Mae cystadlu'r dydd wedi dechrau yn y Pafiliwn.

Gallwch wylio'n ddi-dor yma neu ar wasanaeth S4C Clic.

Yn hwyrach heddiw bydd Cymru Fyw yn cyhoeddi uchafbwyntiau a chanlyniadau'r dydd.

Bu John Davies, cadeirydd pwyllgor gwaith Eisteddfod Genedlaethol Sir Benfro yn siarad ar raglen Dros Frecwast bore heddiw.

Gan edrych ymlaen at 2026, meddai:

"Mae pob ardal yn rhoi stamp ei hunan ar yr Eisteddfod, a dyna beth byddwn ni yn ceisio efelychu - y stamp unigryw hynny fyddwch chi’n ei gael o groeso pan fyddwch chi yn dod i'r de orllewin.

"Wrth gwrs, mae hi'n unigryw oherwydd ei bod yn Sir Benfro ond ry'n ni hefyd yn estyn allan i'n cymdogion yng Ngheredigion a gorllewin Sir Gar hefyd."

"Dyna beth bydd yn wahanol pan byddwn ni'n dathlu 850 mlwyddiant...carreg filltir enfawr yn hanes a chyd-destun Eisteddfod Genedlaethol Cymru."

"Yn bersonol i mi, roedd hi'n gôl ro'n i am gyflawni cyn gorffen fy nyletswydd fel cynghorydd Sir diwedd y tymor hwn."

Mae darlledu'r dydd wedi dechrau ar BBC Radio Cymru.

Gallwch wrando'n fyw yng nghwmni Shân Cothi, Aled Hughes a Ffion Dafis ar frig y dudalen hon.

A fydd teilyngdod heddiw? Dyna'r cwestiwn mawr ar y Maes y bore 'ma wrth i bawb edrych ymlaen at seremoni'r Cadeirio'r pnawn 'ma.

Beirniaid y gystadleuaeth eleni yw Peredur Lynch, Menna Elfyn a Llŷr Gwyn Lewis.

Roedd gofyn i ymgeiswyr gyfansoddi awdl neu gasgliad o gerddi mewn cynghanedd gyflawn ar fwy nag un o'r mesurau traddodiadol ar y testun 'Dinas'.

Mae'r Gadair eleni wedi'i dylunio a'i chreu gan Gafyn Owen a Sean Nelson. Dywedodd Gafyn, sy'n dod o Fangor: "Mae pedwar prif nodwedd, sef hanes pyllau glo Wrecsam, pont ddŵr Pontcysyllte, bragdai'r ddinas a'u cariad at y tîm pêl-droed yn sail i'r cynllun, ac wedi ysbrydoli ein taith ddylunio i greu'r braslun."

Carwyn Eckley enillodd y Gadair ym Mhontypridd y flwyddyn ddiwethaf ac ef fydd yn cyfarch y bardd buddugol (os bydd un) heddiw. Mwy yma.

Ffynhonnell y llun, Eisteddfod

Cafodd Y Doctor Cymraeg, sef Stephen Owen Rule ei urddo i Orsedd Cymru yn ystod y seremoni.

Mae ganddo dros 80,000 o ddilynwyr ar-lein ble mae'n cynnig gwersi Cymraeg cyflym. Derbyniodd glod gan Orsedd Cymru am ei angerdd diflino wrth hyrwyddo'r iaith.

Tybed a'i dyma'r tro cyntaf i ddau efaill gael eu hurddo ar yr un diwrnod?

Mae'r David a Nigel Aykroyd yn rhedeg cwmni dillad sy'n gyflogwr mawr yn ardal y Bala, ac wedi gwneud cyfraniad sylweddol tuag at Clwb Pêl-droed Y Bala yn enwedig.

Yn siarad ag Aled Hughes ar BBC Radio Cymru ddoe, meddai Lili o Glwb Pêl-droed Wrecsam am y seremoni:

"Lili Ferch Gareth fydd fy enw barddol, er cof am Dad. Bydd yn neis mynd â Dad efo fi drwy'r daith nesaf yma a chadw ei enw yn fyw.

"Mae cael cario ei enw efo fi yn beth arbennig iawn a'n rhywbeth y gwna'i ddal yn agos at fy nghalon."

Darllenwch fwy am Lili yma.

Rhun ap Iorwerth yw arweinydd Plaid Cymru ac mae'n derbyn y wisg las heddiw.

Mae'n 100 mlynedd ers sefydlu'r blaid yr wythnos hon.

Mae'r seremoni wedi dechrau...

Yr Archdderwydd, Mererid Hopwood yn cyrraedd Cylch yr Orsedd ar gyfer y seremoni.

Jessica Robinson oedd y cynrychiolydd cyntaf i gyrraedd rownd derfynol Canwr y Byd am 20 mlynedd a'r Gymraes gyntaf yn hanes y gystadleuaeth.

Bu'n cystadlu yn yr Eisteddfod am flynyddoedd, a llwyddo yng nghystadlaethau Eisteddfodau'r Genedlaethol a'r Urdd.

Meddai wrth Cymru Fyw cyn y seremoni: "Mae’n fraint. Mae’n deimlad mor ffantastig, ac i rannu’r diwrnod heddiw gyda fy nhad yng nghyfraith sydd hyd yn oed yn fwy sbesial - fod y ddau ohonon ni yn cael ein derbyn.

"Mae'n hyfryd ac mae’r haul yn edrych lawr arnom ni."

Tad yng nghyfraith Jess yw'r cerddor Geraint Cynan, sydd hefyd yn cael ei anrhydeddu gan Orsedd Cymru heddiw.

Mae aelodau newydd ar fin cael eu croesawu i Orsedd Cymru, a tipyn o gyffro ar y Maes.

Caiff Ceinwen Parry ei hurddo am ei gwaith yn hyrwyddo'r Gymraeg a'i diwylliant yn ei hardal.

Bu’n ysgrifennydd Eisteddfod Gadeiriol Treuddyn ers 1985 ac mae hi wedi cefnogi ymdrechion i godi arian pan fo'r Eisteddfod Genedlaethol wedi ymweld â'r Wyddgrug.

Fe ddywedodd wrth Cymru Fyw ei bod yn 'anrhydedd' cael ei hurddo i Orsedd Cymru.

Ymhlith yr enwau cyfarwydd eleni mae un o ddarlledwyr mwyaf adnabyddus y Gymraeg, Dewi Llwyd, sy'n derbyn y wisg las.

Meddai cyn y seremoni: "Mae’n brofiad hyfryd iawn, yn enwedig i rywun sydd wedi bod yn cyflwyno yn y Steddfod ers blynyddoedd lawer.

"Dyma’r anrhydedd fwyaf gall Cymro Cymraeg ei derbyn felly dwi’n hynod ddiolchgar.

"Dwi’n diolch i fy nheulu ond hefyd i’r gwylwyr sydd wedi bod mor deyrngar. Dwi’n sefyll yn y fan hon oherwydd eu cefnogaeth hwy."

Mae'n fore mawr i'r unigolion fydd yn cael eu anrhydeddu gan Orsedd Cymru heddiw.

Mae'r haul yn disgleirio ar y Maes a chyffro mawr cyn cynnal y seremoni am 10:00.

Dywedodd Mark Lewis Jones, Llywydd yr Ŵyl eleni wrth Cymru Fyw "Dwi wedi cael wythnos i'r brenin a heddiw yn topio fo i gyd... dwi wrth fy modd yma."

Yn ôl un cerddor ifanc, mae'r cyfle i berfformio yn y Brifwyl yn "agor drysau" i fandiau ifanc

Dywedodd Efan Williams o'r band Dadleoli ei fod yn un o'r "profiadau gorau" canu gyda'r band yn yr Eisteddfod.

Bwncath fydd yn cloi arlwy Llwyfan y Maes ar nos Sadwrn olaf yr Eisteddfod, y tro cyntaf iddyn nhw wneud hynny, ac mae'n "uchafbwynt" yn ôl y prif leisydd.

Darllenwch fwy yma.

Ffynhonnell y llun, Ceiriosphotos

Wyddoch chi mae yr Eisteddfod Genedlaethol yw trydydd darllediad allanol mwyaf y BBC pob blwyddyn?

Yn gynharach yn yr wythnos fe eglurodd Jennifer Jones fwy...

Ar ddydd y Cadeirio, dewch i ddarganfod hanes rhyfeddol Cadair Eisteddfod 1933 yma.

Roedd gwledd o gystadlu yn y Pafiliwn brynhawn ddoe a gallwch wylio uchafbwyntiau ar ein tudalen ganlyniadau.

Enillwyr cystadleuaeth olaf y dydd, sef Gwobr Lois Blake oedd Dawnswyr Nantgarw.

Llongyfarchiadau!