Rhybudd oren am wyntoedd cryfion mewn grym ar gyfer gogledd Cymru
Miloedd heb drydan yn y gogledd a rhannau o Bowys a Sir Gâr
Cyfoeth Naturiol Cymru wedi cau nifer o ganolfannau ymwelwyr
Rhybudd i yrwyr fod yn ofalus wedi i nifer o goed ddisgyn
Mae rhybudd melyn am wynt hefyd mewn grym ar gyfer gweddill y wlad
A dyna ni gan dîm llif byw Cymru Fyw am heddiw.
Mae'n ymddangos bod Storm Éowyn bellach yn gostegu ond y cyngor o hyd yw i wirio amserlenni cyn teithio a chymryd gofal.
Bydd y diweddaraf ar wefan Cymru Fyw heddiw a gydol y penwythnos.
Diolch am eich cwmni - cadwch yn gynnes ac yn ddiogel.
Yr olygfa yn Aberystwyth fore Gwener
BBC Radio Cymru
Wrth edrych ar dywydd y penwythnos, mae rhagor o rybuddion ar y ffordd yn ôl Robin Owain Jones, cyflwynydd tywydd Radio Cymru.
"Bydd y gwynt yn gostegu'n raddol heno," meddai, "ac fe fydd hi'n noson sych a chlir i'r mwyafrif, gyda dim ond ambell gawod ynysig. Y tymheredd isaf yn radd o dan y rhewbwynt mewn rhai mannau mewndirol, 4 selsiws mewn ambell ardal ger y glannau.
"Dros y penwythnos - sych a braf fory gyda chyfnodau heulog, cyn i fand o law gyrraedd o'r gorllewin yn ddiweddarach.
"Diwrnod gwlyb a gwyntog ddydd Sul, gyda glaw cyson a thrwm yn ymledu o'r de-orllewin yn ystod y dydd - ac mae 'na ragor o rybuddion melyn am wyntoedd cryfion a glaw trwm wedi eu cyhoeddi. Y tymheredd uchaf rhwng pump a naw selsiws."
Mae nifer o fusnesau wedi cau eu drysau yn ystod y bore am nad oedd ganddyn nhw drydan - yn eu plith tafarn y Lion yn Nhudweiliog ond mae'r dafarn wedi nodi ar y cyfryngau cymdeithasol ei bod bellach wedi ailagor.
Dyma'r olygfa ryfeddol ym Mhorthcawl fore Gwener.
Mae'r RNLI yn rhybuddio pobl i beidio mynd yn agos i'r arfordir os yw'r môr yn arw.
Olwen Owen yn cael diod a bwyd cynnes mewn hwb yng Nghaergybi
Un o'r rhai a gollodd y trydan yng Nghaergybi fore Gwener oedd Olwen Owen, 74.
Roedd hi'n un o'r rhai aeth i'r hwb cynnes yng nghaffi Cuffed-in Coffee yn y dre - caffi a oedd yn cynnig diod a bwyd cynnes.
"Dyma'r eildro mewn chwe wythnos iddi golli'r cyflenwad," meddai.
"Dwi ddim yn beio'r bobl trydan. Maen nhw'n gwneud eu gorau.
"Ond mae'n anodd ac yn gyfnod hir i bensiynwr. Mae fy nghartref cyfan yn ddibynnol ar drydan."
Yn y cyfamser roedd Bethan Jones sy'n nain wrth ei bodd yn cael cynnal ysgol yn ei chartref bore 'ma.
Roedd Ysgol Corn Hir a Meithrinfa Medra ar gau i Gruffydd ac Alaw, ac mae eu cyfneitherod, Weronika Dwynwen a Liwia Gwenllian yno ar wyliau o Wlad Pwyl.
Ffynhonnell y llun, Bethan JonesRoedd Bethan Jones wrth ei bodd yn cael cynnal ysgol yn ei chartref bore 'ma
Am 12:00 roedd y National Grid yn adrodd bod 702 o gwsmeriaid yn parhau heb drydan yn ne a gorllewin Cymru.
Yn gynharach fe ddywedodd cwmni Scottish Power bod 5,000 heb drydan yn rhanbarth ManWeb - rhanbarth sy'n cynnwys gogledd a chanolbarth Cymru a rhannau o lannau Mersi a Sir Gaer.
Dywed y cwmni eu bod yn gwneud eu gorau i adfer y cyflenwad ond bod cryfder y gwynt yn gwneud y gwaith yn anodd.
Am 12:30 roedd problemau yn parhau yn ardaloedd Bangor, Deiniolen a Bethesda yng Ngwynedd ac ar Ynys Môn roedd problemau o hyd yng Nghaergybi, Dwyran, Moelfre ac Amlwch.
Y cyngor i bobl sydd heb gyflenwad yw i fod yn amyneddgar ac os ydych am roi gwybod am ddiffyg cyflenwad rhif y llinell gymorth frys yw 105.
Dywed Gwasanaeth Tân ac Achub Canolbarth a Gorllewin Cymru eu bod wedi bod yn brysur gydol y bore yn delio ag adeiladau sydd wedi'u heffeithio gan y storm.
Roedd yna ddifrod i do adeiladau yn Johnston yn Sir Benfro, tŷ yn Y Cymer ac adeilad ar Broad Street yn Llanfair-ym-Muallt.
Ffynhonnell y llun, Melanie SharpBudi yn cysgodi rhag y tywydd gwael
Mae'r Sw Fynydd Gymreig ym Mae Colwyn ar gau gydol y dydd.
Eglurodd Steven Lester, Cyfarwyddwr Datblygu Busnes a Gweithrediadau’r Sw Fynydd Gymreig: "Cau oedd yr unig opsiwn heddiw yn sgil y tywydd a hynny er lles ein hanifeiliaid, y staff ac ymwelwyr.
“Mae mis Ionawr, hyd yn hyn, wedi gweld sawl achos o dywydd garw ac anffafriol, ac wedi arwain at gau’r sw dros sawl diwrnod – penderfyniadau dydyn ni byth yn eu gwneud yn ysgafn.
"Mae hyn nid yn unig yn effeithio ar y refeniw hanfodol sy'n helpu i'n cefnogi fel sw ac elusen, mae hefyd yn effeithio ar y gwesteion niferus a oedd yn edrych ymlaen at ddiwrnod allan gwych gyda ni.
"Gyda’r argyfwng hinsawdd byd-eang yn dod â digwyddiadau tywydd eithafol mwy rheolaidd yn ei sgil, mae’n bwysig yn awr yn fwy nag erioed ein bod yn cymryd amser i fyfyrio ar y materion hyn a deall yr effaith y mae pob un o’n gweithredoedd yn ei chael ar yr amgylchedd, gan gydweithio yn y dyfodol i amddiffyn ein cymunedau a’r byd yn gyffredinol.”
Ffynhonnell y llun, Melanie SharpMae'r sw ar gau heddiw ond dywed y cyfrawyddwr bod yr anifeiliaid yn cael pob gofal
Mae James Pascall yn gweithio yng nghaffi Cuffed-in Coffee ar Stryd y Farchnad Caergybi - lle sydd hefyd wedi cael ei ddynodi yn hwb cadw'n gynnes.
Mae'r ymateb bore 'ma wedi bod yn "anhygoel", meddai.
"Ry'n ni'n cydweithio â Scottish Power er mwyn sicrhau fod pobl sydd heb drydan yn cael rhywbeth i'w fwyta.
"Mae'r lle hefyd yn cynnig cynhesrwydd. Dwi'n siŵr y byddai'n well gan bobl fod adre' ond o leia mae'n rhywle iddynt fod."
Bethan Clement
Gohebydd Chwaraeon BBC Cymru
Does dim newid i gemau tîm hoci iâ Devils Caerdydd sy'n chwarae dwy gêm yn y Gynghrair Elit y penwythnos hwn.
Maen nhw oddi cartref yn erbyn Fife Flyers yfory, cyn hedfan 'nôl i Gymru ar gyfer eu gêm yng Nghaerdydd yn erbyn Belfast Giants ddydd Sul.
Er bod y gêm yn Yr Alban yn mynd yn ei blaen, maen nhw wedi gorfod newid eu cynlluniau teithio - gyda'u hediad i Gaeredin heno wedi'i ganslo. Bydd y garfan nawr yn teithio heddiw ar fws.
Am 11:00 roedd y tymheredd wedi codi i 7 gradd selsiws yng Nghaergybi ond mae'n parhau yn wyntog.
Dyma'r olygfa bellach.
Mae yna rybudd gan Wylwyr y Glannau i beidio mentro'n agos i'r tonnau ac ardaloedd arfordirol os yw hi'n stormus.
Ffynhonnell y llun, BBC Weather WatchersMae'r gêm yn y Cymru Premier heno rhwng Caernarfon a'r Seintiau Newydd wedi cael ei gohirio o ganlyniad i'r tywydd.
Does dim manylion pellach hyd yma pa bryd y caiff y gêm ei chwarae. Hon fyddai'r gêm gyntaf i'r ddau dîm yn y Chwech Uchaf ers i'r gynghrair gael ei hollti'n ddwy.
Gogledd a Gweriniaeth Iwerddon a'r Alban sydd wedi cael eu taro waethaf y tro hwn.
Yn Galway mae cyflymder gwynt o 114mya wedi ei gofnodi - y cyflymder mwyaf i'w gofnodi yng Ngweriniaeth Iwerddon erioed.
Dyma'r difrod yno.
Ffynhonnell y llun, PA MediaY difrod yn Galway yn Iwerddon
Roedd tonnau mawr i'w gweld ar y prom yn Aberystwyth y bore 'ma, ond y cyngor yw i gadw pellter o'r môr.
Mae tafarn y Lion yn Nhudweiliog wedi cau am y tro am nad oes ganddyn nhw drydan.
Yn gynharach roedd neges gan y Post yn Nhudweiliog yn hysbysu pobl bod y siop wedi gorfod cau am 11:00 am nad oedd ganddyn nhw drydan.
Mae ysgol George, 11, yng Nghaergybi ar gau heddiw a does ganddo ddim trydan adref.
Fe wnaeth e hefyd orfod dod adref o drip ysgol i Langrannog yn gynnar yn sgil pryderon am groesi'r bont i ddychwelyd adref.
Gobeithio fod paned gyda'i ewythr a'i fodryb - Hywel a Mandy Jones - mewn caffi lleol yn codi ei galon!
Mae Trafnidiaeth Cymru a Network Rail yn annog y cyhoedd "yn gryf" i wirio amserlenni cyn teithio ar drên neu fws ddydd Gwener a dechrau'r penwythnos ac maen nhw'n rhybuddio pobl i "ddisgwyl oedi a newidiadau ".
Mae Network Rail bellach wedi gohirio gwasanaethau i'r gorllewin o Abertawe ar ôl i goeden ddisgyn ar y lein.
Mae Trafnidiaeth Cymru hefyd wedi gohirio'r gwasanaeth rhwng Canol Wrecsam a Bidston.
Roedd Pontiets yn Sir Gâr yn un o'r ardaloedd a gollodd eu cyflenwad trydan y bore 'ma ond y newyddion da yw bod y trydan yn ôl.
Llyr Edwards
Gohebydd BBC Cymru
Roedd yr A494 rhwng Llanuwchllyn a chanolfan Yr Urdd, Glanllyn ar gau am ychydig oriau'r bore 'ma ar ôl i goeden anferth syrthio yn y gwynt.
Mae'r goeden bellach wedi'i chlirio a'r ffordd wedi ailagor.
Rhywfaint o dywydd gwell i ddod - medd y cyflwynydd Rhian Haf
Rhagolygon y tywydd gan Rhian Haf