Spòrs

Tha màthair Kara Hanlon am measg na tha a' togail dragh mu phlana 'son dà amar-snàimh an Leòdhas a dhùnadh.

Tha Kara air snàmh aig Geamaichean a' Chlo-Fhlaitheis is air soirbheachadh aig Fàrpaisean Snàimh Bhreatainn, a thuilleadh air cruinneachadh iongantach de bhuinn Gheamannan nan Eilean a chàrnadh.

Tha Comhairle nan Eilean Siar an-dràsta a' beachdachadh air na h-amaran-snàimh aig Sgoil Shiaboist agus Sgoil Lìonail a dhùnadh mar oidhirp air na leabhraichean aca a chothromachadh.

Tha iad ag ràdh gu bheil cuideam air buidseatan a' ciallachadh gu bheil aca ri gearraidhean a dhèanamh ann an seirbheisean nach eil riatanach.

Ghabh am Bac ceum mòr a dh'ionnsaigh Lìog Leòdhais is na Hearadh a bhuannachadh nuair a rinn iad a' chùis 2-1 air an Rubha oidhche Chiadain.

'S iad na Rubhaich a chaidh air thoiseach is ochd mionaidean air an cluich ann an Col Uarach is Aonghas Dòmhnallach air an targaid.

Fhuair am Bac tadhal air ais an ìre mhath sgiobalta ge-tà tro Eòghann Dòmhnallach is bha na sgiobaidhean co-ionnan 1-1 aig letheach slighe.

Thàinig an tadhal a chuir am Bac air thoiseach tràth san dàrna leth bho Chonnor MacAoidh.

Bha buille ann dhan Rubha goirid às dèidh sin is Aonghas Dòmhnallach air a chur far na pàirce is chrìochnaich an geama 2-1 air a' cheann thall.

Tha na Bacaich a-nise air leum puing os cionn an Taobh Siar a' dol a-steach dha na geamaichean mu dheireadh Disathairne.

Bidh am Bac aig an taigh an aghaidh na Hearadh is an Taobh Siar a' cur fàilte air Nis.

Tùs an deilbh, SNS

Dh'ainmich Ross County gu bheil iad air seann mhanaidsear St Johnstone, Callum Davidson, fhastadh mar leas-mhanaidsear.

Bhuannaich Davidson Cupa na h-Alba agus Cupa na Lìge na ùine os cionn sgioba Pheairt.

Bha e mu dheireadh na mhanaidsear aig Queen's Park far an robh e aig an stiùir airson ceithir mìosan deug.

Tha seo a' tighinn seachdain as dèidh do Tony Docherty a bhith air ainmeachadh mar mhanaidsear ùr Ross County.

"Tha mi gu math toilichte Callum a thoirt chun a' chluba," thuirt Docherty.

"Tha e a' toirt leis tòrr eòlais bho àm shoirbheachail a' cluich agus na mhanaidsear.

"Tha na h-aon seòrsa bheachdan againn mu bhall-coise, agus leis gu bheil sinn obrachadh còmhla ron seo, tha mi cinnteach gun toir e deagh bhuaidh air an sguad," thuirt e.

Tha Ross County an-dràsta aig bonn an Championship is gun iad ach air dà phuing a thogail bhon chiad còig geamaichean aca.

Thèid iad an aghaidh Ayr United air falbh bhon taigh san ath gheam aca Disathairne.

Tha sgioba a' Bhac a-nise dìreach dà phuing air cùl an Taobh Siar aig mullach Lìog Leòdhais às dèidh dhaibh a' chùis a dhèanamh air na Lochan 6-0 oidhche Luain.

Chuir Louie Dòmhnallach trì tadhail is an fheadhainn eile a' tighinn bho Jamie MacFhionghain, Connor MacAoidh agus Dylan MacÌomhair.

Bidh sùil a-nise air geama fìor mhòr oidhche Chiadain nuair a thèid am Bac an aghaidh An Rubha.

Tha na Bacaich feumach air na trì puingean an sin 'son a dhol gu mullach na lìge air thoiseach air na geamaichean mu dheireadh den t-seusan Disathairne.

Sa gheama eile oidhche Luain leum na Hearadh os cionn Nis nuair a rinn iad an gnothach orra 4-0 aig na Còig Peighinnean.

Thog Baile Màiri Cupa Amaitearach na Gàidhealtachd is iad air a' chùis a dhèanamh 3-1 air An Inbhir ann am Farrais.

'S iad Louis Mac a' Phearsain, Ryan Dryburgh is John Beattie a fhuair na tadhail do Bhaile Mhàiri is Shaun MacAlasdair a' freagairt dhan Inbhir.

'S e Blair Moireasdan (a tha cuideachd aithnichte mar chluicheadair iomain le Cabar Fèidh) a chaidh ainmeachadh mar shàr-chluicheadair an fheasgair.

'S e seo a' chiad turas bho 1990 a bhuannaich Baile Màiri an cupa agus an treas turas uile gu lèir.

Bha iad mar-thà air Lìog is Cupa Inbhir Nis a thogail am-bliadhna.

Bhuannaich Malaig Lìog Taobh Siar na Gàidhealtachd is iad fhèin is Slèite is an Srath air crìochnachadh 3-3 sa gheama mu dheireadh den t-seusan Disathairne.

Bha Slèite feumach air na trì puingean airson greim a chumail air an tiotail ach ann am feasgar làn dràma san Àth Leathann anns an robh sia tadhail - is Slèite cuideachd air fàiligeadh breab-peanais a chur dhan lìon - fhuair Malaig a' phuing a bha a dhìth orra air a' cheann thall.

Chan eil an dràma buileach seachad ge-tà, is na sgiobaidhean gus coinneachadh a-rithist Disathairne seo tighinn anns a' chuairt dheireannaich de Chupa Rois.

'S dòcha gu bheil am pàrtaidh a' dol fhathast ann am Bàideanach às dèidh dhan sgioba Cupa Valerie Fhriseil a bhuannachadh air an deireadh-sheachdain - is an dàrna sgioba cuideachd a' soirbheachadh.

'S e 2-0 a bh' ann do Bhàideanach an aghaidh Loch Abair aig an Eilean ann am Baile Ùr an t-Slèibh ann an Cupa Valerie Fhriseil.

Chaidh Bàideanach air thoiseach tràth le tadhal bho Megan Ralph.

Rinn iad an dearbh rud tràth san dàrna leth is Hope Borthwick leis an dàrna tadhal.

Ged a bha gu leòr den bhall is cothroman gu lèor aig na h-Abraich tron fheasgar, cha b'urrainn dhaibh dòigh fhaighinn air ais dhan gheama.

'S e dìoghaltas a bha seo do Bhàideanach is Loch Abar air a' chùis a dhèanamh orrasan 1-0 sa chuairt dheireannaich an-uiridh.

Tha geama mòr ri thighinn fhathast eadar an dà sgioba is play-off gu bhith ann 'son tiotal na lìge Didòmhnaich an 5mh den Dàmhair.

Nas tràithe air an là Disathairne bha an dàrna sgioba aig Bàideanach air an Cupa Dhùbhlan a thogail.

Rinn iadsan an gnothach 7-5 air Inbhir Nis.

'S iad an Rubha a bhuinnig Cupa Mholdòbha oidhche Shathairne.

Rinn iad a' chùis air na Hearadh 4-3 às dèidh dhaibh ùine a bharrachd a chluich.

Chuir na Rubhaich dà thadhal anns na mionaidean mu dheireadh gus an geama a bhuannachadh, is iad cuideachd air tadhal a chur faisg air deireadh nan 90 mionaidean gus an geama a thoirt gu ùine a bharrachd.

B' e seo a' chiad chupa a choisinn na Rubhaich bho 2022.

Tha sgeulachd a' gheama aig Calum MacIllinnein.

Ann an Lìog Leodhais agus na Hearadh oidhche h-Aoine, neartaich an Taobh Siar an t-àite aca aig mullach chùisean às dèidh dhaibh a' chùis a dhèanamh air Càrlabhagh le trì gu dhà.

Tha seo gam fàgail 5 puingean air thoiseach air na Bacaich a tha san dàrna àite le dìreach aon gheama air fhàgail aig na Siaraich san lìog.

Le sgeualachd a' gheama bhon an-raoir, seo Javen Houston.

An t-seachdain-sa tha Iain Moireasdan agus an sgioba a' toirt sùil air ais air mar a thòisich iomairt na h-Alba airson Cupa na Cruinne a ruighinn.

A thuilleadh air a sin cuairt dheireannach Cupa Valerie Fhriseil san iomain, rugbaidh, teanas is gu leòr eile.

Coinnichidh Bàideanach is Loch Abar ann an Cuairt Dheireannach Chupa Valerie Fhriseil 'son an dàrna bliadhna ann an sreath.

'S beag a th' air a bhith eadar na sgiobaidhean o chionn ghoirid, mar a tha Javen Houston ag aithris.

'S ann le dòchas seach cinnt a tha luchd-taic na h-Alba a' coimhead air adhart ris an iomairt dearbhaidh 'son Cuach na Cruinne.

Tha Eilidh Lewsey ag ràdh gu bheil fadachd oirre ris an là a ruigeas Alba Cupa na Cruinne a-rithist.

Tha Tony Docherty air a bhith a' bruidhinn mu na h-amasan aige do Ross County.

Ghabh Docherty an obair an dèidh do Don Cowie fàgail an t-seachdain seo chaidh is droch thoiseach tòiseachaidh aige air an t-seusan seo.

Dòmhnall Angaidh Moireasdan, Sean MacLeòid agus Colin George Moireasdan le sùil air adhart gu seusan ùr an NFL.

Dh'èirich Cabar Fèidh os cionn Chinn Loch Seile ann am Prìomh Lìog na h-iomain às dèidh a' chùis a dhèanamh orra 4-0 oidhche Chiadain.

Chuir Blair Moireasdan Cabers air thoiseach tràth sa gheama aig Caisteal Leòid ach bha glè bheag eadar na sgiobaidhean tron chiad leth is Ceann Loch Seile 's dòcha le barrachd chothroman.

Ghabh Cabar Fèidh smachd air cùisean tràth san dàrna leth is Caoimhin Bartlett a' cur a' bhuill dhan lìon às dèidh dha Blair Moireasdan loidhne dìon Chinn Loch Seile fhosgladh gu sgileil.

Bha an geama gu ìre mhòir seachad nuair a chuir Liam Symonds tadhal sgiobalta eile do Chabar Fèidh.

Thàinig an ceathramh tadhal anns na mionaidean mu dheireadh agus 's e urchair a bh' ann bho chaman Blair Mhoireasdain.

'S e dòigh gu math iomchaidh a bha sin air crìoch a chur air oidhche nuair a chuir am Moireasdanach taisbeanadh de shàr-iomain air adhart.

Tha Cabar Fèidh san t-siathamh àite san lìog, aon àite os cionn Chinn Loch Seile, is aona gheama air fhàgail aig an dà sgioba.

Tha fear de luchd-taic Ross County, Calum MacConnell, gu math riaraichte leis a' cho-dhùnadh Tony Docherty fhastadh mar mhanaidsear ùr na sgìoba.

Tòisichidh linn Docherty le geama an aghaidh Obar Bhròthaig.

Tùs an deilbh, SNS

Chaidh Tony Docherty ainmeachadh mar mhanaidsear ùr Ross County.

Bha an obair bàn às dèidh do Don Cowie na Staggies fhàgail aig deireadh an Lùnastail.

Tha an cluba air droch thoiseach-tòiseachaidh a dhèanamh san Championship air an t-seusan seo às dèidh dhaibh a dhol sìos bhon Phrìomh Lìog sa Chèitean.

Bha Tony Docherty na mhanaidsear air Dùn Dè fad dà bhliadhna mus do chaill e a dhreuchd sa Chèitean.

Bha e ron sin air a bhith na leas-mhanaidsear dha Derek MacAonghais aig grunn sgiobaidhean.

Thuirt County gu bheil iad "air an dòigh" Docherty fhastadh.

"Tha eòlas mòr aig Tony agus tha sinn cuideachd air an aon ràmh a thaobh cultar a' chluba seo is na planaichean againn san ùine fhada," thuirt Àrd-oifigear Ross County, Steven Ferguson.

"Tha e gu mòr 'son a bhith na phàirt den chluba agus den choimhearsnachd agus tha sin a' toirt dhuinn misneachd mhòir is sinn 'son tilleadh dhan Phrìomh Lìog."

Thug an cluba cuideachd taing dha Iain Robasdan a bha na mhanaidsear eadar-amail bho dh'fhàg Don Cowie.

Chan eil e soilleir aig an ìre seo am bi Robasdan a' fuireach aig County.

Bha tadhail gu leòr san dà gheama ann an Lìog Leòdhais is na Hearadh oidhche Luain.

Bha cùisean gu math cofhurtail dhan Rubha a rinn a' chùis air Càrlabhagh 5-0, taobh a-muigh aig Cnoc a' Choillich.

Fhuair Aonghas Dòmhnallach trì dha na Rubhaich is Alfie MacMhaolain is Màrtainn Dòmhnallach cuideachd air an targaid.

'S e geama gu math nas fhaisge a bh' ann aig a' Chreagan Dubh eadar na Lochan is Nis.

Bha na sgiobaidhean co-ionnan às dèidh 90 mionaidean is na Nisich an uairsin a' smaointinn gun robh iad air an geama a bhuannachadh nuair a chuir Matthew MacÌomhair am ball dhan lìon.

Ach le dìreach dìogan air fhàgail fhuair Na Lochan breab-peanais is chuir Ali 'Barbie' Dòmhnallach an tadhal a dh'fhàg an geama co-ionnan 3-3 air a' cheann thall.

Tha Dòmhnall MacLaomainn agus Pòl Diùc, dithis a th' air a bhith an lùib Camanachd Leòdhais fad nam bliadhnaichean aca san lìog, air an geama mu dheireadh aca a chluich.

Tha iad ag ràdh gu bheil iad a' coimhead air adhart ri cothrom a thoirt dhan òigridh.

Tha feum air geama a bharrachd airson dearbhadh cò bhuannaicheas Lìog Uibhist is Bharraigh às dèidh do Saints an Iochdair agus Barraigh crìochnachadh co-ionnann air an aon àireamh phuingean.

'S ann mar sin a bha iad a' dol a-steach dhan gheama mu dheireadh dhen t-seusan Disathairne agus cha ghabhadh an sgarradh an sin nas motha is iad a' crìochnachadh 5-5 ann an geama iogantach aig pàirce an Eilein Duirche.

Bha smachd aig Saints air a' gheama tràth is dh'fhàg dà thadhal bho Anthony MacAonghais agus aon bho Iain Dòmhnallach iad trì air thoiseach às dèidh 21 mhionaid.

Thill Barraigh gu làidir le dà thadhal dhaibh fhèin ro leth-ùine bho Sean MacNèill agus breab-peanais bho Steven Davidson.

Ghluais Saints nas fhaide air thoiseach tràth san dàrna leth ach fhreagair na Barraich tro Niall Sinclair airson a' bheàrn a dhùnadh gu aon tadhal a-rithist.

Agus fhuair Sinclair Barraigh co-ionnann goirid às dèidh sin gam fàgail aig 4-4.

Cha do mhair sin fada ge-tà, le Aonghas Caimbeul a' cur na Saints 5-4 air thoiseach mus d' fhuair Barraigh tadhal le nas lugha na deich mionaidean ri dhol a' ciallachadh gu bheil feum air geama playoff airson an tiotal a dhearbhadh.

Tha dùil gun tèid an geama sin a chluich air an 20mh den t-Sultain.

Coinnichidh an dà sgioba cuideachd ann an cuairt dheireannnach Cupa Billy McNeill air an 13mh den t-Sultain.