Yn y gynhadledd gyntaf i'r wasg dywed Helen Prosser, Cadeirydd y Pwyllgor Gwaith, bod y gronfa leol wedi cyrraedd ei tharged ariannol a mwy ac wedi codi £332,000 ond wedi cyfraniadau gan Gyngor Rhondda Cynon Taf ac unigolion mae'r cyfanswm yn £450,000.

"Mae cyfeillion ar draws Cymru wedi cyfrannu," meddai, "ond mae trwch yr arian wedi dod o weithgarwch yn ein cymunedau."

Wrth i'r dorf ddechrau cyrraedd Parc Ynysangharad, mae'r criw yma o wirfoddolwyr Heddlu De Cymru ar y Maes yn barod i helpu.

Ym mis Gorffennaf fe gyhoeddodd Heddlu De Cymru y bydd swyddogion heddlu arbenigol, gan gynnwys "llawer" mewn dillad plaen, yn yr Eisteddfod er mwyn "atal, canfod ac amharu ar droseddu".

Mae'r rhan fwyaf o unedau stondinwyr yn llai eleni ond mae'r croeso yr un mor gynnes - ac oes mae 'na baned yn Merched y Wawr!

"Dewch mewn," medd Tegwen Morris, y Cyfarwyddwr Cenedlaethol.

Mae'n ddiwrnod cystadlaethau y bandiau pres - ac mae Hanna Brotheridge o Gaernarfon yn barod i gystadlu gyda Band Porthaethwy - y gystadleuaeth toc cyn 13:00.

Fe fyddan nhw yn cystadlu am Gwpan Ivor Jarvis a £500.

Ydi mae'r stondinau ar agor ac eisteddfodwyr yn dechrau cyrraedd y Maes ar Barc Ynysangharad.

Pa ffordd well i ddechrau'r Eisteddfod na rhedeg 5k ben bore?

Mae dros 100 o redwyr wedi bod yn rhedeg y park run eisteddfodol ers 09:00 a 15 wedi gwirfoddoli i gadw rhedwyr yn saff yn Grangetown, Rhiwbeina, Pontypridd ac Ynys-y-bwl!

Dafydd Trystan - rhedwr profiadol o Benderyn sy'n arwain.

Ffynhonnell y llun, Dafydd Trystan

Cofiwch am raglenni Radio Cymru gydol y dydd o'r Maes.

Un ffaith ddiddorol gan yr Athro Jamie Medhurst o Brifysgol Aberystwyth yw bod y BBC wedi dechrau darlledu o'r Brifwyl union ganrif yn ôl!

Enillydd y goron yn 1924 oedd Prosser Rhys am ei bryddest ddadleuol 'Atgof' ac fe fydd cryn sylw iddi ar y maes eleni.

Erbyn hyn mae gwasanaeth Metro De Cymru yn weithredol yn yr ardal.

O fewn ardal Metro De Cymru bydd trenau ychwanegol yn ystod wythnos yr Eisteddfod a fydd yn rhedeg o Gaerdydd i Bontypridd tan ddiwedd y digwyddiad olaf bob nos.

Mae gorsaf drenau Pontypridd wedi’i lleoli bum munud ar droed o’r Maes, a 25 munud ar droed o Faes B.

Mae trenau'n rhedeg yn uniongyrchol o Gaerdydd Canolog i Ferthyr Tudful, Aberdâr a Threherbert, a phob un yn galw ym Mhontypridd.

Os ydych yn bwriadu teithio o Ben-y-bont ar Ogwr, Ynys y Barri, Penarth neu Rymni, bydd angen i chi newid yng ngorsafoedd Caerdydd Heol y Frenhines neu Gaerdydd Canolog.

X (Twitter gynt)
X

Ie yn wir pob lwc i'r holl gystadleuwyr - 184 cystadleuaeth!

Mae ardaloedd ar draws sir Rhondda Cynon Taf wedi bod yn rhan o groesawu'r Eisteddfod ac wedi codi dros £300,000 mewn cyfnod byr, medd Llywydd y Brifwyl Cennard Davies.

Ar draws y sir mae nifer wedi bod yn arddangos eu croeso cynnes.

Mae eisteddfodwyr yn cael eu hannog i gyrraedd y Maes ar drafnidiaeth gyhoeddus neu i barcio, os yn gyrru, yn y meysydd parcio a theithio penodol.

Mae Pontypridd yn dref brysur ar y gorau, medd y trefnwyr, a gall traffig fod yn broblem ar ddiwrnod arferol.

Wedi misoedd lawer o baratoi mae'n ddiwrnod cyntaf Eisteddfod Genedlaethol Rhondda Cynon Taf 2024.

Eisoes mae eisteddfodwyr ar y Maes - ym Mharc Ynysangharad ym Mhontypridd.

Hefyd ar y Maes mae gohebwyr Cymru Fyw - croeso i'n llif byw!