi mwynhau'r dydd yn Wrecsam.

“Dyma fy nhro cyntaf ar faes yr Eisteddfod Genedlaethol. Dwi wrth fy modd, a wedi rili joio.

"Gwnes i wylio fy mrawd yn cael ei urddo heddiw - roedd o mor emosiynol!”

Mae digon o bethau i'w mwynhau ar y Maes heno, dyma gipolwg o'r arlwy:

Llwyfan y Maes:

18:00 - Gai Toms

19:20 - Celt

21:00 - Nwy yn y Nen: Cofio Dewi Pws

Y Babell Lên:

19:00 - Cabarela: Merched y Waw!

Tŷ Gwerin:

18:15 - Megan Lle

19:45 - Carneddi

21:00 - Lewis, Finch, Rimes

BBC Radio Cymru

Dilynwch Radio Cymru 2 ar Instagram i wylio mwy o fideos gan Jac Northfield a'r criw.

Bu'r gweinidog yn Swyddfa Cymru, Nia Griffith yn ymweld â'r Maes heddiw a cafodd gyfle i eistedd ar fodel o'r Gadair wrth gyfarfod ag un o'r gwneuthurwyr, Gafyn Owen.

Dywedodd fod yr "Eisteddfod yn bwysig iawn - yn gyfle i bobl ddod at ei gilydd i ddathlu diwylliant Cymraeg.

"Mae'r Eisteddfod wedi moderneiddio'i hunan hefyd. Mae'n hyfryd bod mas ar y maes a gweld pobl yn mwynhau pob math o weithgareddau - nid yn unig be sy'n mynd ymlaen yn y Pafiliwn ond y stondinau, sgyrsiau a gweithgareddau o bob math."

Aeth yn ei blaen i ddweud: "'Da ni am gefnogi'r iaith Gymraeg - mae hyn yn un o'r ffyrdd o gefnogi'r iaith os ydyn ni moyn mynd at fwy o bobl yn gallu siarad Cymraeg.

"Mae'n bwysig iawn bo' nhw'n mwynhau defnyddio’r Gymraeg - nid yn unig defnyddio fe yn yr ysgol ond defnyddio fe wedyn, ac mae hwn yn un o'r ffyrdd i wneud hyn."

Wrth i ni agosáu at ddiwedd ein llif byw am y dydd, dyma rai uchafbwyntiau eraill gan Cymru Fyw o'r Eisteddfod:

• Oriel luniau dydd Llun
• Canlyniadau ac uchafbwyntiau'r Pafiliwn

Mae hefyd atgofion am Eisteddfodau'r gorffennol, gan gynnwys fideo rhyfeddol o Eisteddfod 1925 pan gafodd Brenhines Romania ei hurddo i'r Orsedd.

Mae mwy o uchafbwyntiau a straeon yn ein adran arbennig yma.

Owain Rhys o Gaerdydd sydd wedi ennill Coron Eisteddfod Genedlaethol Wrecsam 2025.

Mwy yma.

Llif Dau yw ffugenw enillydd y Goron...

Fe dderbyniodd ganmoliaeth am fod â "llais telynegol, meddylgar a thyner sy'n rhedeg trwy'r cerddi".

Ond pwy yw'r bardd? Rydym ni ar fin darganfod.

Beirniaid cystadleuaeth y Goron eleni yw Ifor ap Glyn, Gwyneth Lewis a Sion Aled. Wrth ddechrau traddodi'r feirniadaeth, fe gyhoeddodd Ifor ap Glyn bod 28 ymgais wedi cyrraedd y beirniaid eleni.

Meddai: "Mae'n galondid nodi fod y rhan fwyaf yn gallu cyrraedd y safon sy'n ddisgwyliedig ar gyfer cystadleuaeth y Goron ar adegau."

Ond a fydd teilyngdod? Cawn weld...

Dyma'r olygfa yn y Pafiliwn brynhawn Llun wrth i seremoni y Coroni gychwyn.

Mae cynrychiolwyr o Orseddi Llydaw, Patagonia, yr Alban, Iwerddon a Chernyw wedi eu croesawu i'r llwyfan gan yr Archdderwydd, Mererid Hopwood.

Mae aros eiddgar am brif seremoni gyntaf yr wythnos a Gorsedd Cymru ar fin cyrraedd y llwyfan.

Ond wyddoch chi beth yw yw arwyddocâd lliwiau gwisgoedd yr Orsedd?

Y Wisg Wen

• Enillwyr prif wobrau'r Eisteddfod sy'n gwisgo'r wisg wen.
• Gallwch adnabod enillwyr y Gadair neu'r Goron gan eu bod yn gwisgo llawryf am eu penwisg.

Y Wisg Werdd

• Mae'r aelodau sy'n gwisgo gwyrdd yn arbenigo ym myd y celfyddydau. Gall hynny ddigwydd er anrhydedd, trwy radd neu drwy arholiad.
• Mae enillwyr Cadair a Choron Eisteddfod yr Urdd hefyd yn gwisgo'r wisg werdd.

Y Wisg Las

• Mae'r wisg las ar gyfer rhai sydd wedi rhoi gwasanaeth arbennig i'w bro neu i'r genedl a thrwy anrhydedd ym myd y Gyfraith, Gwyddoniaeth, Chwaraeon, Newyddiaduraeth neu'r Cyfryngau.

Gallwch wylio'r seremoni'n fyw ar S4C.

Mared, Eleri ac Enid o Ruthun sy'n brysur yn gweini paneidiau ar stondin Merched y Wawr, sydd wedi bod dan ei sang heddiw brynhawn heddiw.

Mae awyrgylch braf ar y Maes brynhawn Llun wrth i'r haul wenu.

Mae Lowri, Lisa, Enfys a Kate yn mwynhau eu cinio.

Ac mae'r ddau lywydd yma o undebau myfyrwyr prifysgolion Bangor a Chaerdydd yn ffrindiau…am nawr!

Elan Rowlands a Neil Rayment o stondin Neil Rayment Goldsmiths yw gwneuthurwyr Coron Eisteddfod Genedlaethol Wrecsam.

Eu gobaith ar y diwrnod mawr yw "bydd y Goron yn ffitio a bydd yna deilyngdod."

Mae dylunio'r Goron i Eisteddfod Wrecsam wedi bod yn brofiad emosiynol i Elan gan fod ei thad yn dod o'r Rhos, tu allan i'r ddinas.

Dywed Elan fod y Goron "wedi ei hysbrydoli gan hanes diwydiannol Wrecsam a ffosiliau Brymbo, wnaeth achosi i wythiennau glo gael eu ffurfio yn yr ardal."

Maen nhw hefyd wedi cynhyrchu casgliad o emwaith sydd wedi eu creu o'r un mold a ddefnyddiwyd i greu y Goron.

BBC Radio Cymru

Ffynhonnell y llun, Eisteddfod yr Urdd

Yn wreiddiol o'r Wyddgrug, mae'r actores Isabella Colby Browne yn falch o ddychwelyd yn agos at adref i berfformio Wrecslam!, sef cyfres o bedair drama fer sy'n cael eu perfformio yn yr Eisteddfod eleni.

Fe ddywedodd Isabella wrth Steffan Hughes ar Radio Cymru: "Mae'r dramodwyr mor dalentog, bob un ohonyn nhw, ac mae pob darn mor wahanol, mor ddiddorol â phob un yn topical.

"Maen nhw'n rili doniol ond mae hefyd pethau o ddifri a phethau rili pwysig, felly mae wedi bod yn gymaint o hwyl archwilio nhw i gyd."

Fe enillodd Isabella Fedal Bobi Jones yn Eisteddfod yr Urdd Maldwyn yn 2024, ac eglurodd bod actio yn y Gymraeg wedi bod yn help wrth ddysgu'r iaith.

"Bob sioe dwi 'di gwneud, maen nhw bach yn fwy cymhleth bob tro.

"Mae gwneud sioe fel hon gyda Theatr Cymru sydd mor gyflym a mor snappy a boncyrs... dwi'n barod i fynd."

A ninnau'n agosáu at brif seremoni gyntaf Eisteddfod Genedlaethol Wrecsam, mae 'na giwio mawr y tu allan i'r Pafiliwn.

Ond tybed a fydd teilyngdod heddiw?

Bydd noson i gofio am Dewi Pws ar Faes yr Eisteddfod heno.

Bu un o'i ffrindiau pennaf, Cleif Harpwood yn trafod y noson ar raglen Dros Frecwast.

Dywedodd: "Ro'n i'n teimlo - a'n credu bod pawb yn teimlo - y bydde hi'n syniad da i ddathlu bywyd Dewi mewn rhyw fodd. A dweud y gwir y Steddfod wnaeth ddechrau'r broses.

Wrth sôn am ganeuon eiconig Dewi, dywedodd: "Maen nhw'n fythol yndydyn nhw, bydd pobl yn canu'r rhain hyd at ddiwedd y ganrif gobeithio.

"Roedd cynnwys y caneuon wastad yn ymwneud a Chymreictod a Chymru a diwylliant ac yn blaen.

"Roedd lot o gerddoriaeth Dewi yn gyrru'r chwyldro a'r frwydr genedlaethol 'nôl yn y 70'au a'r 80'au.

Ei neges ydi i bobl ddod i "fwynhau, dewch i ddathlu Dewi drwy nid yn unig ei gofio fe ond trwy fwynhau ei gerddoriaeth ef.

"Roedd yn gredwr mawr o gael y gynulleidfa i fod yn rhan o'r digwyddiad. Dewch â'ch ffonau symudol er mwyn i ni gael goleuo'r noson heno gydag ambell i gân."

Ffynhonnell y llun, Celf Calon

Mae Barddas wedi gosod testunau dydd Mawrth - ydych chi am roi cynnig arni?

Englyn y dydd - Wrecsam

Limrig - yn cynnwys y linell 'Un bore tra'n brysio drwy Brymbo'

Postiwch eich cynigion yn y blwch yn Stondin Barddas, Pabell Cyngor Gweithredu Gwirfoddol Cymru neu eu hanfon at englyn@barddas.cymru / limrig@barddas.cymru

Mae angen i chi wneud hynny erbyn 11:30 ddydd Mawrth. Bydd y feirniadaeth yn cael ei thraddodi am 13:00.