Mae'n gohebydd yn y gogledd Carwyn Jones wedi cadarnhau fod pob ysgol ar Ynys Môn ar gau heddiw.

Dywed y Cyngor Sir fod teuluoedd wedi cael gwybod.

Mae Storm Éowyn ar ei gwaethaf yn Ngogledd Iwerddon a rhannau o'r Alban.

Mae Cyfoeth Naturiol Cymru wedi dweud y bydd eu canolfannau ymwelwyr ynghau ddydd Gwener, gan annog pobl i "osgoi teithio i'n coedwigoedd a'n gwarchodfeydd".

"Mae'r gwyntoedd cryfion a ddisgwylir gyda Storm Éowyn, wedi'i waethygu gan y difrod a achoswyd eisoes gan Storm Darragh, yn cynyddu'n sylweddol y perygl o goed a changhennau yn cwympo yn yr ardaloedd hyn," meddai llefarydd.

"Bydd y canolfannau ymwelwyr yng Nghoed y Brenin, Bwlch Nant yr Arian, ac Ynyslas, yn ogystal â Gwarchodfa Natur Genedlaethol a Choedwig Niwbwrch, ar gau ddydd Gwener."

Ffynhonnell y llun, Cyfoeth Naturiol Cymru

Mae gwefan Cyngor Gwynedd yn nodi bod 52 ysgol ar gau yn y sir.

Y cyngor yw i rieni wirio'r wefan, dolen allanol.

Mae nifer o athrawon wedi penderfynu dysgu ar-lein neu wedi darparu gwaith o flaen llaw i ddisgyblion.

Cyngor Ynys Môn

Mae ffordd yr A545 rhwng Allt Cichle a Fflatiau Glyn Garth ar gau gan bod coeden wedi disgyn ar draws y ffordd. Mae’n debyg y bydd y ffordd ar gau tan ddydd Sadwrn.

Mae ffordd y B5109 o Fiwmares i Lansadwrn wedi cau'n rhannol gan fod coeden wedi disgyn.

"Rydym yn gosod goleuadau traffig yno er mwyn diogelu gyrwyr," medd llefarydd.

Mae Canolfan Hamdden Caergybi wedi rhoi neges ar y cyfryngau cymdeithasol yn dweud y byddan nhw ar gau tan hanner dydd gan nad oes ganddyn nhw drydan.

Mae nhw'n ymddiheuro am yr anghyfleustra ac yn dweud y byddan nhw'n diweddaru'r wybodaeth yn ystod y bore.

Yn ôl gwefan MeteoGuard - arbenigwyr tywydd - yn Aberdaron mae'r hyrddiadau uchaf wedi bod hyd yma sef 93mya.

Roedd cryfder y gwynt yn 86mya yn Llanwddyn / Llyn Efyrnwy am 05:00 bore 'ma ac yn 88 mya yng Nghapel Curig am 04:00.

Mae nifer o ysgolion wedi dewis peidio agor heddiw ond mae yna drefniadau gwahanol "er mwyn lleihau'r tarfu ar ddysgu" gan gynnwys adnoddau ar-lein a phecynnau gwaith pwrpasol.

Mae rhieni yn cael eu cynghori i edrych ar wefannau eu cynghorau lleol i weld beth yw'r sefyllfa ddiweddaraf yn ysgolion eu plant.

Heddlu Dyfed Powys

Mae Heddlu Dyfed-Powys yn rhybuddio bod cyflwr y "ffyrdd yn wael iawn" wedi i nifer o goed ddisgyn yn sgil Storm Éowyn.

Mae Pont Cleddau rhwng Doc Penfro a Neyland ar gau i gerbydau uchel.

Does dim llongau yn hwylio rhwng rhwng Abergwaun a Rosslare.

Yn ôl gwefan Scottish Power Energy Netwoks dyma'r rhannau o Ynys Môn a Gwynedd sydd heb drydan o ganlyniad i'r storm.

Mae ysgolion yn Ynys Môn a Gwynedd wedi cadarnhau nad ydyn nhw ar agor yn sgil y rhybuddion am dywydd garw.

Mewn llythyr at rieni a gofalwyr mae penaethiaid pob ysgol gynradd yn nalgylchoedd ysgolion uwchradd Caergybi, Amlwch, Bodedern a Llangefni, dolen allanol wedi rhoi gwybod eu bod ar gau am y diwrnod oherwydd Storm Éowyn.

Yng Ngwynedd, dolen allanol, mae rheolwyr Ysgol Syr Hugh Owen, Ysgol Pendalar ac Ysgol Maesincla yng Nghaernarfon, Ysgol Tryfan ym Mangor, ac Ysgol Brynrefail, Llanrug hefyd wedi cadarnhau nad yw'r ysgol ar agor i ddisgyblion ddydd Gwener.

Dywed cwmni y National Grid bod 2,264 o gwsmeriaid heb drydan am 06:30 bore 'ma.

Ymhlith yr ardaloedd sydd wedi'u taro waethaf mae Pontiets yn Sir Gaerfyrddin ac ardal Aberllynfi ym Mhowys.

Dywed cwmni Scottish Power bod nifer eisoes heb drydan yn y gogledd - gan gynnwys yr ardaloedd o gwmpas Ysbyty Gwynedd ym Mangor, Bethesda, Tregarth, Llanbedr, Blaenau Ffestiniog a Phorthaethwy.

Mae rhybuddion Storm Éowyn bellach mewn grym.

Fe ddaeth y rhybudd oren am wynt i siroedd y gogledd i rym am 06:00 ac fe fydd yn weithredol tan 21:00 nos Wener.

Mae rhybudd melyn am wynt hefyd mewn grym ar gyfer gweddill y wlad a rhybudd am law yn y de.

Mae disgwyl hyrddiadau o hyd at 70mya yn gyffredinol, a hyd at 90mya ger yr arfordir ac ar dir uchel.

Mae'n gohebwyr eisoes allan - arhoswch gyda ni am y diweddaraf.

Ffynhonnell y llun, Swyddfa Dywydd