A dyna ni gan ein gohebwyr o'r Maes am heddiw.

Ydi mae diwrnod cyntaf Eisteddfod Genedlaethol Ceredigion wedi digwydd o'r diwedd a'r trefnwyr yn hapus.

Fe fydd gweithgareddau'r Brifwyl yn parhau yn Nhregaron heno.

Bore fory yr Oedfa am 9, bydd yr Eisteddfod a gweithgareddau eraill yn parhau gydol y dydd ac fe fydd y Gymanfa Ganu yn y nos.

Bydd y llif byw yn ôl ddydd Llun gyda'r holl newyddion a'r cyffro o'r Maes.

Diolch am eich cwmni heddiw.

Mae gweddill straeon y dydd a chanlyniadau a pherfformiadau y Brifwyl ar wefan Cymru Fyw.

Hwyl am y tro.

Fore Sul am 9 fe fydd oedfa y Brifwyl yn cael ei chynnal yn y pafiliwn a hynny o dan arweiniad trigolion yr ardal.

Yr Athro Densil Morgan fydd yn annerch ac mae Rhiannon Lewis wedi helpu i lunio'r oedfa (i'w chlywed ar Radio Cymru am 13:00)

Nos Sul cynhelir y Gymanfa Ganu o dan arweiniad Delyth Hopkin Evans – ac ymhlith y tonau mae enwau lleoliadau adnabyddus iawn yn yr ardal – Aberystwyth, Builth, Pantyfedwen, Pen-parc a Rheidol yn eu plith.

Yn ystod y gwasanaeth cyflwynir Arweinydd Cymru a’r Byd, Ann Griffith.

Bydd yna groeso yn eglwysi yr ardal gydol y dydd ac fe fydd gwasanaeth dyddiol yn Eglwys Tregaron.

Dywed Arweinydd Cymru a'r Byd yn Eisteddfod Genedlaethol Ceredigion bod ei magwraeth yn Aberystwyth wrth i'w rhieni groesawu ffoaduriaid i'w cartref wedi dylanwadu yn fawr arni.

Mae Ann Griffith wedi byw ar bum cyfandir a bellach wedi ymgartrefu yn Washington.

Nos Sul fe fydd hi'n siarad yng Nghymanfa Ganu y Brifwyl a hynny wrth iddi dreulio cyfnod yng Nghymru am y tro cyntaf ers y pandemig.

"Dwi ddim yn berson eisteddfodol, cofiwch, ond mi ydw i'n berson rhyngwladol.

"Dwi ddim yn chwarae telyn, dwi ddim yn canu mewn côr - na dwi ddim yn gerddorol o gwbl, ond dwi wrth fy modd yn gwrando."

Cafodd ei magu yn ferch i'r Parchedig Huw a Mair Wynne Griffith - ei thad yn weinidog ar gapel Seilo yn Aberystwyth ac fe wnaeth eu cartref yno groesawu cannoedd o fyfyrwyr ar hyd y blynyddoedd.

"Be dwi'n gofio yw'r croeso roedd ffoaduriaid yn ei gael yn ein cartref," meddai Ann Griffith.

"Mae gen i atgofion cryf iawn am un o Hwngari yn dod atom a dwi mewn cysylltiad ag e o hyd.

"Dwi'n cofio hefyd am fyfyrwraig o'r Almaen ac fe ddaeth myfyriwr o Iran i fyw gyda ni - rwy' mewn cysylltiad ag e hefyd. Do mi ges i fagwraeth ryngwladol iawn a dwi'n sobor o falch o hynny."

BBC Radio Cymru

Tîm Dros yr Aber yw enillwyr Y Talwrn eleni sef Carwyn Eckley, Rhys Iorwerth, Iwan Rhys a Marged Tudur.

Doedd Marged ddim yn y babell lên ddydd Sadwrn oherwydd salwch.

Fe fydd yr ornest i'w chlywed ar Radio Cymru nos yfory am 19:00.

Mae rheolwr y Clwb Rygbi, sydd drws nesaf i faes yr Eisteddfod newydd ymgymryd â’i waith newydd.

“Ydw rwy’n edrych ‘mlan yn fawr ac wedi dysgu llawer wedi i gannoedd ddod i Tregaroc.

“Mi fydd yna fochyn yn cael ei rostio yma bob nos a digon o ddiod i ddiwallu syched eisteddfodwyr,” meddai.

Anest, Cari a Lili oedd ar y llwyfan yn yr unawd o dan 12.

Roedd y tair yn canu 'Adar Bach' o waith J Morgan Lloyd.

Y beirniaid yw Rhian Williams a Mari Ffion.

Mae Heledd Evans ac Angharad Mason wedi bod wrthi’n croesawu ymwelwyr ‘nôl i’r maes.

“Mae wedi bod yn eitha’ 'bishi', ac ma’ bysys ac ati ‘di dechrau cyrraedd nawr.

"Dwi’n credu eith hi’n fwy bishi yfory,” medd Heledd.

Mae hi wedi bod yn gymylog drwy'r dydd ond mae'r torfeydd yn dal i gyrraedd.

Llongyfarchiadau i Fand Arian Cross Keys am gipio DWY wobr gyntaf heddiw!

Gwyliwch yr uchafbwyntiau ar ein tudalen ganlyniadau arbennig.

Ffynhonnell y llun, Eisteddfod Genedlaethol

Ddechrau Ionawr 2021 bu farw Aled Lloyd Davies ac ar lwyfan y pafiliwn ar ddiwedd y cystadlu brynhawn Sadwrn bydd y Brifwyl yn cofio am ei gyfraniad gwerthfawr.

Pan ymwelodd yr Eisteddfod Genedlaethol â'r Wyddgrug yn 1991 ef oedd cadeirydd y pwyllgor gwaith.

Cafodd ei urddo'n Gymrawd yr Eisteddfod Genedlaethol yn 2004 am ei gyfraniad i ddiwylliant Cymru.

Dyma'r anrhydedd uchaf y mae'r Brifwyl yn gallu ei rhoi i berson, a dim ond pum Cymrawd sydd ar unrhyw adeg.

Yn ystod yr un achlysur bydd Garry Nicholas yn cael ei gyflwyno fel Cymrawd newydd.

"Anodd fyddai meddwl am unrhyw un sydd wedi gwneud cymaint dros ein gŵyl genedlaethol dros y blynyddoedd," meddai'r Eisteddfod.

"Mae Garry Nicholas wedi gweithio'n ddiflino i’r Brifwyl gan ddal amryw o swyddi - Cadeirydd y Cyngor, Llywydd y Llys, Cadeirydd y Bwrdd Rheoli a Chadeirydd y Pwyllgor Diwylliannol.

"Am gyfnod bu’n gadeirydd panel bychan oedd yn ystyried ffyrdd i wella a datblygu’r Brifwyl ymhellach," medd llefarydd.

Ffynhonnell y llun, Eisteddfod Genedlaethol

Merched y Wawr

Dros y cyfnod clo fe wnaeth Merched y Wawr gynnal prosiect #GartrefGydanGilydd ar y cyd â Llywodraeth Cymru.

Cafodd dros 7,000 o’r Blodau Gobaith yma eu creu, ac mae’r rheiny bellach wedi cael eu rhoi at ei gilydd.

Cafodd yr Enfys o Obaith ei dadorchuddio ar y maes y prynhawn yma, fel diolch i’r gwasanaeth iechyd a gweithwyr allweddol am eu cyfraniad yn ystod y pandemig.

'Pop art' o’r delynores Nansi Richards yw un o'r pethau sydd i'w gweld yn stondin Cymdeithas Cerdd Dant Cymru.

Mae nifer fawr o ddigwyddiadau wedi’u trefnu ar gyfer heno," medd Cadeirydd y Pwyllgor Gwaith, Elin Jones AS.

"Bydden i'n annog pawb i ddod y penwythnos cyntaf wrth i ni ddathlu Dadeni'r Eisteddfod Genedlaethol.

"Bydd perfformiadau byw yn mynd 'mlaen tan hwyr y nos - fe fydd yna syrcas, pob math o oleuo ac wrth gwrs fe fydd Jess, Dafydd Iwan a nifer o bobl eraill yn perfformio.

"Fe fydden i'n annog pawb sy'n gallu i ddod i'r maes y penwythnos cyntaf - peidiwch â'i gadael hi tan y penwythnos olaf achos mae 'na gymaint yn digwydd a hyd yn oed mwy ar y penwythnos cyntaf na'r olaf."

Mae Prif Lwyfan y Maes hefyd yn gyrchfan poblogaidd.

Côr Ysgol Gerdd Ceredigion oedd yn diddanu'r gynulleidfa brynhawn Sadwrn.

Ym mhabell Maes D mae ‘na drafodaeth gyda rhai o drigolion Ceredigion sydd wedi dod o dramor a dysgu Cymraeg.

Daw’r milfeddyg Kate O’Sullivan o Ogledd Iwerddon, mae Ana Rowelska o Wlad Pwyl yn wreiddiol, ac mae’r Iseldirwr Kees Huysmans yn adnabyddus fel pennaeth cwmni Tregroes Waffles.

Mae’r tri yn sôn am eu profiadau nhw wrth ddysgu’r iaith, gan ddweud bod angen taflu’ch hunain i mewn i’r broses.

“Mae angen i’r Cymry Cymraeg roi amser caled i’r dysgwyr!” meddai Kees Huysmans.

“Ac mae angen i chi’r dysgwyr hefyd dynnu’r clustffonau… a dweud wrthyn nhw beidio siarad Saesneg gyda ni.”

Wrth wrando ar brofiadau’r lleill mae’r cadeirydd Marion Loeffler, o’r Almaen yn wreiddiol, yn sylwi ar batrwm.

“Os chi am ddysgu Cymraeg, chi un ai’n ymuno efo clwb efo lot o alcohol, neu chi’n cael plant!” meddai.

Swyn Efa, Neli a Mai oedd ar y llwyfan yng nghystadleuaeth y Fonolog i rai rhwng 12 a 16.

Y beirniaid yw Geraint Lewis a Sara Harris-Davies.

Roedd y cystadleuwyr yn cael 5 munud i gyflwyno monolog o ddrama, rhyddiaith neu waith gwreiddiol.

Ydi criw Maes B yn mynd yn iau bob blwyddyn?

Dyma Osian, 6, a’i chwaer fach Megan, 3, o Lanelli yn mwynhau ger Caffi Maes B.

Nos yfory bydd Delyth Hopkins Evans yn arwain y Gymanfa Ganu a Chôr yr Eisteddfod - ond heddiw roedd hi ac aelodau eraill y teulu yn diddanu ar y Maes.