Mae'r rhybudd coch am wyntoedd cryfion bellach wedi dod i ben am 11:00.

Y gobaith felly yw bod y gwaethaf o'r gwyntoedd wedi pasio, ond mae'n bwysig pwysleisio fod sawl rhybudd difrifol yn parhau mewn grym.

Mae rhybudd oren am wynt mewn grym ar gyfer bron Cymru gyfan ers 01:00 tan 21:00 heddiw.

Mae 'na rybudd oren am law yn weithredol ar gyfer rhannau helaeth o'r canolbarth a'r de rhwng 03:00 a 18:00.

Mae rhybudd melyn ehangach am wynt mewn grym dros y wlad i gyd ers 15:00 ddydd Gwener tan 06:00 fore Sul.

Ar ben hynny oll, mae 'na rybudd melyn am law mewn grym ar gyfer rhannau helaeth o Gymru ers 15:00 ddoe, tan 21:00 heno.

Ffynhonnell y llun, Swyddfa Dywydd

Mae Cyngor Abertawe wedi dweud na fydd eu canolfannau gwastraff ac ailgylchu ar agor heddiw.

Maen nhw hefyd wedi rhoi diweddariad o ran y ffyrdd yn yr ardal:

• Yr A4118 wedi'i rwystro rhwng Cil-frwch a Parkmill/Gower Inn.
• Ffyrdd wedi cau rhwng Rhodfa'r Gors, Ffordd Cwmbach, a Ffordd Cockett wrth ymyl Eglwys Sant Pedr, Ffordd Mayals, a Glanymor.
• Coed wedi dod lawr ar ffyrdd Killan a Clasemont ond yn bosib pasio gyda gofal.
• Coed hefyd wedi disgyn ym Mynydd Gelliwastad a Ffordd Cae Cerrig, Pontarddulais.

Ffynhonnell y llun, Cyngor Abertawe

Ffynhonnell y llun, Cyngor Abertawe

Er bod y rhybudd coch yn dod i ben yn fuan, a gyda hynny'r gwaethaf o'r gwyntoedd ar ben, mae 'na hyrddiadau sylweddol yn dal i daro.

Yn yr awr ddiwethaf cafodd gwyntoedd 85mya eu cofnodi yn Aberdaron yng Ngwynedd a Chapel Curig yn Sir Conwy.

Roedd hyrddiad o 81mya yn Aber-porth, Sir Benfro hefyd.

Bydd y rhybudd coch yn dod i ben am 11:00, ond mae rhybuddion oren a melyn yn parhau mewn grym ar ôl hynny.

Mae ein gohebydd Tomos Morgan ym Mhenarth y bore 'ma yn egluro'r sefyllfa ddiweddaraf yno, ac ar draws y wlad.

Mae'r llun yma wedi'n cyrraedd ni o Rest Bay ger Porthcawl yn Sir Pen-y-bont ar Ogwr.

Mae'r gwyntoedd cryfion wedi codi to oddi ar adeilad!

Ffynhonnell y llun, Georgia Williams

Mae arweinydd Cymdeithas Llywodraeth Leol Cymru ac arweinydd Cyngor Rhondda Cynon Taf, Andrew Morgan, wedi dweud eu bod fwy na thebyg wedi lansio "yr ymateb brys mwya' ar gyfer y storm ers sefydlu cyngor Rhondda Cynon Taf."

Wrth siarad ar BBC Radio Wales dywedodd ei bod yn ymddangos mai difrod i goed a'r gwyntoedd cryfion yw'r broblem fwyaf hyd yma.

"Yn ardal Rhondda Cynon Taf mae yna ddwsinau o goed wedi disgyn, a dim llawer o lifogydd," meddai.

"Roedden ni yn bryderus ddoe yn seiliedig ar gyngor gan Gyfoeth Naturiol Cymru.

"Mae hi yn ymddangos cyn belled nad yw'r afonydd wedi ymateb i'r un graddau, ac mae'r modelu ar hyn o bryd yn awgrymu na fydd yna lifogydd arwyddocaol."

Mae mwy o luniau trawiadol yn ein cyrraedd ni o Gaerdydd, ble mae sawl coeden wedi cael ei thynnu o'r llawr gan y gwyntoedd cryfion.

Ffynhonnell y llun, Akin Lasebikan

Mae'n ymddangos fod llifogydd yn ffurfio ar draws y wlad yn sgil y tywydd garw.

Mae'r llun yma wedi cyrraedd gwasanaeth BBC Weather Watchers o'r Wyddgrug yn Sir y Fflint.

Ffynhonnell y llun, BBC Weather Watchers/snapshotjo

Dyma restr diweddaraf Cyngor Gwynedd o'r ffyrdd sydd ynghau yn y sir.

• A497 Boduan-Pwllheli
• A499 Y Ffôr-Pwllheli
• A487 Corris Uchaf-Minffordd
• A470 ger Cross Foxes
• A497 Llanystumdwy-Pentrefelin-Porthmadog
• B4411 Cricieth-Rhoslan
• A497 o gylchfan Minffordd i’r Cob
• A493 o gylchfan yr A470 i Benmaenpool
• Goleuadau traffig ar yr A499 ger Carreg y Defaid

Mae'r cyngor yn dweud bod "difrod a thrafferthion mewn nifer o ardaloedd eraill ac mae ein staff yn gweithio mewn amgylchiadau anodd iawn".

Mae Cyfoeth Naturiol Cymru, dolen allanol wedi cynyddu difrifoldeb rhai o'r rhybuddion llifogydd sydd mewn grym.

Mae nifer y rhybuddion llifogydd wedi cynyddu o dri i 14 bellach - y mwyafrif yn y canolbarth.

Maen nhw'n cynnwys ardaloedd o amgylch Afon Gwy ger Llanfair-ym-muallt, Afon Teifi yn Llanbedr Pont Steffan ac Afon Wysg yn Aberhonddu.

Does dim "rhybuddion difrifol" mewn grym hyd yma, ond mae bron i 60 o rybuddion "byddwch yn barod".

Mae Maes Awyr Caerdydd bellach wedi cyhoeddi na fydd unrhyw hediadau'n gadael na'n cyrraedd tan o leiaf 13:00 heddiw.

Roedden nhw wedi gobeithio ailddechrau hediadau am 11:00 yn wreiddiol, sef pryd mae'r rhybudd coch yn dod i ben.

Ar Heol y Gadeirlan yn y brifddinas, fe wnaeth coeden ddisgyn ar geir dros nos.

Mae'n ymddangos bod Cyngor Caerdydd wedi bod yno y bore 'ma i dorri'r goeden yn ddarnau.

Aled Scourfield
Gohebydd BBC Cymru

Mae'n gohebydd Aled Scourfield wedi bod yn gweld effaith y storm yng ngogledd Sir Benfro ac yn crynhoi y gwaith clirio sydd o flaen Cyngor Sir Penfro.

Rhan o goeden wedi rhwystro ffordd yn Ninas Powys ger Caerdydd.

Ffynhonnell y llun, Hilary Olden Mills

Dyma'r olygfa wrth i'r tonnau daro Ynys y Barri ym Mro Morgannwg y bore 'ma.

Bydd y llanw ar ei uchaf yn yr ardal honno toc wedi 10:30.

Mae'r Swyddfa Dywydd wedi diweddaru un rhybudd sydd mewn grym yng Nghymru, a hwnnw yw'r un melyn am law, sy'n weithredol ar gyfer mwyafrif y wlad.

Roedd hwnnw i fod yn dod i ben am hanner dydd, ond bellach mae wedi cael ei ymestyn tan 21:00 heno.

Bydd y rhybudd coch am wyntoedd cryfion yn dod i ben am 11:00, ond wedi i hwnnw orffen bydd pedwar rhybudd yn parhau mewn grym.

Mae dau o'r rheiny'n oren - un am wynt, ac un arall am law - a dau yn felyn - eto, un am wynt, a'r llall am law.

Ffynhonnell y llun, Swyddfa Dywydd

Tua 34,500 o gartrefi sydd heb drydan yn ne Cymru bellach, yn ôl y National Grid.

Roedd tua 38,000 o gartrefi heb drydan am 08:00 pan oedd pethau ar eu gwaethaf hyd yma.

Ond mae pethau'n newid yn sydyn o ran cyflenwadau yn cael eu colli a'u hadfer. Fel gwelwch chi o'r llun, mae'r toriadau pŵer ym mhobman.

Does dim modd cael ffigyrau byw o ran niferoedd yn y gogledd, ond mae modd cadw golwg ar ardaloedd unigol trwy eu gwefan, dolen allanol.

Ffynhonnell y llun, Mapbox/OpenStreetMap/National Grid

A hithau wedi gwawrio mae lluniau'n ein cyrraedd o goed wedi disgyn ar y ffyrdd ledled Cymru.

Mae'r llun yma wedi'n cyrraedd ni gan wasanaeth BBC Weather Watchers o Landudno yn Sir Conwy.

Mae'n ymddangos fel bod difrod wedi cael ei achosi i'r adeiladau ar y pier yno.

Ffynhonnell y llun, BBC Weather Watchers/Shropshire Liam

Ar y ffyrdd, mae degau ar ddegau ynghau oherwydd llifogydd, gwyntoedd cryfion neu goed wedi disgyn. Yn eu plith mae'r:

• M4 mewn sawl man - gan gynnwys Llansawel, Pen-y-bont a Chasnewydd
• M48 dros Bont Hafren i'r ddau gyfeiriad
• A477 dros Bont Cleddau yn Sir Benfro
• A40 mewn sawl man yn y gorllewin
• A470 yn Nolgellau, Rhaeadr Gwy a Merthyr Tudful
• A55 dros Bont Britannia

Mae Heddlu'r Gogledd wedi rhybuddio hefyd fod "sawl ffordd ar gau" yn ardaloedd Porthmadog a Chricieth am fod coed wedi disgyn.