Naidheachdan 11:00m

Tsunami

Chaidh faisg air 2m duine ann an Iapan òrdachadh a-mach às an dachaighean 's eagal ro tsunami an dèidh crith-thalmhainn mhòir far cladach a sear na Ruis. Tha suailichean tsunami mar-thà air nochdadh anns a' Chuan Shèimh, 's chaidh a ràdh ri daoine ann an Hawaii agus an California teicheadh bhon chladach.

Aithne do stàit Phailistinianich

Chaidh ministear riaghaltais às àicheadh nach eil ann am poileasaidh ùr aig Breatainn air aithne do stàit Phailistinianaich ach sop. Bha Prìomhaire Israel Benjamin Netanyahu air a ràdh nach robh e ach a' toirt duais do Hamas airson an cuid ceannairc. Ach thuirt Rùnaire na Còmhdhail Heidi Alexander gur ann a bha am poileasaidh mu dheidhinn maith an t-sluaigh Phailistinianaich.

Bàgh an Eige

Tha an Global Energy Group ag ràdh gu bheil amannan soirbheachail ro Phort Bhàgh an Eige, 's iad air a reic ri companaidh mhòir à Iapan. Tha Mitsui na companaidh mhòir einnseinnearaidh is ionmhais, le luchd-obrach de dh'fhaisg air 60,000 duine anns na ficheadan dhùthchannan. Tha iad air a bhith an lùib Bhàgh an Eige bho chionn bhliadhnaichean, le earrannan ann an Global Energy.

An Comunn Gàidhealach

Dh'ainmich An Comunn Gàidhealach gu bheil iad air Àrd-Oifigear ùr eadar-amail fhastadh. Gabhaidh Peigi NicIllinnein thairis airson bliadhna agus Seumas Greumach a' fàgail na dreuchd. Tha Peigi air a bhith aig a' Chomunn fad 26 bliadhna mar Rùnaire Companaidh agus mar rianadair Mòid. Leanaidh Seumas Greumach san obair pàirt-ùine suas gu àm a' Mhòid Nàiseanta am-bliadhna, còmhla ris an obair ùir aige aig Bòrd na Gàidhlig.

Bàta-Teasairginn an t-Òib

Tha bàta-teasairginn an t-Òib a' dol a sgur, 's a' chomataidh ionadail shaor-thoileach ag ràdh nach eil daoine gu leòr aca airson a ruith. Feumaidh an RNLI a-nise sgrùdadh a dhèanamh feuch dè an ath cheum, agus co-dhùnadh a dhèanamh air a bheil no nach eil iad a' dol a dhùnadh an stèisein.

Tubaist air an A9

Tha an A9 fhathast dùinte tuath air Inbhir Ghòrdain, an dèidh droch thubaist-rathaid tràth madainn an-diugh. Thathas ag iarraidh air dràibhearan slighe a ghabhail seachad air an tubaist. Bu chòir do dhràibhearan a' dol gu tuath an rathad fhàgail aig Tomaich, agus iadsan a' tighinn gu deas tionndadh dheth aig Saltburn 's an uairsin na soidhnichean a leantainn.