Naidheachdan 11:00m
Gàsa
Tha tosgaire nan Stàitean Aonaicthe airson an Ear-Mheadhanaich air Israel a ruigheachd, air thoiseach air còmhraidean le Benjamin Netanyahu mun t-suidheachadh ann an Gàsa. Tha Canada air a dhol an lùib na Rìoghachd Aonaichte agus an Fhraing le bhith a' foillseachadh phlanaichean airson aithne oifigeil a thoirt do stàit Phailistinianaich mura h-atharraich cùisean sa bhad. Tha seo air toirt air Dòmhnall Trump bagairt stad a chur air comhraidhan malairt le Canada.
Seirbheis Iùil nam Plèanaichean
Coinnichidh Rùnaire na Còmhdhail ri àrd-oifigear seirbheis iùil nam plèanaichean an-diugh a dheasbad mar a chuir trioblaidean radar bacadh air co-dhiù 150 seirbheis adhair a-mach agus a-steach às an Rìoghachd Aonaichte feasgar an-dè. Thuirt Heidi Alexander gum bi i a' sireadh mìneachaidh bho Mhartainn Rolfe air dè dìreach a chaidh ceàrr, agus ciamar a ghabhas stad a chur air bhon a bhith a' tachairt a-rithist.
An Ucràin
Bha gille sia bliadhna a dh'aois am measg co-dhiù ochdnar a chaidh a mharbhadh ann an ionnsaigh Ruiseanaich air prìomh-bhaile na h-Ucràin. Loisg Mosgo còrr is 300 itealan dròna agus ochd urchairean air Kyiv tron oidhche. Thuirt an Ceann-Suidhe Zelensky gun robh na Ruiseanaich air taisbeannadh aon uair eile na bha iad a' saoilsinn de dh'iarrtasan eadar-nàiseanta airson sìthe san Ucràin.
Tubaist air an A9
Tha poilis air a' Ghàidhealtachd a' sireadh fiosrachaidh mu thubaist-rathaid air an A9 faisg air Blàr Athaill. Thachair an tubaist mu 6:10f feasgar an-dè nuair a bhuail bhana-campachaidh Volkswagen agus carabad eile ri chèile air an rathad eadar Cail Mhinn agus Dal na Mèinne. Chaidh dràibhear a Volkswagen, boireannach aois 36, a thoirt gu Ospadal Ninewells ann an Dùn Dè. Dh'fhàg an carbad eile an làrach mus do nochd na seirbheisean èiginn. Tha na Poilis ag iarraidh air neach sam bith le fiosrachadh air neo le dealbhan dashcam fios a leigeil thuca.
Glainead Àiteachan-bìdhe
A rèir rannsachaidh ùir, 's ann aig gnothachasan bìdhe ann an roinn Comhairle na Gàidhealtachd a tha na h-ìrean slàinteachais as miosa ann an Alba. Sheall sgrùdadh a chaidh a dhèanamh air dàta bho Bhuidheann Inbhe a' Bhìdhe gun d' fhuair 79% de chompanaidhean bìdhe Gàidhealach teisteanas slàinte nuair a chaidh deuchainn a dhèanamh orra. Tha sin an coimeas ri 92% ann an Alba san fharsaingeachd.