Naidheachdan 11:00m
Teintean Los Angeles
Tha oifigich ann an Los Angeles ag ràdh gun deach co-dhiù deichnear a mharbhadh sna teintean fiadhaich a th' air sgrios mòr a dhèanamh air cuid de sgìrean den bhaile. Tha na Poilis air fear a chur an grèim an co-cheangal ri teine a tha iadsan ag ràdh a chaidh a chur a dh'aona-ghnothach. Tha na teintean a' dol fhathast ann an còig sgìrean, 's chaidh milleadh mòr a dhèanamh air na mìltean de thogalaichean.
Turas an t-Seansalair
Tha an Seansalair a' dol a Shìona air turas fad trì làithean ann an oidhirp piseach a thoirt air gnothaichean malairt eadar an dà dhùthaich. Tha na Tòraidhean air càineadh a dhèanamh air an turas ge-tà, agus iadsan a ràdh gum bu chòir do Rachel Reeves fuireach san Rìoghachd Aonaichte agus dèiligeadh ri suidheachadh ionmhais na dùthcha mar a tha e an-dràsta.
Dithis pheathraichean gun sgeul
Tha sgiobannan sònraichte agus coin phoilis an sàs san iomairt gus lorg fhaighinn air dithis pheathraichean a th' air a dhol a dhìth an Obair Dheathain. Chaidh Eliza agus Henrietta Huszti fhaicinn mu dheireadh tràth madainn Dimàirt air dealbhan CCTV agus iad air Sràid a' Mhargaidh a tha ri taobh na h-aibhne.
An t-sìde gheamhradail
B' e an-raoir an oidhche as fhuaire den Gheamhradh thuige seo às dèidh do dh'Oifis na Sìde dearbhadh gun robh i aig -14.5 C ann an Allt na h-Eirbhe. Tha mu 50 sgoil air a' Ghàidhealtachd dùinte an-diugh air t-sàilleabh sìde gheamhradail, 's bha dàil ann a bhith a' fosgladh le cuid eile.
A' ghnàth-shìde
Tha luchd-saidheans Eòrpach ag ràdh gu bheil atharrachadh na gnàth-shìde a' toirt buaidh aig ìre nach fhacas Mac-an-duine a-riamh. Tha a' bhuidheann Copernicus a' dèanamh dheth gur e an-uiridh a' bhliadhna a bu tèotha a-riamh, agus iad a' coireachadh ghasaichean càrboin a thèid a chur dhan àilleachd gu ìre mhòir airson sin.
An t-Àth Leathann
Tha Comhairle Coimhearsnachd an Àth Leathainn 's an t-Sratha ag ràdh gum bu chòir barrachd ùine a bhith ann airson co-chomhairleachaidh air plana airson campa mòr do luchd-obrach san sgìre anns am biodh àite do 350 duine. Tha a' chompanaidh Sodexo a' sireadh cead-dealbhachaidh airson a' champa do luchd-obrach SSEN a bhiodh ag obair air loidhne dealain ùr tron eilean. Tha iad ag ràdh gum biodh seirbheisean sa champa fhèin a bheireadh faochadh don sgìre.
Lioncs
Chaidh dà chat lioncs eile fhaicinn faisg air Ceann a' Ghiùthasaich madainn an-diugh. Chaidh am faicinn faisg air far an deach lorg fhaighinn air paidhir dhiubh an-dè. Thathas a' moladh do dhaoine gun a dhol faisg orra idir.