Mae'r BBC wedi ysgrifennu at Huw Edwards yn gofyn iddo ddychwelyd dros £200,000 a gafodd ei dalu iddo ar ôl cael ei arestio am greu delweddau anweddus o blant.

Mewn llythyr at staff dywedodd Cadeirydd y BBC, Samir Shah fod Edwards wedi ymddwyn yn anonest, gan ddweud bod y gorfforaeth yn credu ei fod wedi cymryd ei gyflog er ei fod yn gwybod ei fod am bledio’n euog i’r troseddau.

Mae'r BBC hefyd wedi cyhoeddi y bydd adolygiad annibynnol i ddiwylliant y gweithle.

Mae'r gorfforaeth hefyd yn credu fod y digwyddiadau wedi tynnu sylw at faterion anghydbwysedd pŵer yn y gweithle.

Daeth cadarnhad ddoe fod Edwards wedi'i ddiarddel o Orsedd Cymru gan Lys yr Eisteddfod.

Dyma'r foment fydd yn aros yn y cof i sawl un.

Roedd pawb yn y Pafiliwn ar eu traed wrth i'r cyn-bostfeistr, Noel Thomas gael ei urddo i'r Orsedd.

Roedd Noel Thomas yn emosiynol iawn wedi iddo gael ei urddo bore 'ma.

Yn siarad â Tudur Owen ar raglen Eisteddfod S4C, dywedodd Mr Thomas ei fod yn "glod mawr, ac i fod ymysg rhai o'r bobl 'ma sydd wedi cael yr un fath â fi heddiw".

"Ac i feddwl mod i wedi gorfod disgwyl ugain mlynedd os lici di, a wnes i 'rioed meddwl byswn i'n mynd ar y stage 'na."

Cyn parhau i gerdded o amgylch y maes, dywedodd wrth Tudur Owen ei fod yn dal i wrando ar ei raglen Radio Cymru bob bore Gwener a Sadwrn!

Ffynhonnell y llun, S4C

Yn y gynhadledd i'r wasg y bore 'ma, dywedodd Prif Weithredwr yr Eisteddfod, Betsan Moses bod yn "rhaid i ni barchu'r penderfyniad" i atal y Fedal Ddrama eleni.

Dywedodd hefyd bod y penderfyniad "wedi mynd trwy broses o lywodraethiant" a bod "prosesau wedi cael eu dilyn".

Mae'r Eisteddfod wedi cadarnhau nad oedd y cystadleuwyr eu hunain wedi cael gwybod y rheswm pam y cafodd y Fedal Ddrama ei hatal eleni.

Dywedodd llefarydd hefyd bod y cystadleuwyr wedi derbyn yr un wybodaeth â phawb arall.

Y fedal oedd i fod yn brif seremoni yn y Pafiliwn dydd Iau, cyn iddi gael ei chanslo.

Darllenwch ragor yma.

Mae'r seremoni ar ben ac mae'r haul yn gwenu ar yr Orsedd wrth iddyn nhw adael y Pafiliwn.

Cafodd 49 o bobl eu hurddo i'r Orsedd mewn seremoni yn y Pafiliwn y bore 'ma.

Roedd y gynulleidfa ar eu traed i longyfarch Noel Thomas wrth iddo gael ei urddo i'r Orsedd.

Roedd y gyn-bostfeistr yn ei ddagrau wrth gael ei gyfarch gan yr Archdderwydd, Mererid Hopwood.

Cafodd mam a'i merch eu derbyn i'r Orsedd yn swyddogol - yr arbenigwr bwyd Nerys Howell, a'i merch, y chwaraewr rygbi Elinor Snowsill, enillodd 76 o gapiau dros Gymru, cyn iddi ymddeol y llynedd.

Dywedodd Elinor: "I neud e wrth ochr mam ma' fe'n rili sbesial, achos hi sydd wedi bod yn un o brif gefnogwyr fi dros y blynyddoedd."

Maswr y Merched ydi ei henw barddol.

Mae'r gynulleidfa ar eu traed ac ambell ddeigryn wrth i Noel Thomas gael ei urddo i'r orsedd.

Mae'r cyn-bostfeistr o Fôn, gafodd ei garcharu ar gam fel rhan o helynt cyfrifiaduron Horizon Swyddfa'r Post am gael ei adnabod fel 'Noel o'r Iard'.

Dywedodd: "Fel un o hogia Sir Fôn yn cael fy anrhydeddu ymysg rhai llawer gwell na fi, neu bobl dwi 'di sbio fyny arnyn nhw, mae'n anrhydedd ofnadwy."

Mae'n derbyn y Wisg Las, am ei gyfraniad i'w fro.

Mae Gerallt Pennant yn wyneb cyfarwydd i sawl un fel un o gyflwynwyr y rhaglen Heno yn ogystal â chyflwyno Galwad Cynnar ar BBC Radio Cymru.

Cafodd ei urddo gyda'r Wisg Las yn y Pafiliwn.

Bydd yn cael ei adnabod fel Gerallt Derwyn Bach.

Mae cadeirydd Cymdeithas yr Iaith Gymraeg, Joseff Gnagbo, wedi derbyn y Wisg Las.

Mae'n geisiwr lloches o'r Arfordir Ifori, ac wedi bod yn diwtor Cymraeg ail iaith yng Nghaerdydd.

Ymhlith y bobl i dderbyn y Wisg Werdd yn y Pafiliwn y bore 'ma am eu cyfraniad i fyd y celfyddydau mae Angharad Lee.

Hi oedd yn gyfrifol am gynhyrchu'r ddrama gerdd Nia Ben Aur yn yr Eisteddfod eleni.

Yn ogystal ag un o arweinyddion Côr yr Eisteddfod, Elin Llywelyn-Williams, sy'n ddirprwy bennaeth Ysgol Llwyncelyn yn y Rhondda.

Wrth siarad yng nghynhadledd y wasg, dywedodd prif weithredwr yr Eisteddfod, Betsan Moses eu bod wedi gwneud “gwaith cynnal a chadw” i’r maes ar ôl y glaw ddoe.

Ychwanegodd eu bod hefyd wedi gwneud “gwaith cynnal a chadw yn y meysydd carafanau” ac yn annog pobl i beidio symud eu ceir er mwyn sicrhau bod modd i bobl adael y safle ddydd Sul.

Oherwydd y glaw, dywedodd eu bod “wedi gorfod neud rhai newidiadau er mwyn gwarchod llwyfan y maes” ddoe ond mae'n gobeithio y bydd y perfformio yn ailddechrau am 12.

Wrth sôn am Maes B, dywedodd fod “popeth wedi mynd hwylus".

Er nad ydyn nhw’n cyhoeddi niferoedd sy’n dod i’r eisteddfod, dywedodd eu bod yn “fwy na hapus" gyda'r niferoedd.

Mae'r seremoni i anrhydeddu pobl i'r Orsedd wedi dechrau gyda'r Archdderwydd, Mererid Hopwood yn croesawu pawb i'r Pafiliwn.

Mae'r pafiliwn yn llawn ar gyfer y seremoni i dderbyn aelodau newydd i'r Orsedd.

Mae'r aelodau newydd yn eistedd yn y gynulleidfa ac yn barod i gamu ar y llwyfan i gael eu cyfarch gan yr Archdderwydd.

Y bore 'ma yn y Pafiliwn bydd aelodau newydd yn cael eu derbyn i'r Orsedd ac mae pobl yn ciwio yno'n barod.

Eleni mae 49 aelod newydd gan gynnwys ambell wyneb cyfarwydd fel y darlledwr Gerallt Pennant a Noel Thomas o Fôn a gafodd ei garcharu ar gam yn sgîl y sgandal Swyddfa Bost.

Mae rhestr llawn o'r rhai fydd yn cael eu derbyn i'r Orsedd yma.

Mae 'na alw am fwy o eglurhad gan yr Eisteddfod ynglŷn â pham y cafodd y Fedal Ddrama ei hatal eleni.

Y fedal oedd i fod yn brif ddefod yn y Pafiliwn dydd Iau, cyn iddi gael ei chanslo.

Mae'r penderfyniad wedi "peri dryswch" ar faes yr Eisteddfod, yn ôl Cefin Roberts, cyn-enillydd y Fedal Ddrama a chyn-gyfarwyddwr y Theatr Genedlaethol.

Yn siarad ar Dros Frecwast dydd Gwener, dywedodd Mr Roberts ei bod hi'n "ofynnol i'r Eisteddfod roi dipyn bach mwy o eglurhad i bobl erbyn hyn".

Ychwanegodd prif weithredwr yr Eisteddfod, Betsan Moses, fore Gwener ei bod hi'n "bwysig ein bod ni'n parchu'r broses a hefyd parchu cyfrinachedd".

Darllenwch ragor yma.

Yn dilyn y glaw ddoe, mae 'na dractor wedi bod ar y maes y bore 'ma er mwyn creu tyllau yn y tir.

Mae hi'n sychach o lawer dan draed heddiw nag yr oedd hi ddoe.

Mi wnaeth y glaw effeithio ar sawl digwyddiad, gan gynnwys perfformiadau ar Lwyfan y Maes.

Mae 'na ddegau o wirfoddolwyr lleol yn croesawu pobl wrth iddyn nhw gyrraedd maes yr Eisteddfod.

Dau o'r rheiny ydi Osian a Gwion.

Ar ôl diwrnod gwlyb ar y maes ddoe, mae awyr las i'w gweld ym Mharc Ynysangharad y bore 'ma.