Ysgol Morgan Llwyd yw'r unig ysgol uwchradd Gymraeg yn y ddinas, ac mae nifer o'r disgyblion wedi bod wrthi'n brysur yn paratoi at yr ŵyl.

Mae Owain a Rhys o flwyddyn 9 yn edrych ymlaen at yr wythnos fawr, wedi misoedd o waith codi arian.

Mae Owain o'r farn bydd yr Eisteddfod yn "agoriad llygad i'r plant, achos dy'n nhw ddim yn gwybod be 'di Steddfod - dim jyst cystadlu 'de, mae 'na fwy iddo fo."

Ychwanegodd Rhys eu bod wedi cynnal twmpath i godi arian yn ddiweddar yn ogystal â threfnu dyddiau di-wisg ysgol.

"Dwi am fynd un neu ddau o'r diwrnodau dwi'n meddwl, a dwi'n edrych ymlaen at y bwyd yno."

Mae Bar Williams Parry ar agor ers 11 a'r gweinyddion yn barod i groesawu ymwelwyr sychedig i'r Steddfod.

Roedd y criw yma'n ymlacio ar ôl cystadlu gyda Band Pres Dinas Wrecsam.

Mae'n ddigwyddiad teuluol i Ian a'i blant Ieuan ac Eleri. Mae Ian a Ieuan yn chwarae'r ewphoniwm tra bod Eleri yn chwarae'r ffiwgl.

Yn ôl Ian "roedd yn bwysig iddyn nhw fel band gefnogi'r Eisteddfod sydd ar eu stepen drws" a bydd y band cystadlu eto yfory yn y gystadleuaeth agored.

Dywedodd Betsan Moses, Prif Weithredwr yr Eisteddfod eu bod wedi gorfod gwneud 'addasiadau' eleni oherwydd heriau ariannol.

Pan gafodd ei holi faint o arian sydd wedi ei godi, dywedodd: “O ran y Sadwrn cyntaf, dyw e ddim yn briodol i ni ddweud oherwydd ni’n gwybod bod yr arian yn dal i ddod i fewn.

"Targed ar gyfer y Pwyllgor Gwaith oedd e (y £400,000), nid rhywbeth ni’n rhannu.

"Targed ar gyfer ein cynllunio ac wrth gwrs be’ ni wedi ‘neud yw edrych ar ein cynllunio a gwneud addasiadau i sicrhau bod y ‘Steddfod yn talu am ei hun.”

Tybed ai Elinor Davies sydd wedi teithio bellaf i fod ar Faes yr Eisteddfod yr wythnos hon?

Mae stondin Olew yn cynnig gwasanaeth torri gwallt a steilio ar y Maes.

Elinor yw cyfarwyddwr y cwmni ac mae'n byw yn Dubai, ond mae'n dychwelyd i Gymru bob blwyddyn i gynorthwyo ar stondin Olew.

Bu Elinor yn siarad â Cymru Fyw yn ddiweddar am bwysigrwydd trosglwyddo'r Gymraeg i'w merch Ela, er eu bod yn byw ben arall y byd.

Mae Tim, Martha a'u merched Issy a Milly yn byw'n agos i Faes yr Eisteddfod a dyma'r tro cyntaf iddyn nhw ymweld â'r Brifwyl.

Eu hargraffiadau cyntaf yw fod yr "Eisteddfod yn anhygoel" ac maen nhw'n edrych ymlaen at ddiwrnod arall yn barod.

Roedd Nedw a Greta yn edrych ymlaen at ffeindio stondin i liwio ar ôl i Mam a Dad gael gwylio Band Pres Deiniolen yn cystadlu yn Y Pafiliwn.

Yr actor Mark Lewis Jones yw Llywydd yr Ŵyl eleni, ac mae'n edrych ymlaen yn fawr at yr wythnos.

Dywedodd: "Mae'n teimlo yn sbeshal yn barod, 'da ni yma o'r diwedd."

Bydd araith Llywydd yr Ŵyl yn cael ei chynnal yn y Pafiliwn amser cinio.

Mae Stifyn Parri hefyd yn frodor lleol ac wrth ei fodd yn gweld yr Eisteddfod yn ei filltir sgwâr.

"Dropiwch bob dim 'da chi’n ei wneud a dewch i’r Steddfod rŵan, mae’n blincin lyfli yma," meddai.

Bydd Stifyn yn perfformio nos Iau am 21:00 yn 'Steddfod Stifyn'.

Dewch i adnabod mwy o enwogion yr ardal yn ein cwis arbennig.

Mae cyrraedd targed ariannol ar gyfer yr Eisteddfod eleni 'wedi bod yn her' yn ôl Llinos Roberts, Cadeirydd Pwyllgor Gwaith y Brifwyl.

"Mae'n rhaid cyfaddef ei bod wedi bod yn her. Dwi'n meddwl lle ryda ni ar hyn o bryd yn y byd, mae elusennau yn cael llawer o drafferthion i godi arian. Mae pethau fel Covid a Brexit yn golygu bod dim cymaint o arian o gwmpas a oedd rhai blynyddoedd yn ôl."

Er gwaethaf yr heriau dywedodd ei bod wrth ei bodd fod yr wythnos fawr wedi cyrraedd, a fod y criw "wedi cael llawer o hwyl" wrth gynnal digwyddiadau amrywiol.

Fe fydd yr ymdrechion i godi arian yn parhau yn ystod yr wythnos, gan gynnwys gwerthu crysau-t arbennig ar y cyd â Chlwb Pêl-droed Wrecsam.

Mae’n ddiwrnod y bandiau pres ac mae 'na reolau arbennig i’r cystadleuwyr sy’n debycach i fyd pêl-droed y Cae Ras na’r byd Eisteddfodol - gydag aelodau yn ‘arwyddo’ a chael eu ‘trosglwyddo’.

Yn unol â rheolau sy'n gyffredin mewn cystadlaethau bandiau pres eraill, cyn camu ar y llwyfan mae’n rhaid i bob aelod gael cerdyn cofrestru Cymdeithas Bandiau Pres Prydain, sy’n debyg i basbort efo’ch llun a’ch manylion arno.

Fel yn y byd pêl-droed, mae chwaraewyr pres yn gallu mynd ‘ar fenthyg’ i fand arall. Mae hyn yn helpu bandiau allan o dwll os nad ydyn nhw’n gallu cael band llawn at ei gilydd.

Fel gyda phêl-droed, mae’n rhaid cael gwisg briodol, mae 'na uchafswm i faint sy’n cael chwarae, ac mae’r bandiau wedi eu rhannu i ddosbarthiadau yn ôl eu safon.

Fel gyda chynghreiriau pêl-droed maen nhw’n gallu cael dyrchafiad neu ostwng dosbarth ar ddiwedd y tymor.

Mae’n rhaid chwarae am gyfnod penodol o amser hefyd neu fe gaiff y band ei gosbi. Ond yn wahanol i bêl-droed does 'na ddim amser ychwanegol - na chiciau o'r smotyn.

Mae ategolion a sgarffiau ar werth ar stondin Merched y Wawr, gyda'r elw yn mynd at elusen Ambiwlans Awyr Cymru.

Allwch chi adnabod yr Archdderwydd Mererid Hopwood yn y gwaith yma gan Eurwen Lloyd o Ruthun?

Wrth annerch y wasg ar ddiwrnod cynta'r Eisteddfod, dywedodd Betsan Moses ei bod hi'n "argoeli i fod yn Steddfod a hanner".

Dywedodd fod yr Eisteddfod i gyd ar "lain o dir lle mae'n lapio ei gilydd, felly ewch chi o Maes B draw i Hwyrnos, i'r meysydd parcio a charafanau ac mae'r maes ei hun yng nghalon yr holl beth".

"Mae pob dim yn mynd yn dda," meddai.

Ychwanegodd Gwenllian Carr, Cyfarwyddwr Strategol: "Mae wedi bod yn ddwy flynedd o waith caled a hapus ac mae’n braf iawn bod y diwrnod wedi cyrraedd."

Tudur Owen sy’n crwydro’r Maes ar ran S4C, ac i stondin Menter yr Iaith aeth ar ei ymweliad cyntaf o'r wythnos.

Bu’n sgwrsio â Maiwenn Berry o Fenter Iaith Flint a Wrecsam, wnaeth egluro fod yr Eisteddfod yn ymweld â’r ardal yn ystod cyfnod cyffrous.

“Gyda chyffro’r Cae Ras a chais y ddinas ar gyfer Dinas Diwylliant 2025 mae lot o falchder a mwy o ymdeimlad o berthyn efallai.

"Mae mwy o fwrlwm o mwy o weithgarwch Cymraeg yn rhan o hynny.”

Mae gan Menter Iaith Fflint a Wrecsam lu o weithgareddau ar y gweill yn ystod yr wythnos gan gynnwys Llwybr y Lleidr, sef helfa gliwiau i'r teulu o amgylch y maes i ddatrus dirgelwch Cwpan Cysyllte.

Gallwch wylio S4C yn fyw yma.

Mae'r bysiau gwennol yn rhedeg rhwng 08:00 - 23:00 pob dydd.

Mae'r holl fanylion isod a mwy o wybodaeth am sut i gyrraedd y Maes yma.

Mae'r bandiau pres wedi cyrraedd y Maes ar ddiwrnod cynta'r cystadlu.

Mae digon o ddewis o fwyd a diod ar y maes, ond y cwestiwn mawr ydi - smwddi neu losin i frecwast?

Ydych chi wedi gweld y neges yma wrth gyrraedd y maes?

Roedd Anweledig yn un o fandiau Cymraeg mwyaf poblogaidd y 90'au a 00'au ac mae'r criw o Flaenau Ffestiniog wedi ail-ffurfio i gloi arlwy Llwyfan y Maes nos Wener eleni.

Daw geiriau'r arwydd uchod o'r gân Eisteddfod gan y band. Yn yr Eisteddfod, ie!

Bydd seremoni Medal y Dramodydd yn cael ei chynnal ddydd Iau - a hynny dan drefn newydd o gystadlu a gafodd ei datblygu cyn Eisteddfod 2024.

Mae'r panel beirniad yn cynnwys wyth o bobol o sefydliadau theatr Cymru a'r dasg oedd cynnig braslun stori a deialog neu ddrafft o ddrama gyflawn.

Mae'r gystadleuaeth wedi'i datblygu'n sylweddol ers cyn Eisteddfod 2024 a hynny wedi ei amlinellu yn Rhestr Testunau Eisteddfod Wrecsam.

Mi gafwyd ugain cais eleni, sy'n fwy na'r arfer, ac yn dystiolaeth yn ôl y Steddfod bod y newid yn gweithio.

Fe wnaeth Rob McElhenney ymuno â'r newyddiadurwraig Maxine Hughes i ymarfer ei Gymraeg cyn dechrau'r Eisteddfod Genedlaethol yn Wrecsam, ac roedd ganddo hefyd neges arbennig i ymwelwyr y ddinas.

Gwyliwch isod.

Yr wythnos yma bu Cymru Fyw yn siarad â phobl ardal Wrecsam am eu gobeithion ar gyfer yr Eisteddfod Genedlaethol.

Cafodd tafarn a chanolfan gymunedol Saith Seren ei sefydlu yn dilyn yr Eisteddfod ddiwethaf yn y ddinas yn 2011. Meddai Marc Jones, aelod o fwrdd y fenter:

"Un o'r pethau 'da ni'n gofyn amdano yn y Steddfod yma, ydi os ydi pobl yn meddwl bod nhw isio i Saith Seren barhau, bod nhw'n gwneud cyfraniad... mae hwnna'n cadw ni i fynd a bod yn onest.

"'Da ni 10 milltir o'r ffin yn fa'ma, 'da ni yn ganol dref, mae 'na lot o lefydd eraill i fynd i yfed a chymdeithasu, felly mae'n struggle, mae'n dipyn o gamp bo ni yma o hyd.

"Ond 'da ni isio bod yma tan mae'r Steddfod nesa yn dod i Wrecsam."

Darllenwch fwy yma.

Bydd y cerddor Gwilym Bowen Rhys yn beirniadu cystadleuaeth 'Ar ei newydd wedd' ar lwyfan Encore am 10.30.

Ond mae angen torri syched yn y stondin coffi a siocled poeth cyn beirniadu!

Mae Gareth Williams o’r Wyddgrug yn falch iawn fod yr Eisteddfod wedi dod i Wrecsam.

Mae'n gefnogwr brwd o dîm pêl-droed Wrecsam ac roedd ei dad-yng-nghyfraith, y diweddar Dai Davies, yn chwarae yn y gôl.