Mae'n ddiwedd diwrnod arall ar Faes y Brifwyl yn Nhregaron - ac am ddiwrnod!

Ffynhonnell y llun, Eisteddfod Genedlaethol

Sioned Erin Hughes yw Prif Lenor Eisteddfod Ceredigion 2022.

Cafodd Joe Healy ei enwi yn Ddysgwr y Flwyddyn.

Sywel Nyw a'i albwm, Deuddeg, enillodd Albwm Cymraeg y Flwyddyn eleni ac aeth Tlws y Cerddor i Edward Rhys-Harry.

Cofiwch am Frwydr y Bandiau heno ac am yr holl gystadlu ar lwyfan y Pafiliwn.

Gallwch wylio'r cyfan trwy glicio yma a dilyn y canlyniadau yn fan hyn.

Diolch o galon a hwyl fawr... nawr... Maes B amdani?

Mae lliwiau coch a gwyrdd wedi goleuo un o adeiladau nodedig yr ardal. Ydych chi wedi ei weld?

Ffynhonnell y llun, Cerdin Price

O'r hydref ymlaen y bwriad yw y bydd rhaglenni cerddoriaeth ac adloniant ar gael am 60 awr yn lle 15.

24 oed yw Sioned Erin Hughes, Prif Lenor Eisteddfod Ceredigion 2022.

Fe enillodd dan y ffugenw 'Mesen'.

Wrth draddodi'r feirniadaeth o'r llwyfan ar ran ei chyd-feirniaid, dywedodd Meg Elis mai "cywair tawel sydd i Mesen, a'i storïau dan y teitl 'Rhyngom', ar y cyfan".

"Ond mae yma rywun sy'n gwybod i'r dim sut i gyfleu cymeriad mewn ymadrodd, pryd i fod yn gynnil a phryd i ddefnyddio ambell i gymal sy'n gwneud i'r darllenydd aros yn stond a rhyfeddu," meddai.

"Cryfder Mesen yw'r gallu i daflu goleuni ar y berthynas rhwng pobl â'i gilydd, ac y mae wedi llwyr ddysgu'r wers y talai i lawer o'r ymgeiswyr eraill ei rhoi ar gof a chadw - 'dangos, nid dweud'.

Testun y gystadleuaeth eleni oedd cyfrol o ryddiaith greadigol heb fod dros 40,000 o eiriau ar y testun 'Dianc'.

Cyflwynwyd y fedal iddi, a gwobr ariannol o £750, mewn seremoni ar lwyfan y Pafiliwn yn Nhregaron ddydd Mercher.

Dyma'r drydedd gwaith i fenyw o Lŷn ennill un o brif seremonïau'r Eisteddfod yr wythnos hon.

Yr awdur ifanc o Foduan yn Llŷn ddaeth i'r brig mewn cystadleuaeth a ddenodd 17 o ymgeiswyr.

Mae nifer fawr o Gardis neu'r rhai sydd wedi ymgartrefu yng Ngheredigion wedi ennill Y Fedal Ryddiaith sef:

• 1946 Dafydd Jenkins, Y Nofel
• 1951 Islwyn Ffowc Elis, Cyn Oeri’r Gwaed
• 1974 Dafydd Ifans, Eira Gwyn yn Salmon
• 1976 Marged Pritchard, Nid Mudan mo’r mor
• 1977 R Gerallt Jones, Triptych
• 1979 R Gerallt Jones, Cafflogion
• 1985 Meg Elis, Cyn daw’r gaeaf
• 1993 Mihangel Morgan, Dirgel Ddyn
• 2005 Dylan Iorwerth, Darnau
• 2008 Mererid Hopwood, O Ran
• 2014 Lleucu Roberts, Saith Oes Efa
• 2016 Eurig Salisbury, Cai
• 2019 Rhiannon Ifans, Ingrid
• 2021 Lleucu Roberts, Y Stori Orau

Seremoni'r Fedal Ryddiaith yw'r brif ddefod ar lwyfan y pafiliwn yn Eisteddfod Genedlaethol Ceredigion ddydd Mercher, sydd nawr yn dechrau.

Lleucu Roberts oedd enillydd y Fedal Ryddiaith yn 2021 a hynny ddiwrnod wedi iddi gipio Medal Goffa Daniel Owen.

Fel ag yn achos Medal Goffa Daniel Owen fe gafodd cyfansoddiadau eleni eu cyflwyno yn benodol ar gyfer cystadleuaeth 2022 - penderfynwyd gwobrwyo cyfansoddiadau 2020 yn 2021 er mwyn cefnogi'r diwydiant llyfrau yn ystod cyfnod anodd.

Mae'r fedal yn cael ei rhoi eleni am gyfrol o ryddiaith greadigol heb fod dros 40,000 o eiriau ar y testun 'Dianc'.

Y beirniaid yw Meg Elis, Dylan Iorwerth ac Eurig Salisbury.

Mae'r Fedal a gwobr ariannol o £750 yn cael eu rhoi er cof am Robyn a Gwenan Lewis gan y teulu.

Wrth siarad yn yr Eisteddfod, dywedodd Cyfarwyddwr BBC Cymru, Rhuanedd Richards, ei bod yn "anodd i Radio Cymru gynnig bach o bopeth at ddant pawb."

Roedd yn siarad mewn trafodaeth am ddyfodol darlledu yng Nghymru, wrth gyhoeddi y bydd BBC Radio Cymru 2 yn ehangu ei horiau darlledu o 12 awr yr wythnos i dros 60 awr.

Ychwanegodd y bydd cael dwy orsaf yn darlledu am fwy o oriau yn y dyfodol yn hwyluso ac yn sicrhau amrywiaeth.

Dywedodd Dafydd Meredydd, Pennaeth Gwasanaethau Cymraeg BBC Cymru bod rhaglenni newyddion fel Dros Frecwast yn "rhaglenni ardderchog ond mae ‘na ddemograffeg o bobl… sydd byth yn mynd i wrando arnyn nhw".

"Ac felly mae’n bwysig ein bod ni’n cynnig mwy na’r 15 awr presennol iddyn nhw," dywedodd.

"Os ydyn nhw’n troi i ffwrdd o Radio Cymru 2 ar ôl 9:00, nid dyna’r sianel fydd yno pan maen nhw’n troi nôl at y radio.”

Cofiwch fod 'na ddigwyddiadau tu hwnt i'r Maes hefyd... bydd Adwaith a sawl band arall mewn gig yn y clwb rygbi lleol heno

BBC Radio Cymru

Does gan Gymru "ddim dewis" ond dilyn yr Alban os ddaw'n annibynnol.

Dyna oedd sylwadau yr Arglwydd Dafydd Elis-Thomas ar raglen Dros Ginio ddydd Mercher.

Gwrandewch yma

Telynau, offerynnau taro a thalent Gwyneth Glyn, Meinir Gwilym, Gwenan Gibbard a Sian James o grŵp Pedair yn diddanu ym mhabell Encore.

Sgwrs fach gyda Lisa Gwilym hefyd.

Mae hun-luniau gydag enwogion yn fwyfwy cyffredin ar y Maes y dyddiau yma. Ond mae ambell i Eisteddfodwr wedi cael hun-lun efo wyneb ychydig yn fwy annisgwyl heddiw!

Dyma Ffion a seren bêl-droed ifanc Caerdydd a Chymru, Rubin Colwill!

Mae Maggi Noggi'n bob man heddiw - ac mae'n amryddawn. Tynnu peint (a'i yfed!) yw'r sgil ddiweddaraf.

Roedd 18 o bobl wedi ymgeisio i fod yn Ddysgwr y Flwyddyn eleni, gyda phedwar yn cyrraedd y rhestr fer.

Y tri arall yn y rownd derfynol oedd Stephen Bale o Fagwyr, Ben Ó Ceallaigh o Aberystwyth a Sophie Tuckwood o Hwlffordd.

Ond Joe Healy ddaeth i'r brig, ac roedd yn emosiynol wrth gael ei anrhydeddu mewn seremoni ym Mhafiliwn y Maes yn Nhregaron ddydd Mercher.

Dywedodd y bydd yr iaith Gymraeg yn "rhan o fy mywyd am weddill fy mywyd."

Roedd 18 o bobl wedi ymgeisio eleni, gyda phedwar yn cyrraedd y rhestr fer.

Mae’r trafodaethau gwleidyddol yn parhau ym Mhabell Cymdeithasau 1, gyda sgwrs â rhai o aelodau’r Comisiwn Annibynnol ar Ddyfodol Cyfansoddiadol Cymru.

Cafodd y Comisiwn ei sefydlu gan Lywodraeth Cymru yn gynharach eleni i ystyried pa ffurf sydd ei angen ar ddemocratiaeth Cymru yn y dyfodol.

Dywedodd cyn-Archesgob Caergaint, Dr Rowan Williams: “Mae ‘na crisis democratiaeth byd eang ar hyn o bryd, ac mae’n bwysig felly bod gan y comisiwn rywbeth i ddweud am hyn,” meddai.

Ychwanegodd Dr Williams ein bod hi’n “hollol hanfodol” eu bod nhw’n ystyried annibyniaeth i Gymru fel un o sawl pwnc fydd yn rhan o waith y Comisiwn.

Ychwanegodd Anwen Elias o Brifysgol Aberystwyth fod gwaith y comisiwn, sy’n parhau i ddigwydd, yn “foment bwysig iawn ym mhresennol a dyfodol Cymru.”