Thathar a' comharrachadh 50 bliadhna de Chomhairle nan Eilean Siar
Thòisich an t-ùghdarras ionadail gu h-oifigeil air an 16mh den Chèitean 1975
Tha leabhar ga chur air bhog an-diugh gus a' chlach-mhìle a chomharrachadh
Thuirt feadhainn a bh' ann ann an làithean tràth an ùghdarrais gun do rinn e feum
Ach tha àrd-oifigear CnES san là a th' ann ag ràdh nach eil cùisean mar a tha iad seasmhach is gu bheil feum a-nise air "coimhead air modailean ùra"
Thuirt Malcolm Burr gum bu chòir coimhead ri modail nas amalaichte is aona ùghdarras gus seirbheisean a lìbhrigeadh gu h-ionadail
Agus a' bruidhinn air Aithris na Maidne, thuirt iar-cheannard an ùghdarrais ionadail "nach eil teagamh sam bith nach fheum dreach ùr tighinn air Comhairle nan Eilean agus air an roinn phoblaich ann an Alba".
Sin e bho 9gu10 ma-thà is sin e bhuainne an seo cuideachd, an-dràsta co-dhiù!
Ach gheibh sibh barrachd mu cho-là breith na Comhairle air BBC Naidheachdan tron là, air Aithris an Fheasgair air BBC Radio nan Gàidheal aig 5f agus air An Là air BBC ALBA a-nochd aig 7f.
Tha na dùbhlain ann ma-thà is deasbad air mar bu chòir dèiligeadh riutha.
An e ùghdarras singilte an fhreagairt? 'S e tìde a dh'innseas.
Ach tha e follaiseach cuideachd gu bheil aithne ann gu bheil stèidheachadh Comhairle nan Eilean Siar air feum a dhèanamh do mhuinntir an àite bho 1975 is air deamocrasaidh ionadail a thoirt nas fhaisge air na daoine.
Mar a chuir Sandy MacMhathain e: "Thug e còmhla tòrr dhaoine diofraichte a bha comasach air faighinn seachad air eadar-dhealachaidhean beaga gus trioblaidean mòra fhuasgladh".
'S e sin a tha fa-near do chomhairlichean an là an-diugh, tha fios, mar a bha e ann an 1975.
Tha Mòrag Rothach air innse dha 9gu10 gur e sin an smuain a thug oirrese seasamh airson na Comhairle.
Bha i a' smaoineachadh air tràth ach aig an àm, leis na coinneamhan ann an Steòrnabhagh agus i le teaghlach òg, cha robh e comasach.
Ach nuair a bha an nighean aice 18 bha taghadh ann air a' bhliadhna sin, agus chuir i a h-ainm air adhart.
Coinneach MacÌomhair
Tha Coinneach Mòr cuideachd ag aithneachadh nan dùbhlan a th' ann san là a th' ann.
Tha ceannardan na Comhairle air a bhith ag innse dhuinn nach eil an suidheachadh a th' ann "seasmhach" is feum air coimhead air modailean eile.
Bha Aonghas Dòmhnallach tric ag aithris air Comhairle nan Eilean Siar thar nam bliadhnaichean mar fhear-naidheachd.
Ann am beachd Aonghais co-dhiù, chan eil lèirsinn aig CnES is comhairlichean an là an-diugh seach mar a bha.
'S e mar a bha iad dol a dhùnadh Sgoil Chàrlabhaigh a thug air Ailig Dòmhnallach seasamh airson na Comhairle, tha e ag ràdh air 9gu10.
Bhruidhinn e a-mach an aghaidh an dùnaidh aig coinneimh agus thàinig daoine a bhruidhinn ris às dèidh làimhe is iad ag iarraidh air seasamh.
Bha e càirdeach dhan duine a sheas na aghaidh – chaidh iad dhan taghadh san aon chàr! Ach cha deach iad a-mach air a chèile idir!
Tha sinn air a bhith a' cluinntinn tron mhadainn mu staing BCCI, connspaid cho mòr 's a bhuail air Comhairle nan Eilean Siar.
Ann an agallamh air Aithris na Maidne, thuirt stiùiriche an ionmhais aig an àm, Donaidh MacLeòid, gun do rinn gearraidhean mòra a thàinig air comhairlean na h-Alba anns na bliadhnaichean mu dheireadh is reòthadh air cìs na comhairle barrachd cron air eaconamaidh nan Eilean Siar na BCCI.
Rinn BBC Naidheachdan sreath phodcastan ann an 2021 mu staing BCCI is 30 bliadhna aig an àm bhon a bha staing ann.
Gheibhear a' chiad fhear an seo is ceangal chun a' chòrr.
Tha Coinneach MacÌomhair air a bhith a' cuimhneachadh air fosgladh oifisean na Comhairle ann an 1979
Tha sinn air a bhith a' craoladh tron mhadainn à oifis CnES air Rathad Shanndabhaig.
Chaidh na h-oifisean fhosgladh gu h-oifigeil leis a' Bhanrigh Ealasaid ann an 1979.
Bha Coinneach MacÌomhair, a bha air a dhol na chomhairliche air a' bhliadhna ron sin, an làthair.
Tha coltas ann nach robh an turas thairis air a' Chuan Sgìth air còrdadh ris a' Bhanrigh....
Chan e beachd ùr a tha ann an Ùghdarras Singilte Eileanach - cha robh e ùr fiù 's nuair a thog Tormod Dòmhnallach an gnothach air BBC Naidheachdan air ais ann an 2018 is e fhèin na fhear-gairm aig an àm.
A rèir na tha sinn air cluinntinn bho Malcolm Burr is Donnchadh MacAonghais an-diugh ge-tà, 's e seo an t-slighe a tha Comhairle nan Eilean Siar airson leantainn.
Tha Dòmhnall Màrtainn a' cuimhneachadh air mar a thòisich a' Chomhairle a bhith a' coinneachadh ann an Talla Bhaile Steòrnabhaigh. Cha robh e buileach freagarrach ge-tà, 's draft ann. Cha b' e a' ghaoth a-mhàin a leigeadh na dorsan a-steach ge-tà.
"Aig deireadh an là, an rud a thug orra an atharrachadh inntinn, 's e gun tàinig cù a-staigh aig meadhan coinneimh," thuirt e.
"Agus thàinig an cù seo a-staigh on t-sràid, agus 's e Dòmhnall MacAmhlaigh a bha sa chathair, agus thionndaidh e gu fear de na h-oifigearan is thuirt e 'could somebody remove that animal before it passes a motion?!'
"Tha mi a' smaoineachadh gun robh uallach air gur e sin a' chiad mhotion glic a bhiodh aig a' Chomhairle!"
'S e Coinneach Mac a' Ghobhainn a tha sa chathair air 9gu10 is seo am pannal aige.
Chan eil Coinneach ann an seithir an neach-ghairm mar a bha Dòmhnall Moireasdan ge-tà is coltas ann nach eil sùil aigesan air an obair sin.
Sin e bho Aithris na Maidne ma-thà!
Ach fuirich còmhla rinn oir tha ar caraidean aig 9gu10 cuideachd a' coimhead ri CnES is gheibh sibh ceangal dhan phrògram aig mullach na duilleige.
Sin beachd Dhonnchaidh MhicAonghais air Aithris na Maidne an-dràsta.
'S e Donnchadh iar-cheannard CnES.
"Na cothroman a bh' aig a' Chomhairle - tha tòrr de na cothroman sin air an toirt bhuapa.
"Taigheadas, tha buidheann eile an lùib sin, tha buidheann eile an lùib uisge.
"A' coimhead air adhart, chan eil teagamh sam bith nach fheum dreach ùr tighinn air Comhairle nan Eilean agus air an roinn phoblaich ann an Alba.
"S e buidheann a bhios a' coimhead ri iomadh rud a bhios ann san roinn phoblaich a' dol air adhart."
An e aona bhuideann a bhiodh os cionn sheirbheisean, tha Dòmhnall Moireasdan a' faighneachd.
"Sin an t-amas a th' againn," tha Donnchadh ag ràdh.
Chuala sinn nas tràithe bhon àrd-oifigear a th' ann - Malcolm Burr - is e ag ràdh gum feum CnES coimhead air modailean ùra - nam measg aona ùghdarras a bhiodh os cionn seirbheisean ionadail gu lèir a thoirt seachad.
Tha Mgr Burr air a bhith san obair air CnES fad cha mhòr 20 bliadhna a-nise.
Tha e ag ràdh gu bheil na bliadhnaichean mu dheireadh gu seachd àraid air a bhith gu math dùbhlanach dhan ùghdarras.
Cò eile ach Coinneach MacÌomhair!
Cluinnidh sinn bho Choinneach fhèin air Aithris na Maidne an ceartuair, is bho Mhòrag Rothach is Donnchadh MacAonghais.
Ach tha Ruairidh MacÌomhair againne cuideachd air a bhith a' bruidhinn ri Coinneach mun àm aige aig CnES.
Comhairlichean a' deasbad staing BCCI ann an 1991
'S iomadh deagh chuimhne a bhios sinn a' cluinntinn mu obair Comhairle nan Eilean Siar tron là an-diugh.
Ach bha làithean dorcha ann cuideachd. 'S e sgainneal BCCI ann an 1991 a' chonnspaid a bu mhotha a bhuail air Comhairle nan Eilean Siar a-riamh.
Bha Tormod Caimbeul na fhear-naidheachd òg aig an àm. A' sgrìobhadh ann an 2021, chuimhnich Tormod air mar a thàinig an naidheachd gun do chaill a' Chomhairle £23m ann am banca a chaidh fodha mar chlach às an adhar.
Tha dreuchd an neach-ghairm air atharrachadh thar nam bliadhnaichean.
Thug Coinneach MacLeòid, a chaidh dhan dreuchd ann an 2022, mìneachadh dhuinn air mar a dh’atharraich na dleastanasan.
Ailig Dòmhnallach
B’ e Ailig Dòmhnallach an neach-gairm as fhaide a bha air Comhairle nan Eilean Siar is e san dreuchd eadar 1999 agus 2012.
Tha e ag ràdh gu bheil an diofar a rinn a’ Chomhairle thar nam bliadhnachan follaiseach.
Tha Aithris na Maidne an-dràsta a' coimhead ris an luchd-gairm thar nam bliadhnaichean.
Chan eil mòran le ceangal cho dlùth ri Comhairle nan Eilean Siar 's a th' aig Sandy MacMhathain.
Bha Mgr MacMhathain mar-thà grunn bhliadhnaichean na bhall air Comhairle Baile Steòrnabhaigh mus deach Comhairle nan Eilean a stèidheachadh.
Air a thaghadh mar chomhairliche air a’ chiad chomhairle ann an 1975, chaidh e na fhear-gairm ann an 1982.
Tha e cinnteach às gun do rinn an t-ùghdarras ionadail feum.
B’ i Kathleen NicAsgaill a’ chiad bhoireannach air Comhairle nan Eilean Siar.
An aon bhall boireann a-mach à 30 a chaidh a thaghadh ann an 1975, bha i a’ riochdachadh uàrd Dhail, seach aon taghadh nach deach leatha, gu 1994.
Tha Eilidh NicLeòid againne air a bhith a' toirt sùil air na rinn Kathleen thar nam bliadhnaichean is gu dearbh an suidheachadh duilich anns na bliadhnaichean mu dheireadh le glè bheag de chomhairlichean boireann ann an Steòrnabhagh.
Gheibh sibh aithris Eilidh an seo.
Bha Agnes Rennie eòlach air Kathleen agus tha i ag ràdh gur e boireannach le comasan air leth a bh’ innte.
