Ym Mhabell Merched y Wawr mae Gwen a Margaret o gangen Chwilog yn brysur yn gwneud paneidiau.

Gwen ydy cogyddes orau Llŷn yn ôl yr aelodau eraill!

Yn y gynhadledd gyntaf i'r wasg a'r cyfryngau dywedodd y Prif Weithredwr Betsan Moses, bod mwy o wirfoddolwyr nag erioed yn y 'Steddfod yma

Fe wnaeth hi hefyd bwysleisio pwysigrwydd y “bartneriaeth“ rhwng yr Eisteddfod a’r awdurdodau er mwyn “creu lle diogel” i ymwelwyr.

I'r rhai ohonoch sydd ar eich ffordd fe wnaeth hi bwysleisio yr angen i deithwyr ddilyn y cyfarwyddiadau.

“Dan ni’n erfyn i bawb ddilyn yr arwyddion, peidiwch mynd ffordd arall am eich bod chi’n meddwl eich bod chi’n gwybod yn well,” meddai.

Bydd gohebwyr Cymru Fyw ar y maes gydol yr wythnos yn dod â'r diweddaraf o Foduan.

Dyma gyngor Iolo Cheung ar fore cyntaf y Brifwyl.

Liz Saville Roberts, Aelod Seneddol Dwyfor Meirionnydd, yw Llywydd y Brifwyl eleni ac fe fydd yn siarad brynhawn Sadwrn o lwyfan y pafiliwn mawr.

Wedi byw ym Mhen Llŷn ers 1993, Liz oedd AS benywaidd cyntaf Plaid Cymru pan gafodd ei hethol yn 2015, a hi bellach yw Arweinydd Seneddol Plaid Cymru yn San Steffan.

Mae hi hefyd yn un o feirniaid cystadleuaeth Dysgwr y Flwyddyn eleni.

Yn wreiddiol o Lundain, fe wnaeth Ms Roberts ddysgu Cymraeg tra ym Mhrifysgol Aberystwyth, gan dreulio cyfnod fel darlithydd addysg bellach gyda Choleg Meirion Dwyfor, lle bu'n datblygu addysg Gymraeg.

Nid dyma'r tro cyntaf i aelod o Blaid Cymru gymryd yr awenau, gyda'r AS Ben Lake yn Llywydd y llynedd.

Mae Cymry amlwg eraill wedi bod yn llywyddion yr Ŵyl dros y blynyddoedd, gan gynnwys y cyflwynydd a'r DJ, Huw Stephens, yr hanesydd Elin Jones a chyn-reolwr cynorthwyol tîm pêl-droed dynion Cymru, Osian Roberts.

Dyma i chi gipolwg o'r Maes.

Fe fydd yr Orsedd yn gobeithio ymgynnull o gwmpas cerrig yr Orsedd am y tro cyntaf fore Llun wrth i aelodau newydd gael eu hurddo.

Hon yw Eisteddfod olaf yr Archdderwydd Myrddin ap Dafydd - fe fydd yn cael ei holi ar raglen Bore Sul, Radio Cymru bore fory am 8.

Gyda'r arolygon tywydd yn awgrymu y bydd y glaw yn stopio ar ôl cinio ry'n ni'n gobeithio na fydd angen cychod ar y maes!

Dywed Llywydd Llys yr Eisteddfod fod ganddo un apêl ar ddechrau’r Brifwyl.

“Dwi am i chi sicrhau eich bod chi’n annog o leiaf un person, sy’n newydd i brofiad ein Heisteddfod Genedlaethol, i ddod atom ni i’r Maes am y tro cyntaf.”

Bydd Seremoni Agoriadol Eisteddfod Genedlaethol Llŷn ac Eifionydd am 12.50 pan fydd Cadeirydd y Pwyllgor Gwaith, Michael Strain ac Ashok Ahir, Llywydd y Llys, yn croesawu pobl yn swyddogol i’r Brifwyl.

Os yn bosib, mae pobl yn cael eu hannog i ddefnyddio trafnidiaeth gyhoeddus i gyrraedd y maes, er mwyn lleihau tagfeydd yn yr ardal ac er budd yr amgylchedd.

Mae gofyn hefyd i bobl drefnu eu cludiant adref o flaen llaw er mwyn cadw eu hunain ac eraill yn ddiogel.

Os ydych chi'n gyrru i'r maes eleni bydd angen i chi ddilyn yr arwyddion 'Eisteddfod' melyn.

Os yn teithio o gyfeiriad y de ar yr A497 (cyfeiriad Porthmadog) bydd traffig yn cael ei ddargyfeirio ar y B4354 ar gylchfan Afon wen, gan deithio drwy Chwilog i'r Ffôr.

Bydd angen parhau ar hyd y B4354 tan y gyffordd gyda'r A497 lle mae angen troi i'r chwith, ac yna dilynwch y ffordd tan i chi gyrraedd y maes parcio.

Os yn teithio o gyfeiriad y dwyrain ar yr A499 (cyfeiriad Caernarfon) bydd angen dilyn yr A499 i bentref Y Ffôr, cyn troi'r dde ger y goleuadau dros dro yng nghanol y pentref.

Bydd angen parhau ar hyd y B4354 tan y gyffordd gyda'r A497, ac yna dilynwch y ffordd tan i chi gyrraedd y maes parcio.

Os yn teithio o Benrhyn Llŷn, dilynwch y cyfarwyddiadau a'r arwyddion lleol wrth i chi eu cyrraedd.

Bydd rhai ffyrdd lleol wedi'u cau dros gyfnod yr ŵyl.

Ffynhonnell y llun, Eisteddfod Genedlaethol Cymru

Oherwydd costau byw uwch, dywed y Prif Weithredwr, Betsan Moses, fod rhai newidiadau wedi eu cyflwyno eleni ond bod y maes yn "teimlo'r un peth ag arfer".

Mae'n faes "anhygoel", meddai.

"Ar waetha'r glaw mae'n faes sy'n sychu'n gyflym iawn. Mae'n faes agored a'r tir o fewn ychydig oriau yn gallu sychu.

"Felly, pan gawn ni law, fe fydd y maes yn sychu yn gloi."

Ddydd Gwener roedd Betsan Moses a Gwenllian Carr, Cyfarwyddwr Strategol y Brifwyl, yn hapus wrth i Brifwyl Llŷn ac Eifionydd gyrraedd ei phenllanw.

Ffynhonnell y llun, Tegwen Morris

Ffynhonnell y llun, Tegwen Morris

Mae'r gwaith mawr ar gyfer yr Eisteddfod wedi digwydd ers tro ac yn ystod y dyddiau diwethaf mae stiwardiaid a stondinwyr wedi bod wrthi yn brysur yn gwneud y paratoadau munud olaf.

"Mae'r cyfan wedi dod at ei gilydd yn dda," medd y Prif Weithredwr Betsan Moses.

Dyma rai a oedd yn prysur baratoi brynhawn Gwener cyn yr wythnos fawr.

Ffynhonnell y llun, Tegwen Morris

Brodor o Eifionydd, Gwyn Eiddior, sydd wedi bod yn gwneud lot o'r gwaith o baratoi'r maes ac mae'n barod am yr wythnos sydd o'i flaen.

Mae 'na ddŵr mewn mannau - ond mae modd ei osgoi ac mae yna ddigon o bethau i godi calon ar y Maes.

Mae'r Eisteddfod Genedlaethol wedi trydar i atgoffa bod ap yr Eisteddfod ar gael i'w lawrlwytho, gyda gwybodaeth am 'holl ddigwyddiadau a chystadlaethau i drefnu eich wythnos'.

Efallai nad yw'r llwybr at y toiledau yn wych ond mae'r toliedau yn lân a thaclus, medd un o ohebwyr Cymru Fyw.

Mae 'na ddigon ohonyn nhw hefyd, mae'n debyg! Dim angen poeni eto!

Mae traciau solet wedi cael eu gosod ar hyd prif lwybrau’r maes, sy’n gwneud cerdded o gwmpas yn ddigon rhwydd, medd Iolo Cheung ein gohebydd ar y Maes.

Ond oddi ar y llwybrau hynny, mae’r maes yn hynod o wlyb ac yn golygu bod rhaid cerdded drwy’r dŵr i gyrraedd rhai o’r pebyll a safleoedd ar yr ymylon.

Ond mae’r gwynt a’r glaw wedi gostegu rywfaint - croesi bysedd y bydd hynny’n para!

Mae yna giw am docynnau wrth i'r Brifwyl agor yn swyddogol fore Sadwrn.

Y cyngor yw gwisgwch yn addas fel yr eisteddfodwyr yma!!!

Elen Elis ydy Trefnydd yr Eisteddfod Genedlaethol: "Mae 'na bach o law ond dwi wedi checio'r tywydd ac mae'r haul yn dod allan yn y p'nawn," meddai ar Dros Frecwast.

"Felly gwisgwch yn gall, dyrwch eich wellies ymlaen a dowch i'r Maes!

"'Da ni wedi cael bach o law yn y pythefnos diwetha.. ond [mae'r maes] yn sychu o fewn cwpwl o oriau, mae'n sychu'n arbennig o dda yma sy'n rywbeth calonogol."

Llun'r o Maes carafanau cae C y bore 'ma. Does dim traffig mawr i'w weld ond mae hi'n wlyb iawn dan droed.

Mae hi’n wlyb iawn ar faes yr Eisteddfod bore 'ma, yn enwedig ger y brif fynedfa, yn dilyn glaw trwm dros nos.

Mae’r llwybr sy’n cludo pobl i’r maes carafanau hefyd yn mynd heibio’r fynedfa, felly er bod traciau i lawr ar eu cyfer mae’n ddigon mwdlyd yn barod.

Cofiwch eich welintons neu sgidiau cadarn felly os ydych chi’n dod i’r Brifwyl heddiw - fe fyddan nhw’n angenrheidiol!

Mae’n ddiwrnod cyntaf Eisteddfod Genedlaethol Llŷn ac Eifionydd.

Roedd yr eisteddfod i fod i’w chynnal yn wreiddiol yn 2021 ond yn sgil Covid fe gafodd Eisteddfodau Ceredigion a Llŷn ac Eifionydd eu gohirio.

Eisoes mae digon o gyffro ar y maes er gwaetha'r glaw dros nos.

Mae gohebwyr Cymru Fyw ym Moduan gydol yr wythnos ac mae'n braf cael eich cwmni.