Lloergan oedd sioe agoriadol y Brifwyl ac fe wnaeth cannoedd dyrru i Dregaron i’w gweld nos Wener.

Fflur Dafydd oedd awdur y sioe a chyfansoddwyd y gerddoriaeth gan Griff Lynch a Lewys Wyn.

Y stori? Mae Lleuwen, seren y sioe, yn eicon ym myd seryddiaeth ac yn gweithio i fyny yn y gofod tra bod ei gŵr, Gwyn, yn magu eu plant ar y ddaear yn Ystrad Fflur lle cafodd ei eni a’i fagu.

Aiff Lleuwen ar daith i ddarganfod sut i ddod o hyd i gydbwysedd rhwng dau fywyd gan frwydro i ddarganfod y man canol rhwng cariad ac ymrwymiad, dyletswydd ac uchelgais, y genedl a’r gofod.

Mae'r Eisteddfodwyr yn cyrraedd a'r stiwardiaid yn brysur wrth y mynedfeydd.

Mae nifer y corau sydd yn cystadlu eleni yn galonogol, medd Betsan Moses, Prif Weithredwr yr Eisteddfod.

"Mae yna rai corau wedi tynnu allan," meddai, "ond roedden ni wedi paratoi am lai o gorau eleni."

Mae 'na gryn gyffro ar y bws o Gaernarfon!

Gallwch wylio holl gystadlu y llwyfan ar wasanaeth Sedd o'r Pafiliwn ar iPlayer.

Band Arian Llansawel oedd y cyntaf ar y llwyfan eleni, yng nghystadleuaeth Bandiau Pres Dosbarth 3.

Mae'r Prif Weithredwr, Betsan Moses, wedi cadarnhau bod rhai contractwyr wedi tynnu mas wythnos yn ôl ac wedi methu â darparu pebyll.

Roedd diffyg criwiau yn drafferth i’r contractwyr ac mae'r Eisteddfod, meddai, wedi gorfod “cydweithio gydag eraill" gan gynnwys y syrcas i adeiladu pebyll.

Y cystadlu wedi dechrau ar lwyfan y Pafiliwn yn Eisteddfod Genedlaethol Ceredigion 2022 a band arian Llansawel yn perfformio gyntaf.

Ffynhonnell y llun, BBC/Eisteddfod

Eisteddfod Genedlaethol Cymru

Mae'r Eisteddfod Genedlaethol newydd gyhoeddi datganiad swyddogol ar y diweddaraf am y dŵr.

"Mae’r systemau dŵr cyhoeddus ar Faes yr Eisteddfod yn weithredol eto yn dilyn canlyniadau’r profion a ddaeth drwodd y bore ‘ma.

"Rydyn ni’n parhau i weithio gyda Chyngor Ceredigion a Dŵr Cymru ar rai materion, oherwydd maint a chymhlethdod isadeiledd dŵr dros dro, ond mae’r dŵr yn ddiogel i’w ddefnyddio ar y Maes."

Mae Betsan Moses, Prif Weithredwr yr Eisteddfod Genedlaethol, newydd ddweud bod y "dŵr yn ôl yn weithredol eto ond bod yr Eisteddfod yn parhau i weithio gyda Dŵr Cymru a’r Cyngor Sir… mae’r dŵr yn ddiogel i'w ddefnyddio ar y maes.”

Yn y gynhadledd i'r wasg dywedodd Bryan Davies, arweinydd Cyngor Ceredigion: “Eisteddfod Tregaron ni’n galw hi, ond Eisteddfod Ceredigion yw hi.

"Gobeithio allwch chi drafaelu rownd Ceredigion i weld beth arall sydd gyda ni i gynnig.”

Mae’n diolch hefyd i’r holl bentrefi yn y sir sydd wedi addurno ar gyfer y Brifwyl.

Yn y gynhadledd gyntaf i'r wasg a'r cyfryngau dywedodd Cadeirydd Pwyllgor Gwaith yr Eisteddfod, Elin Jones: “Mae’r adborth ar y maes wedi bod yn arbennig hyd yn hyn, a phawb yn falch i fod nôl yma.”

Does dim bysiau gwennol eleni gan bod pob safle yn agos i’w gilydd ond mae bysiau rhwng Aberystwyth, Aberaeron a Llanbed a’r Maes drwy gydol y dydd tan ar ôl i‘r cyngerdd ar Lwyfan y Maes orffen.

Mae angen archebu lle ar y bws cyn 15:30 y diwrnod cynt – manylion yma, dolen allanol.

Nid yr Eisteddfod sy'n gyfrifol am y bysiau.

Mae'r Eisteddfod Genedlaethol wedi darparu fideo o'r maes - a dyma sy'n eich disgwyl wedi hir aros am Eisteddfod Ceredigion.

Trystan Ellis-Morris a Shân Cothi sy'n cadw cwmni i wrandawyr Radio Cymru yr wythnos yma - dyma'r tro cyntaf i'r ddau gyflwyno rhaglen O'r Maes.

Fe fydd Hywel Gwynfryn yn ymuno â nhw yn ystod yr wythnos, a hefyd yn cyflwyno rhaglen o uchafbwyntiau'r Eisteddfod gyda Rhiannon Lewis ddydd Sul nesaf.

Bydd Ffion Emyr yn crwydro'r Maes drwy'r wythnos yn cyfarfod cymeriadau'r brifwyl.

Y rhaglen i ddechrau am 12:00 heddiw.

Gallwch wrando unrhywbryd ar ap BBC Sounds.

Beth fyddai 'steddfod heb yr ymarfer munud ola'?

Dyma Adran Aberystwyth, sydd yn cystadlu yn yr ensemble lleisiol agored heddiw - pob lwc!

Mae'r cynllun tocyn am ddim i'r Eisteddfod Genedlaethol yn Nhregaron wedi cael ei ehangu fel bod pob disgybl cynradd yng Ngheredigion yn cael mynd i'r maes yn ddi-dâl ar y penwythnos cyntaf.

Mae tocynnau teulu hefyd yn parhau am ddim i deuluoedd difreintiedig o Geredigion ynghyd â ffoaduriaid a cheiswyr lloches sy'n byw yn y sir.

Ryw bythefnos yn ôl fe wnaeth Cadeirydd y Pwyllgor Gwaith lleol, Elin Jones AS, feirniadu’n chwyrn y rhai oedd wedi hawlio tocynnau am ddim "ar draul plant mewn tlodi a ffoaduriaid" ond mae’r mater bellach wedi setlo a "rhaid symud ymlaen”, meddai.

Mae 15,000 o docynnau am ddim wedi cael eu cynnig ar gyfer Eisteddfod Genedlaethol Tregaron.

Mae hyn yn gynnydd ar nifer y tocynnau a roddwyd am ddim ar gyfer y Brifwyl yn Llanrwst - 6,000 oedd y nifer bryd hynny.

Ydych chi'n paratoi i deithio i Dregaron? Faint o eiriau o fro Eisteddfod Genedlaethol 2022 sy'n gyfarwydd i chi?

Rhowch gynnig ar ein cwis!

Mae’r Babell Lên yn llawn dop y bore ‘ma wrth i Gwenallt Llwyd Ifan, cadeirydd y pwyllgor llên, groesawu’r gynulleidfa yn seremoni agoriadol yr eisteddfod.

Ym mherfformiad cyntaf y seremoni, mae disgyblion Ysgol Syr Henry Richard o Dregaron yn perfformio cerdd y buon nhw’n gweithio arni gyda’r beirdd Eurig Salisbury a Hywel Griffiths.

Twitter

Mae Gari, Alis, Nel, Lili a Bethan o Nebo yn eisteddfodwyr brwd. Tra bod Alis yn edrych ymlaen at wylio'r bandiau, gan ddisgrifio llwyfan y maes fel un "mega cŵl", mae Lili am drio casglu "digon o freebies".

Mae disgwyl cyhoeddiad am y cyflenwad dŵr yn hwyrach bore 'ma wrth i brofion barhau.

Dywed Duncan a Jules o Bay Coffee Roasters: “Dan ni ddim eisiau bod yn negyddol am y dŵr, achos 'dan ni mor hapus i fod yma.

"Mae Dŵr Cymru yn garedig iawn wedi rhoi dŵr i ni, a 'dan ni’n ei ferwi i greu coffi.”