Cymru allan o Gwpan y Byd 2022 - yr ymateb

Roedd y teulu Davies o'r Rhondda y tu allan i'r stadiwm wedi'r chwiban olaf.

“Be’ oedd yn dda oedd bod nhw ‘di chwarae yr holl ffordd i’r diwedd, dangos calon," meddai Paula.

"Daethon nhw draw ar y diwedd ac o' chi’n gallu gweld beth oedd e’n ei olygu iddyn nhw. Ni’r cefnogwyr yn gwerthfawrogi ‘ny.”

Ychwanegodd Trystan: “Rhaid i ni gofio mai nid just twrnament oedd hwn, ni ‘di ‘neud yn dda just i fod ‘ma, a just cymysgu gyda chefnogwyr gwledydd eraill, ma’ nhw’n gwybod pwy y’n ni nawr."

BBCCopyright: BBC

Er i Gareth Bale ddweud heno y bydd yno ar gyfer ymgyrch rhagbrofol Euro 2024 ym mis Mawrth, ai hyn yw dechrau'r diwedd i rai o sêr Cymru?

Cwestiwn am ddiwrnod arall, o bosib.

“Ar ddiwedd y dydd o’dd e’n grŵp anodd," meddai Jamie Ferriman o Bontardawe.

"Ni’n siomedig ond byddwn ni’n dod eto, gobeithio mewn pedair blynedd.”

BBCCopyright: BBC

Dal i fod 'dan ni’n ddibynnol ar Gareth Bale.

'Nes i ddweud cyn y gêm am y bois eraill, yn lle dibynnu arno fo rhaid camu fyny hefyd i fod efo fo ar y daith - fel ein bod ni fel cefnogwyr ddim yn dibynnu ar un dyn.

Getty ImagesCopyright: Getty Images

"Roedd e'n gêm heriol yn erbyn tîm safonol iawn, roedden ni'n gwybod hynny o'r dechrau," meddai Gareth Bale wedi'r gêm.

"'Dan ni'n siomedig gyda'r canlyniad, ond mae'n rhaid i ni gofio ein bod ni wedi dod yn bell iawn i gyrraedd Cwpan y Byd ac mae'n rhaid i ni fod yn falch o'n hunain o fod yma.

"'Dan ni wedi rhoi 100% a rhoi popeth ar y cae. Byddwn ni'n gadael gyda'n pennau ni'n uchel.

"Fyswn ni wedi caru 'neud yn well - ond y realiti yw mae pêl-droed yn anodd ac mae angen edrych i'r dyfodol.

"Mae'r cefnogwyr wedi bod yn anhygoel - y rhai deithiodd mor bell, neu wyliodd adref. Rhaid iddyn nhw aros gyda ni ar gyfer dechrau ymgyrch yr Ewros ym mis Mawrth."

BBCCopyright: BBC

"Gutted" yw'r gair ddefnyddiodd Rubin Colwill wrth ymateb i'r golled.

"Dyma yw'r llwyfan mwyaf yn y byd ac mae'r timoedd eraill yn arbennig.

"Ni'n devastated, ond dyna sy'n digwydd ym mhêl-droed weithiau."

Dywedodd nad oedd modd dewis "un peth" aeth o'i le.

Wrth edrych i'r dyfodol, dywedodd ei fod am weld "mwy o'r un peth".

"Ni'n wlad fach iawn, 'sdim lot o bobl yn ein gwlad ni, ac i gael y talent sydd gyda ni, mae'n arbennig."

BBCCopyright: BBC

Doedd dim creadigrwydd - ond ni 'di bod fel hyn am sbel os ydyn ni'n hollol onest.

Roedd pawb yn meddwl y bydden ni'n cyrraedd Cwpan y Byd a chamu lan.

Mae hwn mewn gwirionedd wedi dilyn yr arferion 'dan ni wedi gweld yn y gemau cyn y gystadleuaeth.

Getty ImagesCopyright: Getty Images

Getty ImagesCopyright: Getty Images

Os oes unrhyw un yn cwestiynu ymdrech y chwaraewyr, na i ddweud wrthyn nhw'n blwmp ac yn blaen nid diffyg ymdrech ydy hyn.

Bydd Rob Page yn sbïo ar ei hun a gofyn, fyddwn i wedi gallu 'neud pethau'n wahanol

Dwi'n credu daethon ni mewn yn 'under-cooked'.

Dwi'n meddwl bod timau eraill sydd efo chwaraewyr yn chwarae'n gyson, fel Lloegr, yn barod i fynd.

'Dan ni 'di edrych yn bell ohoni yn y gystadleuaeth.

Dwi'n siomedig iawn, mae'n rhaid dweud.

Yn naturiol fel cefnogwr, ond hefyd dros y chwaraewyr.

Fi'n drist i'r Wal Goch hefyd, yr holl arian a'r ymdrech i ddod i Qatar.

O'n i yn disgwyl gallu cystadlu'n agos â'r gwrthwynebwyr - roedden ni'n bell, bell, bell oddi wrthyn nhw.

Getty ImagesCopyright: Getty Images

Dwi'n siŵr y byddai'r cefnogwyr yn dewis fod yma a ddim perfformio cystal dros beidio bod yma o gwbl.

Weithiau dyw pethau just ddim yn clicio.

Ni 'di gweld diffyg hyder yn ystod y gemau - yn enwedig heddiw.

Ni 'di bod ymhell o'r safon ym mhob gêm, a dyna sy'n siomedig.

Bale a Ramsey - dydyn nhw ddim yn hen, a dwi'n gwybod eu bod wedi dioddef nifer o anafiadau.

Y cwestiwn mawr ydy, ydy'r angerdd, ydy'r brwdfrydedd dal yna i'r ddau sydd wedi gwneud gymaint yn eu gyrfaoedd i Gymru a'u clybiau?

Os ydy'r awch dal yn eu cyrff nhw, 'sdim rhaid i'w siwrne fod ar ben.

Ond mae'n rhaid iddyn nhw fod yn chwarae i'w clybiau.

Mae'r dair gêm wedi profi i fi os nad ydych chi'n chwarae'n rheolaidd i'ch clybiau, 'dach chi am fod filltiroedd i ffwrdd o beth sydd ei angen er mwyn perfformio ar y lefel uchaf.

Getty ImagesCopyright: Getty Images

Mae'r chwaraewyr a'r criw hyfforddi ar y cae ac yn wynebu'r Wal Goch, sy'n canu'r hen ffefrynnau - gan gynnwys yr anthem.

Moment o undod ar ddiwedd ymgyrch sydd wedi addo gymaint ond sydd heb danio.

Mae cyrraedd fan hyn wedi bod yn shwt gymaint o lwyddiant.

Ond y ffordd mae’r dair gêm wedi mynd, y perfformiadau, bysech chi ddim eisiau gorffen ar nodyn mor negyddol.

Dyna ni. Dim ond pwynt yn y gêm agoriadol.

Mae 'na chwaraewyr yn eu dagrau yma yn Doha.

Doedd hi ddim i fod.

Mae'r dyfarnwr wedi chwythu ei chwiban.

Ymgyrch siomedig Cymru yng Nghwpan y Byd yn dod i ben gyda cholled i'r hen elyn, Lloegr.

Dim llawer i fynd...

Mae'n rhaid i ni fod yn realistig - dyma lle rydyn ni arni ar hyn o bryd.

'Dan ni heb weld perfformiad fel oedden ni'n gobeithio, ond ni ffaelu dadlau efo canlyniadau.

Pan mae'r ymgyrch newydd yn dechrau ym mis Mawrth, mae'n rhaid i ni gychwyn tîm a bechgyn hollol newydd i greu llwybr newydd.

Dwy ergyd mewn dau funud i Gymru - y gyntaf gan Rubin Colwill a'r ail gan Kieffer Moore. Yn anffodus, roedd y ddwy ergyd ymhell dros y trawst.

Bron â chyrraedd y 90 munud - o'r diwedd!