Tha sinn a-nise a' gluasad gu Sabhal Mòr Ostaig.

Bha taic thar-phàrtaidh aig ìre 2 gum bu chòir inbhe SMO àrdachadh is comas a thoirt dhan cholaiste ceuman a thoirt seachad.

Tha Willie Rennie le atharrachadh gum feumadh Riaghaltas na h-Alba gnìomhan a ghabhail gus taic a chur ri SMO a leasachadh mar ionad nàiseanta 'son cànan, cultar is foghlam na Gàidlig.

Thuirt e gu bheil aonta làidir ann gu bheil seo deatamach.

Thuirt Ceit Fhoirbeis gu bheil deagh chuimhne aice air goireasan foghlaim ann am FtMG le Gàidhlig stuicte thairis air leabhraichean Bheurla - bidh is gu leòr eile.

Thuirt i gun cuir an Riaghaltas taic ris na h-atharrachaidhean seo uile.

Seo a-nise atharrachaidhean bho Ross Greer a thaobh ghoireasan foghlaim. Nam measg gum feumadh Riaghaltas na h-Alba beachdachadh air stuth foghlaim sam bith ùr ann am Beurla a dhèanamh sa Ghàidhlig cuideachd.

Tha Pam Duncan-Glancy le moladh a bheireadh air an SQA barrachd theisteanasan sa Ghàidhlig a chruthachadh agus fiosrachadh is pàipearan fhoillseachadh sa Ghàidhlig. Thuirt i gu bheil sgoiltean air seo a thogail leatha.

Thuirt Mìchael Marra gu bheil 20 bliadhna ann bho Achd na Gàidhlig is gu bheil cunnart ann nach bi a' Ghàidhlig ann an ceann 20 bliadhna.

Tha Ross Greer ag ràdh gu bheil fìor staing ann is atharrachadh bhuaithe ag iarraidh air Bòrd na Gàidhlig aithisg ullachadh gach dà bhliadhna gus measadh a dhèanamh air targaidean san ro-innleachd ùr nàiseanta.

Tha Ceit Fhoirbeis ag ràdh gu bheil seo reusanta is gun cuir an Riaghaltas taic ris.

Tha sinn a' gluasad a-nise gu atharrachaidhean air targaidean.

Bha deasbad beòthail mar-thà aig ìre 2 eadar Ceit Fhoirbeis is an Làbarach Mìchael Marra.

Tha Ceit Fhoirbeis ag ràdh gu bheil iad air an aon ràmh.

Thuirt Mgr Marra gu bheil a' Ghàidhlig ann an suidheachadh cugallach is gu bheil feum air targaidean gu math làidir.

Tha e a' togail air dachaighean far a bheil a' Ghàidhlig ga bruidhinn, is cuideachd gnothachasan is sgoiltean, is gu bheil feum air targaidean a bhith stèidhichte air seo.

Tha buill air gabhail ri seo.

Tùs an deilbh, Pàrlamaid na h-Alba

Tha bhòt ann a-nise mu mholadh Pam Duncan-Glancy gum biodh oifigear-leasachaidh ann 'son gach sgìre cànain.

Tha buill air bhòtadh na aghaidh 94-12.

Niall O'Gallagher
Fear-naidheachd poileataigeach

Air ais anns a’ Ghearran, dh’innis Ceit Fhoirbeis dhomhsa gun robh i am beachd cainnt a’ bhile a neartachadh gus a ràdh gum ‘feum’ comhairlean sgìrean cànain sònraichte a stèidheachadh seach gu ‘faod’ far a bheil a’ Ghàidhlig aig 20% den t-sluagh.

Sin an t-amas a tha aig atharrachadh 13 an ainm a’ bhuill Làbaraich Pam Duncan-Glancy.

Ach tha an leas-phrìomh mhinistear air innse don t-seòmar gun d’fhuair i comhairle laghail nach obraicheadh a leithid a thuilleadh air beachdan bho chuid na h-ùghdarrasan ionadail gum b’fheàrr leotha fuireach le ‘faod’.

Thuirt i cuideachd ge-tà, gun tuirt Comhairle nan Eilean Siar, Comhairle na Gaidhealtachd agus Comhairle Earra-Ghàidheil agus Bhòid gu robh iad uile airson gluasad “gu luath” gus sgìrean ainmeachadh ma thèid am bile troimhe.

Fianais gu bheil atharrachadh air fàire do mhuinntir nan sgìrean comhairle sin.

Tha sreath de ghluasadan eile bho Pam Duncan-Glancy is Emma Roddick air a dhol troimhe gun bhòt.

Tha buill a' bhòtadh air atharrachadh Pam Duncan-Glancy gum biodh sgìrean gan comharrachadh mar Sgìrean Cànain Sònraichte ma tha sgilean sa Ghàidhlig aig 20% den t-sluagh - is tha iad air bhòtadh na aghaidh 91-13.

Tùs an deilbh, Pàrlamaid na h-Alba

Tha Ceit Fhoirbeis a-nise a' togail air atharrachadh Pam Duncan-Glancy air oifigear-leasachaidh 'son gach sgìre cànain.

Thuirt i gu bheil sreath de dh'oifigearan-leasachaidh ann mar-thà is gun deach an lìonra seo a neartachadh bho chionn ghoirid.

Thuirt i a thaobh sgìrean cànain gum biodh cumhachd aig coimhearsnachd agus Bòrd na Gàidhlig sgìre cànain sònraichte iarraidh - is cothrom aig an Riaghaltas a dhol an sàs mura bhiodh comhairle deònach.

Is tha i ag ràdh bho chòmhraidhean aice le comhairlean aig tuath - CnES, Comhairle na Gàidhealtachd is Comhairle Earra-Ghàidheal is Bhòid - gum biodh iad 'son gluasad gu luath le sgìrean cànain - ach ma tha cinnt ann ro-làimh air meud nan sgìrean.

Tha an Leas Phrìomh Mhinistear ag ràdh gu bheil e iomchaidh gu bheilear a' tòiseachadh le sgìrean cànain oir tha iad glè chudromach, is gu bheil deasbad math air a bhith ann bho thòiseach a' phròiseis.

Ach tha i ag ràdh gu bheil "draghan oirre" mu atharrachaidhean Pam Duncan-Glancy, nach eil iad soilleir, is gum biodh iad doirbh do choimhearsnachdan is ùghdarrasan.

Thuirt i nach eil mìneachadh air meud no crìochan nan sgìrean - am biodh e stèidhichte air sgìrean comhairle, uardan comhairle, no eile, is gur dòcha gum fàgadh iad nach biodh uimhir de sgìrean cànain gan stèidheachadh.

Cuiridh an Riaghaltas nan aghaidh, tha i ag ràdh.

Tha Pam Duncan-Glancy ag ràdh gun cuireadh na molaidhean aice "dleasdanas" air ùghdarrasan ionadail sgìrean cànain a stèidheachadh.

Tha e "riatanach" tha i ag ràdh, gum bi dleasdanas ann seach roghainn.

Thuirt i cuideachd gun cuireadh seo cumhachd ann an làmhan choimhearsnachdan.

Tha Rùnaire na Slàinte dìreach air a bhith a' bruidhinn air ath-nuadhachadh a thoirt air Cùram Slàinte is Sòisealta is tha sinn dìreach gus tòiseachadh a dh'aithghearr air Bile nan Cànanan is an liosta fhada de dh'atharrachaidhean.

An toiseach bidh sreath ann mu sgìrean cànain sònraichte - a' toirt a-steach mholaidhean bho Pam Duncan-Glancy air an do chuir Misneachd am measg eile fàilte.

Tha dùil ge-tà gun cuir an Riaghaltas nan aghaidh - gheibh sinn a-mach.

Chuala Aithris na Maidne air BBC Radio nan Gàidheal an-diugh bho Thòmas MacAilpein aig Misneachd.

Thuirt e gu bheil a' bhuidheann gu mòr airson is gun tèid gabhail ris na h-atharrachaidhean a thaobh sgìrean cànain gu sònraichte - ach gum bi feum às bith de thachras air oidhirp gus na sgìrean sin a dhèanamh cho làidir is a ghabhas.

Tha am bile a' tighinn gu deireadh a shlighe tro Holyrood is 20 bliadhna ann air a' mhìos seo bho chaidh Achd na Gàidhlig na lagh.

Tha BBC Naidheachdan air a bhith a' bruidhinn ris an Oll Dòmhnall Meek, fear de dh'ailtirean an achd.

Tha t-Oll. Meek ag ràdh gu bheil e a' cur iongnadh mòr air gun tug e 20 bliadhna bile ùr a thoirt air adhart gus an reachdas a neartachadh.

Fiosrachadh ùr bhon fhear-naidheachd phoileatagach againn Niall O'Gallagher aig Holyrood.

Tha Niall ag ràdh gu bheil dùil a-nise gur ann aig 7f. a bhios a' bhòt air a' bhile.

Cur air an coire ma-thà - bidh feum againn air cupa no dhà ro dheireadh an fheasgair.

Sin blasad de na h-atharrachaidhean ùra ma-thà.

Tha gu leòr eile ann is tha dùil againn gum mair an còmhradh is bhòtadh mun deidhinn gu às dèidh 5:30f, nuair a thòisicheas an deasbad mun bhile fhèin.

Tùs an deilbh, Sabhal Mòr Ostaig

Bha aonta thar-phàrtaidh aig ìre 2 gum bu chòir inbhe Shabhal Mòr Ostaig àrdachadh is comas a thoirt dhan cholaiste ceuman a thoirt seachad cho luath 's a ghabhas.

Thuirt Ceit Fhoirbeis nach gabh amasan a' bhile a choileanadh às aonais SMO.

Tha am BPA Lib Deamach Wilie Rennie air gluasad a chur air adhart gum feumadh ministearan ceuman a ghabhail gus SMO a leasachadh mar an ionad nàiseanta airson cànan, foghlam is cultar na Gàidhlig.

Tha atharrachadh aige cuideachd gum feumadh ath-sgrùdadh air inbhe SMO beachdachadh air maoineachadh agus gnìomhan sam bith gus a' cholaiste a neartachadh.

Niall O'Gallagher
Fear-naidheachd poileataigeach

Tha dùil gun tèid Bile nan Cànanan Albannach troimhe nuair a bhòtas buill fhathast.

Chan eil e builleach soilleir, ge-tà, dè an seòrsa crutha a bhios air nuair a thig a’ bhòt.

Ron deasbad fhèin, feuchaidh buill ri atharrachadh.

Bheireadh am bile seo cumhachdan ùra don riaghaltas inbhean ùra a stèidheachadh airson na Gàidhlig – dh’fhaodadh iad buntainn ri foghlam mar eisimpleir, no air cho follaiseach agus a bhios an cànan ann an àiteachan poblach – ach bhiodh sinn an urra ri ministearan, às dèidh don bhile a dhol na lagh.

Chan eil e soilleir cùine a gheibheamaid na ciad inbhean, agus feuchaidh cuid ris an clàr-ama airson sin a dhearbhadh an-diugh.

Ach tha feadhainn cuideachd airson barrachd susbaint air taic don Ghàidhlig fhaicinn air aghaidh a’ bhile seach sin fhàgail do na riaghailtean a thig fhathast.

Thoiribh sùil mar eisimpleir air atharrachadh 23, far a bheil Pam Duncan-Glancy ag iarraidh oifigear leasachaidh fhaicinn ann an sgìrean cànain sònraichte, no atharrachadh 65 fo ainm Ross Greer, ag iarraidh plana coimhearsnachd anns gach tè dhiubh.

Chan eil an riaghaltas ag iarraidh nan atharrachaidhean sin, ach gun mhòr-chuid aig an SNP anns an t-seòmar, dh’fhaodadh na dùbhlanaich tighinn còmhla gus sparradh orra gabhail riutha.

Tha miann ann, ge-tà, sgaradh an loidhnichean pàrtaidh a sheachnadh, a dh’fhaodadh fàgail nach tèid a h-uile atharrachadh a chur gu bhòt.

Mar sin, tha làn dùil agam gun cuirear taic ris nuair a thig a’ bhot mu 7f.