Iolo Cheung
Gohebydd BBC Cymru Fyw yn Qatar

Mae cymaint o’r ystadegau yn erbyn Cymru heno.

'Dan ni heb guro Lloegr ers 1984, ac wedi colli chwech yn olynol ers hynny gan sgorio dim ond un gôl.

Dydan ni ddim chwaith wedi curo unrhyw dîm mewn gêm gystadleuol sy’n uwch na ni yn rhestr detholion FIFA ers Euro 2016.

Un llygedyn o obaith? Dydi Joe Allen heb ddechrau’r un o saith gêm ddiwethaf Cymru, a dydan ni heb ennill yr un.

Ond y tro diwethaf iddo fo wneud? Y fuddugoliaeth o 1-0 yn erbyn Wcráin...

Ffynhonnell y llun, Getty Images

Malcolm Allen
Cyn-ymosodwr Cymru ar S4C

Mae Rob Page wedi dewis ei dîm cryfa‘ fedrith o yn fy marn i.

Mae o ‘di bod digon dewr i newid y pedwar yn y cefn.

'Dan ni ddim ‘di chwarae fel ‘na ers yr Ewros.

Mae Hayat o Abertawe yn byw yn Dubai gyda'i phartner Zubeir sydd o'r Alban.

"Un peth sy'n gyffredin yw nad y'n ni eisiau i Loegr ennill!"

Ychwanegodd eu bod nhw'n dawel hyderus am fuddugoliaeth i Gymru gyda sgôr o 2-1.

Mae cefnogwyr o bob cornel o'r byd yn canu 'Yma o Hyd' bellach!

Mae Harri a Nathan wedi teithio o Fachynlleth i wylio'r gêm yng Nghaerdydd heno.

"Mae perfformiad Cymru wedi bod yn eithaf siomedig erbyn hyn," medd Harri wrth raglen Post Prynhawn Radio Cymru.

"Roedd ail hanner y gêm gynta' yn edrych fel roedd Cymru wir eisiau chwarae - doedd gêm Iran ddim yn edrych fel 'na."

Ychwanegodd Nathan: "Bydd angen i Ramsey a Bale droi fyny heno a gwneud rhywbeth sbesial."

Iwan Roberts
Cyn-ymosodwr Cymru ar BBC Radio Cymru

Mae 'na bwysau ar Loegr - doeddan nhw ddim yn disgwyl bod yn y sefyllfa yma, yn enwedig ar ôl beth ddigwyddodd iddyn nhw yn eu gêm agoriadol.

Ac mae pobl yn sôn am y rhediad siomedig daeth Cymru i fewn efo.

Ond mae hynny'n wir i Loegr hefyd - dim ond un o'r wyth gêm ddiwethaf maen nhw wedi ennill.

Mae'n bosib y bydd angen i ni guro Lloegr o bedair gôl. Ddaru Hwngari sgorio pedair yn eu herbyn, a ddaru'r Almaen sgorio tair.

Yn amddiffynnol, mae 'na wendidau.

Mae Nicole, 12, a Kenny, 10, o Aberdaugleddau yn Sir Benfro, yn hyderus bod Cymru am ennill o 3-0.

“Fi methu aros i weld shots Harry Kane i gyd yn mynd dros y bar,” meddai Kenny.

Yr ifanc a ŵyr, gobeithio!

Mae John Pope, sy'n wreiddiol o Gaerffili, wedi teithio o Ddulyn i Doha.

Bydd ffrind ei fab yn mynd gydag ef i’r gêm a dywedodd y bydd "bricsen werdd yn y Wal Goch heno!”

Mae ffrind John, Rhian Trueman o Ystalyfera, yn ffyddiog am ganlyniad positif ac y bydd tîm Cymru’n mynd yn ei flaen.

“Os ni’n colli yn y rownd nesaf, dim ots, byddwn ni wedi curo Lloegr!”

Mae Adele a Steve Hughes o Gastell-nedd yn hyderus bod Cymru am ennill o 2-1.

“Just gobeithio wedyn bydd gêm Iran a’r UDA yn gyfartal,” meddai Steve.

Mae’r ddau ohonyn nhw’n gwisgo crysau rhif 20 gyda Dan James ar y cefn - tybed a fydd yr ymosodwr yn serennu heno?

Dylan Griffiths
Sylwebydd BBC Radio Cymru yn Qatar

Does gan Gymru ddim byd i'w golli - mae o ychydig fel y gêm yn erbyn Wcráin.

Oes mae 'na bwysau wrth gwrs ar Gymru - ond mae 'na bwysau hefyd ar Loegr.

Os gall Gymru ddod trwy'r ugain munud gynta heb ildio gôl, cyrraedd yr hanner yn ddi-sgôr neu'n gyfartal, bydd 'na fwy byth o bwysau wedyn ar Loegr yn yr ail hanner.

Achos er eu bod nhw'n ffefrynnau clir i fynd trwy'r grŵp, dydyn nhw ddim yna eto.

Dim ond newydd gyrraedd Doha mae Ed a Charlotte Buckley o Glasgow, ond o Amlwch yn wreiddiol.

“Bob man ‘dyn ni’n mynd yma rydyn ni’n gweld Cymry ac mae pawb mewn hwyliau da,” meddai Ed.

“Dwi ‘di bod yn disgwyl drwy ‘mywyd i ddod i Cwpan y Byd.

"Mae ‘na wastad siawns i ni ennill, mae’r hogia'n gallu'i droi o 'mlaen pan mae angen.“

Mae Charlotte, 22, yn cytuno ei bod wedi byw drwy oes aur pêl-droed Cymru gyda dwy bencampwriaeth Euro a Chwpan y Byd a dywedodd nad yw drosodd eto.

“Beth bynnag sy’n digwydd heno, byddwn ni’n ôl mewn Cwpan Byd arall tro nesa!”

Dafydd Iwan yn tanio'r dorf yn Doha yn gynharach heddiw - bydd angen digon o egni wrth i'r awr fawr agosáu...

Fe wnaeth y cogydd Bryn Williams baratoi pryd o fwyd i'r garfan draw yn Doha nos Sul - ond beth oedd ar y fwydlen?

"Cig oen o Gorwen!

"Pan ti'n llawn dy fol, ti'n hapus - just elfen o fwyd o adre'," meddai wrth Radio Cymru.

"Roedd Harry Wilson wrth ei fodd - bwyta cig oen o ryw filltir o ble dyfodd o i fyny, felly roedd o'n wên o glust i glust!"

Ffynhonnell y llun, getty

Iolo Cheung
Gohebydd BBC Cymru Fyw yn Qatar

Mae Shameem ac Abdool Yarroo, dau frawd o Mauritius, newydd gael trafferth gan swyddogion y tu allan i’r stadiwm sydd wedi cwestiynu eu fflag.

Dywedodd y brodyr fod y swyddogion yn credu mai baner enfys oedd o, a bu’r ddau yn ceisio esbonio am rai munudau mai baner eu gwlad nhw ydi o, a’i fod eisoes wedi ei ganiatáu yn y stadiwm.

Wrth gwrs, mae hynny dal yn codi cwestiynau am beth fyddai’r swyddogion wedi ei wneud petai o yn faner enfys…

Mae Dewi, Osian, Steffan ac Eli newydd gyrraedd Doha heddiw o Gaerdydd.

“Sa i wedi cysgu ers fel 25 awr,” meddai Dewi, nid bod hynny’n ei stopio rhag darogan buddugoliaeth o 5-0.

Mae Osian a Steffan yn mynd yn fwy “realistig” a dyfalu 3-1 a 3-2 i Loegr, ond mae Eli yn credu yr aiff Cymru â hi o 2-1.

Dydi’r criw heb fwcio hediad adref eto, felly pwy a ŵyr!

Tîm Cymru i wynebu Lloegr:

Ward; N Williams, Mepham, Rodon, B Davies; Allen, Ampadu, Ramsey; Bale (c), Moore, James.

Hennessey, Connor Roberts a Wilson ydy'r tri newid o'r tîm wynebodd Iran.

Mwy i ddilyn

Ond beth am farn y cefnogwyr?

Mae Lyn Griffiths, sydd o Landeilo yn wreiddiol, yn teimlo bod 'na gefnogwyr tu hwnt i Gymru sy'n cefnogi'r cochion heddiw.

"Heddi' ma' pobl o bob gwlad wedi bod yn dod mla'n a dweud pob lwc am heno," dywedodd.

"Fi'n credu bod sawl gwlad arall moyn i Gymru ennill."