Dros Frecwast
BBC Radio Cymru

Yn dilyn noson hanesyddol, bydd rhaglen Dros Frecwast yn rhoi sylw i'r canlyniad a'r holl ymateb rhwng 07:00 a 09:00 y bore 'ma.

Bydd gwleidyddion a thrigolion lleol yn cadw cwmni i Kate Crockett wrth iddi ddod â'r diweddaraf yn fyw o Gaerffili.

Gallwch wrando ar y rhaglen yn fyw heb orfod gadael y llif byw trwy glicio ar yr eicon ar dop y llif, neu ar BBC Sounds.

Ffynhonnell y llun, Mark Lewis

Roedd digon o gamerâu a gohebwyr yng Nghanolfan Hamdden Caerffili dros nos yn disgwyl am y canlyniad.

O’r blychau cyntaf o bleidleisiau yn cyrraedd i’r neuadd wag wedi’r canlyniad, roedd digon o gyffro i ddogfennu.

Dyma oriel luniau BBC Cymru Fyw o noson hanesyddol.

Lindsay Whittle, Plaid Cymru - 15,961

Llŷr Powell, Reform - 12,113

Richard Tunnicliffe, Llafur - 3,713

Gareth Potter, Ceidwadwyr - 690

Gareth Hughes, Y Blaid Werdd - 516

Steve Aicheler, Democratiaid Rhyddfrydol - 497

Anthony Cook, Gwlad - 117

Roger Quilliam, UKIP - 79

Os ydych chi'n ymuno â ni y bore 'ma, dyma gipolwg o'r hyn sydd wedi bod yn digwydd dros nos:

• Fe wnaeth ymgeisydd Plaid Cymru, Lindsay Whittle ennill gyda 47% o’r bleidlais. Reform UK oedd yn ail gyda 35% o’r bleidlais, a Llafur ymhell ar eu hôl gyda 11% o’r bleidlais
• Yn ei araith wedi iddo ennill, fe wnaeth Whittle alw ar y llywodraethau yng Nghaerdydd a San Steffan i wrando, gan ddweud ei fod eisiau “bargen well” i bob cornel o Gymru
• Fe wnaeth arweinydd Plaid Cymru, Rhun ap Iorwerth ddweud fod pobl Caerffili wedi pleidleisio “yn uchel ac yn glir” am weledigaeth gadarnhaol o'i blaid
• Dywedodd Llŷr Powell, ymgeisydd Reform UK, er gwaethaf y golled, y bydd ei blaid yn ffurfio llywodraeth nesaf Cymru yn 2026

• Roedd y nifer a bleidleisiodd yn uchel, gyda 50.43% o bleidleiswyr cymwys yn cymryd rhan - y tro cyntaf i isetholiad i Senedd Cymru gyrraedd dros 50% o bleidleiswyr
• Fe wnaeth ymgeisydd y Blaid Lafur, Richard Tunnicliffe, roi teyrnged i gyn-aelod Caerffili, Hefin David AS, gan ei ddisgrifio fel ffrind a mentor
• Dywedodd y Prif Weinidog Eluned Morgan fod yr isetholiad wedi ei gynnal yn yr “amgylchiadau anoddaf”, gan ychwanegu bod y blaid wedi clywed rhwystredigaethau pobl “ar garreg y drws yng Nghaerffili nad yw’r angen i deimlo newid ym mywydau pobl wedi bod yn ddigon cyflym”

Croeso yn ôl aton ni ar y llif byw.

Mae hi wedi bod yn noson fawr i bobl Caerffili, i wleidyddiaeth yng Nghymru, ac yn enwedig i Blaid Cymru.

Nhw sydd wedi ennill isetholiad Caerffili i Senedd Cymru, gyda'u hymgeisydd Lindsay Whittle yn dod i'r brig o flaen Reform UK.

Daeth Llafur yn drydydd - dros 12,000 o bleidleisiau y tu ôl i Blaid Cymru.

Arhoswch gyda ni am yr holl ymateb i'r canlyniad, a dadansoddiad o'r hyn mae'n ei olygu, trwy gydol y bore.

Bydd saib ar y llif byw am gyfnod.

Byddwn ni'n ailddechrau am 06:30, ond yn cyfamser darllenwch fwy am y canlyniad yma, a cofiwch y bydd rhagor o ymateb ar Dros Frecwast o 07:00.

Ffynhonnell y llun, Mark Lewis/BBC

Ein gohebydd gwleidyddol ni Daniel Davies yn dadansoddi canlyniad y noson.

Daniel Davies
Gohebydd Gwleidyddol BBC Cymru

Drwy'r nos, roedd pobl yn disgwyl canlyniad agos.

Yn y diwedd roedd e'n fuddugoliaeth bendant i Blaid Cymru.

Mae ennill Caerffili wedi bod yn freuddwyd i Blaid Cymru ers degawdau. O'r diwedd - ar ôl bod yn ymgeisydd 14 o weithiau - mae Lindsay Whittle wedi llwyddo.

Mae dod yn ail yn ergyd i Reform UK. Fe wnaeth Nigel Farage ymgyrchu yn yr etholaeth dair gwaith.

Ond mae'n waeth fyth i Lafur. Dyma ganlyniad trychinebus iddyn nhw sy'n codi cwestiynau difrifol am gyfeiriad y blaid yng Nghymru a Phrydain.

Ffynhonnell y llun, Mark Lewis

Mae Liz Saville Roberts, arweinydd Plaid Cymru yn San Steffan, wedi cyhoeddi neges ar X yn llongyfarch Lindsay Whittle ar ei fuddugoliaeth.

Ffynhonnell y llun, @LSRPlaid

Dyma ymateb ymgeisydd Reform, Llŷr Powell, ar ôl dod yn ail heno.

Dywedodd y Prif Weinidog Eluned Morgan, arweinydd Llafur Cymru, mai “isetholiad oedd hwn o dan yr amgylchiadau anoddaf".

Diolchodd i ymgeisydd ei phlaid, Richard Tunnicliffe, "dyn da a safodd oherwydd ei awydd i wasanaethu ei gymuned".

Llongyfarchodd Lindsay Whittle ar ei fuddugoliaeth.

"Mae’n dychwelyd i’r Senedd, gan barhau â’i ddegawdau lawer o wasanaeth etholedig i bobl yng Nghaerffili."

Ychwanegodd, “mae Llafur Cymru wedi clywed y rhwystredigaeth ar garreg y drws yng Nghaerffili nad yw’r angen i deimlo newid ym mywydau pobl wedi bod yn ddigon cyflym.

"Rydym yn derbyn ein rhan o’r cyfrifoldeb am y canlyniad hwn.

"Rydym yn gwrando, rydym yn dysgu’r gwersi, a byddwn yn dod yn ôl yn gryfach."

Ffynhonnell y llun, Getty Images

Roedd Lindsay Whittle dan deimlad wrth dalu teyrnged i Hefin David, ac fe ddywedodd hefyd ei fod yn edrych mlaen at yr ymgyrch i Etholiadau'r Senedd 2026.

Dywedodd arweinydd Plaid Cymru, Rhun ap Iorwerth: “Heno, mae pobl Caerffili wedi siarad yn glir ac yn uchel. Maent wedi dewis gobaith dros raniad, a chynnydd dros y status quo blinedig, ac wedi cefnogi gweledigaeth gadarnhaol, o blaid Cymru.

“Mae Lindsay Whittle yn hyrwyddwr lleol diflino sy’n adnabod pob cymuned yn yr etholaeth hon o’r tu mewn allan a bydd yn cyflawni newid go iawn i bobl Caerffili.

“Mae’r canlyniad hwn yn dangos nad dim ond dewis arall yw Plaid bellach. Ni yw’r dewis go iawn i Gymru nawr, yr unig blaid sy’n gallu atal Reform a gefnogir gan filiwnyddion a chynnig dyfodol gwell sy’n gweithio i bawb.

“Mae’r neges o Gaerffili yn glir: mae Cymru’n barod am arweinyddiaeth newydd, ac mae Plaid Cymru yn arwain y ffordd.”

Ffynhonnell y llun, PA Media

Plaid Cymru: 47.4%

Reform: 36%

Llafur: 11%

Ceidwadwyr: 2%

Y Blaid Werdd: 1%

Democratiaid Rhyddfrydol: 1%

Gwlad: 0.4%

UKIP: 0.2%

Doedd Llŷr Powell heb wneud araith ar y podiwm ond wrth siarad gyda’r wasg dywedodd bod ymgyrch ei blaid yn mynd i “wella”.

Gan gyfeirio at etholiad y Senedd y flwyddyn nesaf, dywedodd: "Rwy'n credu'r mis Mai nesaf Reform fydd yn ffurfio’r llywodraeth.

"Mae mwy o bobl yn troi allan i bleidleisio nawr pan mae ganddynt plaid i gredu ynddi."

Dywedodd Powell ei fod yn flin am yr ymgyrch gan y Blaid Lafur yn yr isetholiad yma, gan ddweud:

"Rwy'n siomedig iawn, ond yn ffodus fe wnaeth y pleidleiswyr weld drwy eu hymddygiad nhw, a'r ffordd y wnaethant ddwyn sarhad yn ystod yr ymgyrch.

"Maen nhw'n haeddu bod yn y gwter yn dilyn yr ymgyrch yna."

Ffynhonnell y llun, Mark Lewis

Richard Garner o'r Caerphilly Observer yn dweud bod buddugoliaeth Linsday Whittle yn "hollol haeddiannol".

"Mae Lindsay wedi bod yma ers 50 mlynedd - yn gweithio dros ei gymuned.

"A’r hyn a darodd fi wrth wylio'r lluniau, wedi’r anerchiadau, ei fod wir yn emosiynol."