Mae cwis y Coleg Cymraeg newydd ddechrau...

... mae i weld yn orlawn yn y Pafiliwn i wylio'r ornest rhwng y beirdd!

Roedd ‘na dorf fawr yn gwylio Bwncath neithiwr ar Lwyfan y Maes wrth i’r haul fachlud dros Dregaron, a hynny er bod Gig y Pafiliwn hefyd wedi dechrau erbyn hynny.

Gig ychydig tawelach oedd gan y band y prynhawn yma - ym Mhabell y Coleg Cymraeg.

Cyfle i orffwys ar y maes ac i feddwl am yr hyn sydd i ddod yn y dyfodol yw gardd Salm 23, a chyfle i ystyried perthynas pobl gyda’r hinsawdd.

Gardd dros dro gan Owen Griffiths yw hon sy’n gofyn i bobl fyfyrio am golledion y gorffennol a’r ofn ein bod yn torri’r cysylltiad â’r amgylchedd. Mae gofyn i bobl oedi a myfyrio yn ardd ac i gerdded y llwybr.

Yn y Tŷ Gwerin prynhawn yma, mae band Burum yn perfformio caneuon gwerin mewn arddull jazz.

Draw yng Nghaffi Maes B, mae Lewys yn diddanu cynulleidfa sydd wedi dod am hoe o brysurdeb y Maes.

Digon o fwynhau ar stondin Prifysgol Bangor y prynhawn yma gyda Band Pres Llareggub a phrosecco 🎺🥂

Mae pabell Maes D yn orlawn y prynhawn yma, a hynny wrth i bobl wrando ar sgwrs gyda Mark Drakeford.

Mae'r prif weinidog yn dweud fod pobl weithiau yn “cwyno” am safon ei Gymraeg, ond mae’n dweud mai’r peth pwysicaf yw i ddal ati.

“Penderfyniad personol fi yw jyst i bwrw mlaen,” meddai. “Dwi’n siŵr dwi’n lladd yr iaith Gymraeg bob tro dwi’n siarad! Dwi’n siŵr dwi’n neud camgymeriadau, ond os ‘dych chi’n becso am hynny bob tro, dych chi ddim yn mynd i neud e.”

Mae’n dweud ei fod felly’n defnyddio’r iaith bob tro mae’n gallu, a’r sylw hwnnw’n ennyn cymeradwyaeth gan y dorf.

Dyw hi ddim wedi bod yn wythnos mor brysur â'r disgwyl i bawb. Tra bod rhai busnesau yn Nhregaron wedi gwneud elw, mae eraill yn gobeithio am fwy o brysurdeb y penwythnos hwn.

Yn Neuadd Tregaron mae yna arddangosfa gan grefftwyr lleol.

Dywedodd Aled Jenkins, un o'r rhai sydd yn arddangos ei nwyddau llechi, ei bod wedi bod yn "eitha' tawel".

"Fi 'di bod mas yn rhoi pamffledi i bobl heddi i drio denu nhw mewn, ac mae pobl 'di bod yn gofyn pa mor bell yw'r dre' o faes parcio'r 'Steddfod, ac efallai gallen nhw 'di bod yn fwy clir ynglŷn â hynna achos dyw hi ddim yn bell o gwbl.

"Y peth arall yw mae cymaint o bethau ar faes yr Eisteddfod, efallai fod pobl yn teimlo bod dim angen iddyn nhw fynd mas."

Dyma gôr Cwmann a'r Cylch yn diddanu Eisteddfodwyr wrth iddyn nhw grwydro'r stondinau

BBC Radio Cymru

Wyneb cyfarwydd arall ar y maes heddiw ydy enillydd Cân i Gymru, Morgan Elwy.

Fe fydd yn perfformio fel rhan o Mared Williams a'r Band ar Lwyfan y Maes nes ymlaen.

Mae Bach o Hwne yn siŵr o fod yn ein pennau am weddill y dydd rŵan!

Cafodd y grŵp ei sefydlu yn ystod y cyfnod clo ac yn fwy diweddar, fe wnaethon nhw serennu ar Britain's Got Talent.

Ond does dim i guro perfformio ar Lwyfan y Maes! Dyma'r dorf!

Mae mwy o bobl ifanc wedi cyrraedd Maes B ar gyfer gigs y penwythnos.

BBC Radio Cymru

Ar Dros Frecwast bore 'ma, gofynnwyd i drefnydd a chyfarwyddwr artistig yr Eisteddfod a fyddai'r brifwyl yn ystyried symud digwyddiadau yn agosach i ganol trefi yn y dyfodol.

Dywedodd Elen Elis bod Tregaron "dan ei sang neithiwr, y lle yn llawn pobl yn mwyhau eu hunain.

"Rhaid cofio mai gŵyl ydyn ni, felly 'da ni isio darparu ystod o brofiadau anhygoel i'r cynulleidfaoedd ni.

"Wrth gwrs mi fyddan ni'n edrych yn ôl ar 'leni a gweld ac yn asesu - mae pawb yn sgwennu darn o adborth."