Naidheachdan 11:00m

Colin Smyth

Chaidh cead a thoirt bho fhear de bhuill na Pàrlamaid Albannaich bho bhith a' dol am broinn an togalaich, agus aithrisean ann gun deach a chur fo chasaid gun do chuir e camara ann am fear de na taighean-beaga. Chaidh Colin Smyth a chur a-mach às a' phartaidh Làbarach na bu tràithe air a' mhìos rè ùine às dèidh dha a bhith air a chur fo chasaid gun robh dealbhan drabasta aige de chloinn. Tha dùil gun nochd e aig Cùirt an t-Siorraidh ann an Dùn Phrìs uaireigin.

Partaidh Uaine na h-Alba

Chaidh Ross Greer agus Gillian MacKay a thaghadh mar cho-cheannardan a' Phartaidh Uainich an seo an Alba san uair an uaireadair a dh'fhalbh. Tha an dithis bhall aig Holyrood a' dol an àite Patrick Harvie - a bha air leigeil dheth a dhreuchd - agus Lorna Slater nach do shoirbhich san fharpais airson a' cheannais.

Israel

Tha Israel air càineadh a dhèanamh air co-dhùnadh na Rìoghachd Aonaichte gus bacadh a chur orra bho bhith an làthair aig fèill armachd an Lunnainn air an ath-mhìos. Thuirt Ministreachd an Dìon gur e co-dhùnadh Israel gus leudachadh a thoirt air an iomairt aca an Gàsa a bu choireach. Thuirt iad cuideachd gum feum fuasgladh diplòmasach a bhith ann gus an cogadh a tha an sin a thoirt gu crìch.

Dotair teaghlaich fo chasaid

Chaidh dotair air a' Ghàidhealtachd a chur an grèim an co-cheangal ri aithrisean gun do sgrìobh e teachdaireachdan air Twitter (X) feuch dìmeas a dhèanamh air an tè a chaidh èigneachadh le a mhac. Chaidh an Dtr Anndra MacPhàrlain a chur an grèim Diciadain agus e fo chasaid an co-cheangal ri eucoirean conaltraidh. Chaidh a mhac, Daniel MacPhàrlain, a dhìteadh ann an 2022 gun do dh'èignich e Ellie Wison a tha bhon uair sin air a bhith ag iomairt dhaibhsan a th' air èigneachadh fhulang agus ionnsaighean feiseil o fhireannaich. Thuirt Poileas Alba gun deach fear, 61, a chur an grèim agus fo chasaid agus gun deach a sgaoileadh an uair sin le dùil gun nochd e sa chùirt uaireigin eile.

Tubaist rathaid

Tha an rathad eadar Druim nan Darach agus Loch Ailleart fhathast dùinte às dèidh tubaist rathaid tron oidhche raoir. Thachair an tubaist san robh aona charbad an sàs aig mu 11.15f. Chaidh iarraidh air dràibhearan an sgìre a tha sin a sheachnadh.

FtMG sna h-Eileanan an Iar

Tha 57% de sgoilearan a thòisich ann an clas a h-aon sna h-Eileanan an Iar a' dol tro fhoghlam tro mheadhan na Gàidhlig. 'S e sin an ìre as motha thuige seo. 'S e poileasaidh Comhairle nan Eilean Siar gun tèid sgoilearan tro mheadhan na Gàidhlig mura roghnaich am pàrantan a chaochladh. Tha dragh ann fhathast ge-tà mun chrìonadh san àireimh de sgoilearan san fharsaingeachd, agus 30% nas lugha air tòiseachdainn sa bhun-sgoil na chaidh air aghaidh chun na h-àrd-sgoile.