Naidheachdan 11:00m

BMA

Thuirt buidheann nan dotairean, Comann Meidigeach Bhreatainn, gur e an rabhadh mu dheireadh airson gnìomh a th' ann an aithisg air staid an NHS ann an Alba. Tha an aithisg bhliadhnail aig Buidheann Sgrùdaidh na h-Alba ag ràdh nach mair an NHS mura bi co-dhùnaidhean doirbh ann cuid de sheirbheisean a ghearradh. Thuirt am Prìomh Mhinistear, John Swinney, gu bheil adhartas ann gu ruige leasachadh san NHS.

Dàimh eadar an RA agus na SA

Gheall Sir Keir Starmer gun neartaich e ceanglaichean ris an dà chuid na Stàitean Aonaichte agus an t-Aonadh Eòrpach agus chaidh e às àicheadh gum feum an Rìoghachd Aonaichte taghadh eadar iad nuair a bhios Dòmhnall Trump san Taigh Gheal. Tha dragh ann gum faodadh na taraifean air a bheil Mgr Trump a' bruidhinn cogadh malairt a dhèanamh eadar na Stàitean Aonaichte agus an Roinn Eòrpa.

Lebanon

Thuirt arm Israel gun tug iad ionnsaigh air buidheann cheannairceach air taobh sear na Lebanon. Tha fosadh oifigeal fhathast eadar Iosrael agus Hezbollah ged a bha sabaid eadar iad bho chionn là neo dhà. Agus thug Israel rabhadh às ùr do dhaoine sa Lebanon fuireach air falbh à bailtean ann an ceann a deas na dùthcha.

Tubaist rathaid

Chaill fireannach, a bha 39 a dh'aois, a bheatha ann an tubaist rathaid san Eilean Sgitheanach. Thachair an tubaist san robh aon chàr air prìomh rathad an eilein an A87 faisg air Breacais, beagan deas air an Ath Leathann, goirid an dèidh 10:00f a-raoir. Thuirt na poilis gun do chaochail an dràibhear goirid an dèidh a thoirt gu Ospadal an Àth-Leathainn. Chaidh dithis eile, fireananch agus boireannach, a thoirt dhan ospadal. Tha an rathad fosgailte a-rithist.

Seirbheisean màthaireil

Dh'iarr buidhnean iomairt às an Eilean Sgitheanach, Gallaibh agus ann an cead a deas na h-Alba air Rùnaire na Slàinte piseach a thoirt air seirbheisean màthaireil air feadh Alba. Tha sin an dèidh aithisg an t-seachdain seo chaidh a thuirt nach eil còraichean daonna ceart, mar chòraichean slàinte, ann an sgìrean dùthchail. Thuirt Riaghaltas na h-Alba gu bheil iad a' toirt prìomhachas do chòraichean daonna.

Sochair connaidh a' gheamhraidh

Tha an t-aonadh Unite a' togail fianais aig Pàrlamaid na h-Alba mu phàigheadh connaidh a' gheamhraidh. Chuir an t-aonadh fàilte air gealltanas Riaghaltas na h-Alba air taic connaidh a' gheamhraidh an ath-bhliadhna ach thuirt iad nach eil sin gu feum am-bliadhna. Thuirt Riaghaltas na h-Alba gu bheil stòras sa bheil £42b ann airson daoine a chuideachadh tron gheamhradh.