Un cymeriad poblogaidd yn ystod yr wythnos fydd Mistar Urdd.

Ydi - mae e wedi cyrraedd ac yn gynnar bore 'ma bu Mali a Rhys o Nantgaredig ger Caerfyrddin yn ei gyfarfod.

Wrth siarad â BBC Cymru Fyw, dywedodd Emyr Wyn, Prif Stiward yr Urdd eleni, fod y "trefniadau parcio yn mynd yn arbennig" ar fore cynta'r Ŵyl.

Dywedodd fod "dros 170" o wirfoddolwyr ar y Maes ei hun a chriw ar wahân yn gwarchod y maes parcio a'r maes carafanau.

Mae rhan fwyaf o'r gwirfoddolwyr yn ffermwyr lleol, meddai Emyr, a byddan nhw'n "hel pobl fel defaid" tuag at y Maes.

Ychwanegodd Emyr fod y gwirfoddolwyr yn "arbenigwyr ar y tywydd ym Mathrafal" ar ôl i'r Eisteddfod Genedlaethol gael ei chynnal yno yn2003 a 2015.

"'Da ni'n gwybod lle 'da ni ddim eisiau gweld cymylau du'n dod!" meddai.

Eisteddfod yr Urdd

Ymhlith llywyddion anrhydeddus y Brifwyl eleni mae Ann Fychan, Heulwen Davies, Emyr a Carys Evans, Delma Thomas, Menna Blake a Hywel Glyn Jones - oll wedi cyfrannu llawer i ddiwylliant eu hardal a gweithgareddau'r Urdd am flynyddoedd lawer.

Mae'r Brifwyl hefyd yn anrhydeddu y diweddar Arwyn Tyisa, Llanfair Caerenion - a fu farw yn 2013.

"Cymeriad cwbl arbennig, cwbl Gymreig a chwbl 'Faldwynaidd' - yn adlewyrchiad perffaith o ddiwylliant Maldwyn ar ei orau," medd llefarydd ar ran yr Urdd.

Mae Arwyn yn un o'r rhai sydd wedi derbyn tlws John a Ceridwen Hughes gan yr Urdd.

Ffynhonnell y llun, Urdd Gobaith Cymru

Ydych chi'n dod i'r Eisteddfod yr wythnos hon?

Criw Cymru Fyw aeth am dro bore 'ma i weld lle mae popeth ar y maes!

BBC Radio Cymru

Gallwch wylio'r holl gystadlu o'r Pafiliwn Coch, Gwyn a Gwyrdd ar S4C Clic ers ben bore - ac ar o S4C 10:30 ymlaen.

Bydd rhaglen uchafbwyntiau o'r Eisteddfod hefyd ar Radio Cymru rhwng 14:00 a 17:00 yng nghwmni Ifan Jones Evans a Ffion Emyr a nifer o bytiau o'r maes gydol y dydd.

Roedd Eisteddfod Maldwyn i fod i gael ei chynnal yn 2022 - blwyddyn canmlwyddiant yr Urdd - a Machynlleth oedd y lleoliad a ddewiswyd yn wreiddiol.

Ond wedi saib o ddwy flynedd oherwydd pandemig Covid mae'n cael ei chynnal eleni, ac am nad oedd modd cael hyd i safle digon mawr yn ardal Machynlleth, penderfynwyd cynnal y brifwyl ym Meifod - ar yr un safle lle cynhaliwyd yr Eisteddfod Genedlaethol yn 2003 a 2015.

Mae yna groeso mawr i Eisteddfod Maldwyn ym Machynlleth - yn lle y bwriadwyd ei chynnal yn wreiddiol.

Steffan Harri o Ddolanog yw llywydd y dydd.

Fe ddaeth Steffan Harri i amlygrwydd drwy sioeau cerdd Cwmni Theatr Maldwyn.

Mae e wedi perfformio mewn nifer o sioeau cerdd ac wedi chwarae rhan flaenllaw yn sioeau Shrek the Musical, a Les Miserables.

Roedd e hefyd yn rhan o gynhyrchiad Theatr Genedlaethol Cymru o ddrama Y Tylwyth a bu'n un o gymeriadau Rownd a Rownd ar S4C.

Y tro diwethaf i Brifwyl Eisteddfod yr Urdd gael ei chynnal ym Maldwyn oedd yn Y Drenewydd yn 1988.

Ydych chi'n cofio pwy enillodd y gadair? Wel Tudur Dylan Jones ac mae e wedi ennill dwy gadair a choron genedlaethol ers hynny!

Wiliam Gwyn enillodd y Fedal Ddrama - mae e wedi bod yn rhan o dîm ysgrifennu a chynhyrchu Pobol y Cwm fwy neu lai ers hynny.

Ffynhonnell y llun, Urdd Gobaith Cymru

Mae 'na groeso lliwgar ym Meifod ar fore cynta'r cystadlu.

Dyma'r tro cyntaf i Eisteddfod yr Urdd ymweld â Maldwyn ers 1988!

Mae Greta a Martha o Gaerfyrddin yn barod am ddiwrnod llawn cyffro a chystadlu ar y maes.

Ers ben bore mae pobl wedi bod yn heidio i'r maes wrth i'r cystadlu ddechrau yn y pafiliynau am 08:30.

Y ddawns werin i Bl 6 ac iau yw y gystadleuaeth gyntaf yn y Pafiliwn Gwyn, mae'r Ensemble Offerynnol Bl 6 ac iau yn cystadlu yn y Pafiliwn Gwyrdd a'r Llefaru Unigol i flynyddoedd 5 a 6 yn y Pafiliwn Coch.

Mae'r Eisteddfod yn cael ei chynnal ar gaeau Fferm Mathrafal ym Meifod - SY22 6HT

I gyrraedd y meysydd parcio dilynwch yr arwyddion swyddogol.

"Mae'n allweddol," medd y trefnwyr, "bod gyrwyr yn dilyn yr arwyddion melyn pwrpasol".

O'r Trallwng cymerwch yr A458 i'r gorllewin o Trallwng (arwydd ar gyfer Dolgellau). Trowch i'r dde ar y B4389 a dilynwch yr arwyddion.

O Groesoswallt dilynwch yr A483 i'r de allan o Groesoswallt (arwydd ar gyfer y Trallwng). Trowch i'r dde i'r A495 (arwydd ar gyfer Llansantffraid-ym-Mechain). Parhewch ar y ffordd hon drwy Meifod nes i chi gyrraedd arwyddion i'r meysydd parcio.

Ydy, mae'n ddiwrnod llawn cyntaf Eisteddfod yr Urdd Maldwyn 2024 ac mae plant a phobl ifanc ar draws Cymru wedi heidio i'r maes ym Meifod.

Mae'r cystadlu wedi dechrau ers ben bore yn y pafiliwn coch, gwyn a gwyrdd.

Mae gohebwyr Cymru Fyw ar y maes - arhoswch gyda ni i gael y newyddion diweddaraf a lluniau rhai o'r cystadleuwyr a chefnogwyr.