Yn ymateb i'r golled dywedodd Richard Tunnicliffe o Lafur: "Hoffwn longyfarch Lindsay ar ei fuddugoliaeth, ac rwyf am ddiolch i bawb a roddodd eu hyder ynof drwy bleidleisio dros Lafur Cymru.

"Rwy'n siŵr fy mod i'n siarad dros bawb yn yr ystafell hon pan ddywedaf nad oedd neb yn disgwyl yr etholiad hwn.

"Gwnaethom ein gorau i gynnal ymgyrch gadarnhaol, un a roddodd pryderon pobl Caerffili a'r cymoedd wrth ei galon.

"Felly, er ein bod wedi colli heddiw, mi wnaf i roi fy ngorau wrth ymgyrchu erbyn mis Mai.

"Bydd gennym gyfle i benderfynu eto gyda system newydd a chyfle newydd i siapio ein gwlad."

"Mae Cymru ar ddechrau arweinyddiaeth newydd - Cymru newydd", meddai Lindsay Whittle sydd wedi ennill yn etholaeth Caerffili ar ei 14eg ymgais.

Mae'n annog Caerdydd a San Steffan i wrando gan ddweud ei fod eisiau "bargen well" i bob cwr o Gymru.

"Mae angen i'r pleidiau mawr eistedd i fyny a talu sylw.

"Bydd yn anrhydedd i mi eich gwasanaethu fel eich aelod newydd o’r Senedd.

“Rwyf wedi treulio fy mywyd cyfan yn ymladd dros y gymuned hon, ac ni fyddaf yn stopio nawr."

Ffynhonnell y llun, Mark Lewis/BBC

Wrth annerch y dorf yng Nghaerffili roedd Lindsay Whittle dan deimlad yn talu teyrnged i Hefin David.

"Er bod ni’n hapus iawn yn rhai pleidiau heno, mae’n bwysig iawn bod ni’n cofio pam bo’ ni yma heno, o dan amgylchiadau trist iawn.

"Rwy’n falch iawn i allu talu teyrnged eto i Hefin David, ac i’w deulu a’i ffrindiau rwy’ eisiau cydymdeimlo â nhw unwaith eto.

"Bydd e’n anodd iawn ei ddilyn ef... ‘nai byth lenwi ei ‘sgidie fe, ond dwi’n gaddo y bydda i’n cerdded yr un llwybr ag ef, ac alla’i ddim rhoi teyrnged gwell i ddyn gwych."

Ffynhonnell y llun, Mark Lewis

Lindsay Whittle, Plaid Cymru - 15,961

Llŷr Powell, Reform - 12,113

Richard Tunnicliffe, Llafur - 3,713

Gareth Potter, Ceidwadwyr - 690

Gareth Hughes, Gwyrdd - 516

Steve Aicheler, Democratiaid Rhyddfrydol - 497

Anthony Cook, Gwlad - 117

Roger Quilliam, UKIP - 79

Lindsay Whittle sydd wedi ei ethol gyda mwyafrif o bron i 4,000.

Ffynhonnell y llun, Mark Lewis/BBC

Mae ymgeiswyr eraill yn llongyfarch Lindsay Whittle o Blaid Cymru.

Daniel Davies
Gohebydd Gwleidyddol BBC Cymru

Mae’r cyfri wedi gorffen a’r ymgeiswyr wedi ymgasglu mewn cornel o’r neuadd. Fe fydd 'na ganlyniad cyn bo hir.

Mae'n ymddangos ein bod ni'n agosáu at gael canlyniad yng Nghaerffili. Fe allwch chi wylio'r cyhoeddiad yn fyw drwy glicio uchod.

Mae Richard Garner, golygydd gwleidyddol Caerphilly Observer yn dweud ei fod yn "eithaf sicr" mai Lindsay Whittle o Blaid Cymru fydd yn ennill yr isetholiad.

Ychwanegodd bod llawer o aelodau'r blaid "tu allan i ddrws y ganolfan hamdden yn aros i ddod mewn".

Mae ymgeisydd Llafur, Richard Tunnicliffe, hefyd wedi cyrraedd erbyn hyn, ac mae disgwyl y canlyniad yn fuan.

Mae disgwyl i'r blaid ddod yn drydydd.

Mae'r ffaith bod Plaid Cymru'n fodlon rhoi ei harweinydd, Rhun ap Iorwerth, o flaen y camerâu yn arwydd o sut mae'r blaid yn teimlo ar hyn o bryd.

Wrth siarad â chynulleidfa o'r wasg, rhoddodd Rhun ap Iorwerth y gystadleuaeth yng nghyd-destun yr etholiad flwyddyn nesaf, gan ddweud bod ei blaid "yn benderfynol o arwain y llywodraeth fis Mai nesaf".

Yn ôl Alex Barros-Curtis, AS Gorllewin Caerdydd mae pobl leol wedi teimlo fel bod "rhaid pleidleisio dros Blaid Cymru er mwyn sicrhau nad yw Reform yn ennill".

Wrth gydnabod ei bod hi'n "noson anodd" i Lafur ac yn "siom" i'w ymgeisydd Richard Tunnicliffe, mae Reform wedi bod "ynghanol sgyrsiau".

"Ond dydy hynny ddim yn golygu yn awtomatig mai’r un safbwynt yw hi ar draws holl etholaethau’r Senedd cyn yr etholiad fydd gyda ni ym mis Mai."

Tra'n siarad â Teleri Glyn Jones o BBC Cymru dywedodd Llŷr Powell ei fod wedi dioddef "ymosodiadau" ar ei eiddo a'i swyddfa yn ystod yr ymgyrch.

"Mae'n eithaf trist bod ein proses ddemocrataidd wedi dod dan ymosodiad gan y grŵp milwriaethus", dywedodd Mr Powell.

Ychwanegodd ei fod yn "falch" o'r ymgyrch y mae ef a'i dîm wedi'i chynnal.

Ffynhonnell y llun, Mark Lewis

Mae Lindsay Whittle, Plaid Cymru yn dweud bod yr isetholiad wedi bod yn "frwydr dda" ac mae'r noson yn addo bod yn un "cyffrous iawn".

"O'n i'n cofio nôl i adeg Dr Phil Williams yn 1968 pan oedd gwleidyddiaeth yn llawer mwy cyffrous - ond rwy'n teimlo bod [cyffro gwleidyddiaeth] yn dod yn ôl nawr.

"Ry' ni wedi cael diwrnod gwych, diwrnod gwych.

"Llawer o bobl ifanc allan a lot fawr o hunluniau. Mae wedi bod yn anhygoel."

Ffynhonnell y llun, Mark Lewis/BBC

Mae'r Dirprwy Brif Weinidog, Huw Irranca-Davies, wedi dweud y bydd rhaid i Lafur ddysgu gwersi o'r isetholiad yma ac arwain ymgyrch bositif ar gyfer Etholiadau Senedd Cymru yn 2026.

"Mae wedi bod ymgyrch anodd iawn, ond ry'n ni wedi bod yn optimistaidd a phositif gyda ymgeisydd ardderchog yn Richard.

"Bydd rhaid i ni edrych yn ôl a gwrando ar yr hyn wnaethon ni glywed ar y stepen drws a symud ymlaen, achos mae 'na etholiad enfawr mis Mai flwyddyn nesaf..."

Mae cyn-Ysgrifennydd Gwladol Cymru, David TC Davies, yng Nghaerffili ar gyfer y cyfri.

Mae'n argoeli i fod yn noson anodd i'r Ceidwadwyr, gyda Peter Fox AS yn dweud fod heno am fod yn "ras dau geffyl" rhwng Plaid Cymru a Reform UK.

Roedd yna rai ebychiadau yn y neuadd pan gyhoeddwyd mai 33,736 ydy'r nifer sydd wedi pleidleisio, neu 50.43% o etholwyr cymwys.

Y dybiaeth gan lawer yw po uchaf y nifer a bleidleisiodd, y gorau i Reform.

Mae hynny'n rhywbeth sydd wedi cael ei grybwyll wrth ohebwyr y BBC yn y cyfri gan ddau uwch swyddog Reform heno.

Ond mae Plaid Cymru yn gwrthod hynny, gyda'r ymgeisydd Lindsay Whittle yn dweud eu bod wedi cael eu "syfrdanu" gan nifer y gefnogaeth iddynt gan bleidleiswyr iau.

Ffynhonnell y llun, Matthew Horwood

Rydyn ni wedi clywed gan Llŷr Powell, ymgeisydd Reform, sy'n dawel hyderus o lwyddiant.

Mae'r ymgyrch wedi bod yn "un dda" meddai, ond yn "flinedig".

"Rydym wedi llwyddo i fod ar draws yr holl etholaeth.

"Pan wyt ti'n edrych ar le wnaethom ni ddechrau ein hymgyrch, wel llechen lan oedd gyda ni, dim byd mewn gwirionedd.

"Felly, roedd rhaid i ni fynd allan a dod o hyd i lawer o bleidleiswyr.

"Fe wnaethon ni ddod o hyd i lot o gefnogaeth. Roedd pobl yn fodlon rhoi ein harwyddion lan ac roedd busnesau yn rhoi cefnogaeth dda i ni."

Ffynhonnell y llun, Mark Lewis/BBC

Ond yn ôl y sylwebydd gwleidyddol Will Hayward, roedd y sgwrs yn awgrym bod Reform wedi colli.

"Dyna beth darodd fi.

"Roedd y sgwrs yna'n dangos dyn sydd yn gwybod dyw e ddim am gymryd swydd newydd heno."

Gyda disgwyl canlyniad o fewn yr oriau nesaf, mae'n gadael digon o amser i chi fwynhau pennod ddiweddara' podlediad Gwleidydda.

Ymhen chwe mis fe fydd etholiad llawn i'r Senedd yn digwydd, a system bleidleisio newydd yn cael ei defnyddio - fformiwla D'Hondt.

Dyna sy'n cael sylw Richard Wyn Jones a Vaughan Roderick yn y bennod - gyda Richard yn dadansoddi beth fydd y canran o bledleisiau tebygol fydd ei angen ar y pleidiau i ennill sedd yn y bae.

Gwrandewch ar BBC Sounds a cofiwch y bydd rhifyn newydd o'r podlediad yn trafod y canlyniad yng Nghaerffili ar gael fore Gwener.

Ar ôl gorffen cam cyntaf y cyfri lle maent yn gwirio bod y papurau yn gymwys, maen nhw nawr ar yr ail gam lle mae'r holl bapurau pleidleisio yn cael eu rhannu yn bentyrrau ar wahân yn ôl pa blaid yr oedd pleidleiswyr wedi'i chefnogi.

Mae sôn wedi bod am ganlyniad tua 02:00 neu 03:00 - er nad oes dim byd yn bendant.