Naidheachdan 11:00m

An Ucràin

Cumaidh ceannardan Eòrpach sreath choinneamhan, coinneamh leis a' Cheann-suidhe Trump nam measg, a' neartachadh na teachdaireachd gum feum còirichean na h-Ucràin agus tèarainteachd na h-Eòrpa a ghlèidheadh. Tha Ceann-suidhe na h-Ucràin, Voldymyr Zelenski aig na còmhraidhean ann am Berlin an-diugh. Tha dùil gun coinnich Mgr Trump agus Ceann-Suidhe na Ruis, Vladimir Putin, Dihaoine a bhruidhinn air aonta airson fosadh sa chogadh.

Figearan riaghaltais

Sheall figearan oifigeil an riaghaltais àrdachadh gu £26bn san easbhaidh ann an cosgaisean poblach na h-Alba air a' bhliadhna ionmhais mu dheireadh agus gun robh teachd a-steach an riaghaltais bho ghnìomhachas ola agus gas a' Chuain a Tuath sìos airson na dàrna bliadhna ann an sreath. Ach bha an t-suim a chaidh a chosg air seirbheisean poblach agus sochairean ann an Alba faisg air £2,700 nas motha gach duine na bha air feadh na Rìoghachd Aonaichte.

Cala Mhalaig

Tha Cala Mhalaig a' faighinn £6.4m bho Riaghaltas na h-Alba airson goireas ùr as an cuir bàtaichean-aiseig an oidhche seachad. Thuirt Rùnaire na Còmhdhail, Fiona Hyslop, a tha a' tadhal air Malaig agus air na h-Eileanan Tarsainn an-diugh, gum fàg an leasachadh seirbheisean aiseig nas cinntiche eadar Malaig, Loch Baghasdal, Armadal agus na h-Eileanan Tarsainn. Tha dùil gun tòisich an obair ro dheireadh na bliadhna seo.

Comhairle ùr don phoileas

Chaidh iarraidh air feachdan poilis air feadh na Rìoghachd Aonaichte innse dè an cinneadh agus dùthaich dham buin feadhainn a tha fo amharas agus fo chasaid ann an cuid de chùisean eucoir. Tha Oifis na Dùthcha ag ràdh gum bu chòir dhan chomhairle ùr cuideachadh le bhith a' seachnadh na seòrsa aimhreit phoblach a bh' ann an Sasainn agus an Èirinn a Tuath san Iuchar agus san Lunastal an-uiridh.

Buaidh phròiseactan uaine air coimhearsnachdan

Gheall buill-phàrlamaid bho gach taobh gun iarr iad deasbad aig Holyrood agus aig Westminster mu bhuaidh phròiseactan cumhachd ath-nuadhachail, mar thuathan-gaoithe, air coimhearsnachdan air a' Ghàidhealtachd. Bha deasbad air a' chùis aig coinneimh ann an Inbhir Nis an-dè aig an deach a ràdh nach eil coimhearsnachdan a' faighinnn èisteachd sa phròiseas dealbhachaidh agus gu bheil luchd-leasachaaidh a' faighinn an cead fhèin.