BBC Cymru Fyw

Mae arweinydd Llafur, Jeremy Corbyn, wedi croesawu penderfyniad Theresa May i gynnal Etholiad Cyffredinol.

Dywedodd y byddai'n rhoi "cyfle i bobl Prydain bleidleisio dros lywodraeth fydd yn rhoi'r mwyafrif yn gyntaf".

"Bydd Llafur yn cynnig dewis amgen effeithiol i lywodraeth sydd wedi methu ag ail-adeiladu'r economi, sydd wedi achosi i safonau byw ddirywio ac wedi gwneud toriadau niweidiol i'n hysgolion a'r gwasanaeth iechyd."

Twitter

Mae cyn Ysgrifennydd Cymru wedi croesawu cyhoeddiad Theresa May y bydd Etholiad Cyffredinol.

Twitter

Mae Prif Weinidog Cymru ynd weud bod yr alwad am etholiad yn annisgwyl ac "od".

BBC Cymru Fyw

Wrth gyhoeddi ei phenderfyniad ar Downing Street, dywedodd Theresa May bod angen sicrwydd wrth i'w llywodraeth geisio gweithredu proses Brexit.

"Mae'r wlad yn dod at ei gilydd ond nid yw San Steffan," meddai.

Bydd pleidlais yn Nhŷ’r Cyffredin 'fory.

Twitter

BBC Cymru Fyw

Mae'r Prif Weinidog Theresa May wedi cyhoeddi y bydd yn gofyn i Dŷ'r Cyffredin bleidleisio o blaid cynnal etholiad cyffredinol ar fyr rybudd ar 8 Mehefin.

O dan reolau'r Ddeddf Cyfnod Seneddol Sefydlog, does gan y Prif Weinidog ddim hawl i gyhoeddi etholiad cyffredinol ar fyr rybudd heb gefnogaeth aelodau Tŷ'r Cyffredin.

Dywedodd ei bod am gynnal yr etholiad er mwyn cael "sicrwydd a sefydlogrwydd" i'r DU.

Ffynhonnell y llun, Reuters

BBC Cymru Fyw

Mae Theresa May wedi cyhoeddi ei bod am alw etholiad cyffredinol ar 8 Mehefin.

Twitter

Gohebydd Seneddol y BBC, Laura Kuenssberg yn dweud bod sïon y bydd Theresa May yn cyhoeddi y bydd etholiad cyffredinol ym mis Mehefin.

Twitter

Mae rhai yn dyfalu bod y Prif Weinidog Theresa May yn mynd i alw etholiad cyffredinol pan fydd yn gwneud datganiad y tu allan i Downing Street am 11:15. 

Ond fel yr esbonia gohebydd seneddol BBC Cymru, Elliw Gwawr, fyddai hi ddim yn broses hawdd.

BBC Cymru Fyw

Bydd y Prif Weinidog Theresa May yn gwneud datganiad yn Downing Street am 11:15 y bore 'ma.

Yn wahanol i'r arfer, ni wnaeth y llywodraeth gyhoeddi am beth y byddai'n siarad.

Post Cyntaf
BBC Radio Cymru

Mae gwraig o Langefni yn dweud fod ei bywyd ar stop oherwydd ei bod hi'n disgwyl cael pen-glin newydd.

Aeth Avril Parry i weld ei meddyg ddwy flynedd yn ôl cyn cael ei rhoi ar y rhestr aros am lawdriniaeth yn Ysbyty Gwynedd.

Dywedodd wrth raglen y Post Cyntaf bod y boen yn ddifrifol: "Mae'n ofnadwy. Does 'na ddim pleser wrth wneud dim byd - dwi'n methu cerdded llawer, mynd am dro, gwaith tŷ."

BBC Wales News

Bydd Cwpan Cynghrair y Pencampwyr yn mynd ar daith o amgylch Cymru dros yr wythnosau nesaf.

Bydd cyfle i bobl weld y tlws yn Abertawe, Aberystwyth, Portmeirion a nifer o leodiadau eraill.

Bydd Prif Weinidog Cymru, Carwyn Jones, yn teithio gyda cyn-chwaraewr Cymru, Ian Rush, i'r Swistr ar 21 Ebrill i gasglu'r tlws o bencadlys UEFA. 

Ffynhonnell y llun, BBC Sport

BBC Wales News

Mae myfyrwyr wedi bod yn chwarae rhan ganolog yn natblygiad campws newydd eu prifysgol yn Abertawe.

Mae Prifysgol Cymru y Drindod Dewi Sant yn adeiladu campws newydd werth £300m yn y ddinas.

Mae tri o fyfyrwyr y brifysgol nawr yn astudio wrth weithio gyda'r datblygwyr, ar ôl cael swyddi yn gweithio ar y prosiect.

ITV News

Mae ITV yn adrodd bod Bwrdd Iechyd Betsi Cadwaladr wedi derbyn bron i 300 o gwynion am les cleifion iechyd meddwl, dolen allanol dros y pedair blynedd diwethaf.

BBC Sport Wales

Mae'r BBC yn adrodd y bydd Gareth Bale yn methu gêm Real Madrid yn erbyn Bayern Munich heno oherwydd anaf i'w ffêr.

Mae wedi bod yn cael trafferthion gyda'i ffêr dde yn ddiweddar, a hynny ar ôl iddo fethu tri mis o'r tymor oherwydd anaf.

Mae'n bosib y bydd hefyd yn methu El Clásico yn erbyn Barcelona nos Sul.

Ffynhonnell y llun, BBC Sport

Pêl-droed, BBC Cymru

Yn y Bencampwriaeth enillodd Caerdydd 1-0 gartref yn erbyn Nottingham Forrest ddoe. Mae'r Adar Gleision yn 13eg yn y tabl, a bellach yn sicr o aros yn yr adran ar gyfer y tymor nesaf.

Roedd buddugoliaeth i Wrecsam hefyd oddi cartref yn erbyn Efrog, 1-3. Mae'r canlyniad yn golygu bod Wrecsam yn 11eg gyda dwy gêm o'r tymor yn weddill.

Ond fe gafodd Casnewydd gweir o 6-1 yn erbyn Plymouth, sy'n golygu bod yr Alltudion un safle o waelod Adran Dau gydag ond tair gêm i'w chwarae.

BBC Cymru Fyw

Mae AS o Gymru wedi galw ar Lywodraeth y DU i gymryd cyfrifoldeb am y "llanast ofnadwy" sy'n prysur ddatblygu i fod yn "sgandal", ar ôl i waliau tai oedd yn anaddas ar gyfer y gwaith gael eu hinswleiddio.

Yn ôl Hywel Williams, mae miliynau o berchnogion tai ym Mhrydain yn dioddef problemau difrifol gyda thamprwydd a lleithder o achos sgil effeithiau insiwleiddio.

Mae AS Arfon bellach yn galw ar y llywodraeth i weld beth yn union yw maint y broblem, cynorthwyo'r rhai sydd wedi eu heffeithio a thalu iawndal priodol.

Dywedodd Llywodraeth y DU eu bod wedi ymrwymo i sicrhau fod cwsmeriaid wedi eu hamddiffyn wrth ddewis insiwleiddio eu tai.

BBC Cymru Fyw

Mae'r cyfarwyddwr theatr o Gymru, Michael Bogdanov, wedi marw yn 78 oed. Bu farw tra roedd ar ei wyliau yng Ngwlad Groeg.

Yn wreiddiol o Gastell Nedd, roedd yn gyfarwyddwr ar nifer o brif theatrau a chwmnïau perfformio'r byd gan gynnwys y Royal Shakespeare a Thai Opera Covent Garden a La Scala, a theatr genedlaethol fwyaf yr Almaen yn Hamburg.

Mae'n gadael pump o blant.

Teithio BBC Cymru

Yn Ewlo, Sir y Fflint, mae ‘na draffig trwm ar yr A494 tua’r dwyrain ger y troad am Fwcle

Yng Nghaerdydd mae ‘na draffig trwm ar yr A4054, Stryd y Bont ger Ffordd Llantrisant; ar yr A4232 tua’r gogledd ger cyffordd 33 yr M4, Gorllewin Caerdydd, a hefyd ar yr A470 tua’r de cyn cyffordd 32 yr M4, cyfnewidfa Coryton.

Tywydd, BBC Cymru

Rhagolygon y tywydd gan Robin Owain Jones y bore 'ma: "Bydd hi’n ddiwrnod sych, braf a heulog i rannau helaeth o'r wlad, er yn troi ychydig yn fwy cymylog o’r gogledd-orllewin yn ystod y pnawn, gan droi yr heulwen yn fwy niwlog o bosib.

"Y tymheredd yn 13C ar ei uchaf."

Am fwy o wybodaeth ewch i wefan dywydd y BBC.