Hefyd yn y gynhadledd i'r wasg y bore 'ma roedd y cyfansoddwr Eilir Owen Griffiths yn sôn am ei gyfansoddiad fydd yn cloi’r nos Sadwrn olaf yn y Pafiliwn.

Mae’n ddarn sy’n seiliedig ar Hen Wlad Fy Nhadau, a gafodd ei gyfansoddi gan y brodyr lleol Evan James a James James.

Mae pedwar o feirdd - Mari George, Christine James, Aneirin Karadog a Delwyn Sion - wedi cyfrannu at y darn, fydd yn cynnwys themâu gwladgarol gan hefyd guddio alawon eraill yn y darn.

Mae ein criw ar y Maes wedi dod ar draws ein cyfaill, y cyflwynydd Tudur Owen.

Mae'n gweithio gydag S4C yr wythnos hon, yn troi at fyd teledu yn hytrach na'i raglen arferol ar BBC Radio Cymru.

Cai ac Efan yn cadw’r maes yn ddiogel y bore 'ma.

Ac o bosib y stondin brysuraf ar y Maes wrth iddi gynhesu - Dŵr Cymru er mwyn ail-lenwi poteli!

Ar raglen Dros Ginio BBC Radio Cymru ddoe, roedd Osian Rowlands, prif weithredwr Menter Iaith Rhondda Cynon Taf yn trafod y defnydd o'r Saesneg sydd i'w glywed ar y Maes.

"Y mwyaf o Saesneg sy’n cael ei glywed ar y Maes y mwyaf o lwyddiant yw’r Steddfod," meddai.

"Mae’n golygu fod y bobl leol a’r rhieni [di-Gymraeg] sydd wedi gwneud y dewis anodd i anfon eu plant i gael addysg Gymraeg... maen nhw wedi dod gyda’u plant.

"Mae’r teuluoedd wedi dod i gefnogi ac i flasu’r cyfoeth sy’n digwydd yma yn y Parc."

Ffynhonnell y llun, Dros Ginio

Mae'r cystadlu'n dechrau ar lwyfan y Pafiliwn am 11:00.

Dyma'r cystadlaethau sydd i ddod dros yr oriau nesaf:

• Deuawd cerdd dant o dan 16 oed - 11:00
• Ensemble lleisiol - 11:20
• Unawd allan o sioe gerdd o dan 19 oed - 11:40
• Monolog 16 ac o dan 19 oed - 12:00

Fe allwch chi wylio'r cystadlu'n fyw ar wefan S4C Clic, dolen allanol.

Ffynhonnell y llun, Eisteddfod Genedlaethol

Mae Tom o Bont-y-pŵl wedi dod i’r Steddfod am y diwrnod.

Mae o bellach yn byw yn Strasbourg yn Ffrainc, ond wedi dod nôl i Gymru am gyfnod i ddianc rhag y gwres yno!

Ond nid pawb sydd ar y Maes i fwynhau yn unig.

Mae Eyobe yn rhan o'r tîm sy'n gweithio i gadw Parc Ynysangharad yn daclus trwy gydol yr wythnos - diolch Eyobe!

Wedi colli canlyniadau'r Pafiliwn ddydd Llun?

Mae'r holl ganlyniadau, a chlipiau o'r cystadlaethau i'w gweld yma.

Fe fydd bwrdd yr Orsedd heddiw yn trafod a ddylid diarddel y cyn-gyflwynydd newyddion Huw Edwards.

Mae'r cyn-ddarlledwr wedi pledio yn euog i dri chyhuddiad o greu lluniau anweddus o blant.

Cafodd Edwards ei dderbyn i’r Orsedd yn Eisteddfod Genedlaethol Ceredigion yn Nhregaron yn 2022.

Dywedodd Christine James, Cofiadur yr Orsedd, nad oes gan y sefydliad "drefn neu beirianwaith benodol i ddiarddel aelodau” ond y bydd y mater yn cael ei drafod heddiw wrth i Fwrdd yr Orsedd gyfarfod ar y Maes.

Ond rydyn ni'n deall na fydd cyhoeddiad na datganiad ar y mater gan fwrdd yr Orsedd heddiw.

Bydd unrhyw benderfyniad yn gorfod cael ei gytuno arno yng nghyfarfod cyffredinol bwrdd yr Orsedd, fydd yn digwydd ddydd Iau.

Ffynhonnell y llun, Aled Llywelyn

Yng nghynhadledd i'r wasg foreol yr Eisteddfod, mae'r pennaeth cyfathrebu Gwenllian Carr yn dweud eu bod nhw wedi cael “diwrnod da iawn eto ddoe”, gan gynnwys gweld “enillydd poblogaidd iawn i’r goron”.

Ychwanegodd ei bod yn “ddiolchgar iawn i bawb” sydd wedi bod yn dilyn y cyfarwyddiadau traffig a theithio hyd yma, er mwyn osgoi tagfeydd ym Mhontypridd.

Ffynhonnell y llun, Eisteddfod Genedlaethol

Yn syml, hyfryd!

Ond os ydy'r rhagolygon yn gywir, gwnewch y mwyaf o'r haul dros y diwrnod neu ddau nesaf - mae hi'n addo glaw mawr ddydd Iau.

Ydych chi'n ymweld â'r Eisteddfod am y tro cyntaf heddiw, neu dros y dyddiau nesaf?

Mae eisteddfodwyr yn cael eu hannog i gyrraedd y Maes ar drafnidiaeth gyhoeddus neu i barcio, os yn gyrru, yn y meysydd parcio a theithio penodol.

Mae Pontypridd yn dref brysur ar y gorau, medd y trefnwyr, a gall traffig fod yn broblem ar ddiwrnod arferol.

Mae anogaeth hefyd i bobl drefnu eu cludiant adref o flaen llaw er mwyn cadw eu hunain ac eraill yn ddiogel.

Mae'r holl fanylion ar sut i gyrraedd y Maes ar gael yma.

Dyma dair sy'n helpu eisteddfodwyr i gyrraedd y Maes y bore 'ma.

Mae Georgia, Lily a Caitlyn yn helpu gyda'r bysiau gwennol o'r Ddraenen Wen, i'r de o Bontypridd.

Diolch iddyn nhw am eu gwaith!

Prif seremoni’r prynhawn yn y Pafiliwn yw cyflwyno Gwobr Goffa Daniel Owen.

Nofel heb ei chyhoeddi gyda llinyn storïol cryf heb fod yn llai na 50,000 gair sydd ei hangen i ennill y wobr.

Y beirniaid eleni yw Catrin Beard, Jerry Hunter a Marlyn Samuel.

Alun Ffred Jones oedd enillydd y gystadleuaeth hon yn Eisteddfod Llŷn ac Eifionydd 2023 am ei nofel 'Gwynt y Dwyrain'.

Yn dilyn y glaw ddoe, mae hi'n wlyb dan droed mewn ambell fan, ond ar y cyfan, mae'r Maes yn edrych yn sych, gyda nifer o lwybrau tarmac ar y Maes ym Marc Ynysangharad.

Dyw'r pyllau dŵr ddim yn debygol o aros am hir chwaith, os ydy hi'n aros mor braf ag ydy hi ar hyn o bryd!

Mewn seremoni emosiynol yn y Pafiliwn brynhawn ddoe cafodd Gwynfor Dafydd ei gyhoeddi fel enillydd y Goron eleni.

Daeth y bardd o Donyrefail i’r brig mewn cystadleuaeth a ddenodd 33 o geisiadau.

Wrth iddo gael ei longyfarch ar y llwyfan gan yr Archdderwydd Mererid Hopwood, cafodd y bardd ei gofleidio gan ei fam, Helen Prosser, cadeirydd Pwyllgor Gwaith yr Eisteddfod eleni.

Mae'n derbyn gwobr ariannol o £750 hefyd, a hynny am bryddest neu gasgliad o gerddi heb fod mewn cynghanedd, hyd at 250 o linellau, ar y pwnc 'Atgof'.

Darllenwch yr adroddiad yn llawn yma.

Ffynhonnell y llun, Eisteddfod Genedlaethol

Bore da a chroeso nôl i'n llif byw o Eisteddfod Genedlaethol Rhondda Cynon Taf!

Mae hi'n dechrau prysuro draw ym Mharc Ynysangharad ym Mhontypridd, felly arhoswch gyda ni am y diweddaraf o'r Maes drwy gydol y dydd.

Ffynhonnell y llun, Eisteddfod Genedlaethol