Dyma Catrin Manning a Jack Davies yn eu gwisgoedd gwynion, yn aros yn eiddgar am ganlyniad cystadleuaeth CogUrdd.

Briff ei chystadleuaeth y bore 'ma, meddai Catrin, oedd i goginio pryd o fwyd mewn dwy awr gan ddefnyddio cynnyrch lleol, felly aeth ati i goginio wellington cig eidion a chig oen a llysiau mewn saws gwin coch.

Cynnyrch lleol oedd ar y fwydlen gan Jack hefyd: "Fel mab ffarm, y brecwast yw'r pryd mwyaf pwysig.

"Dw i wedi gallu defnyddio cynnyrch o'n fferm ein hunain a'r ffermydd rownd ni, mewn ffordd cynaliadwy a gwneud y gorau o beth sydd 'da ni yn Sir Gâr."

Blasus!

Mae digon i'ch diddanu yng Ngŵyl Triban, ddydd Gwener a Sadwrn.

Yn yr Arddorfa, beth am fynd i sesiwn ioga gyda Mistar Urdd, i weithdy gospel gyda Chôr UAB o Alabama, neu ddisgo tawel y gwersylloedd?

Ac yn Yr Adlen, mae digon o artistiaid, fel Lily Beau, Adwaith, Mellt, gyda Dafydd Iwan yn cloi'r wythnos nos Sadwrn.

Roedd hi'n orlawn yno amser cinio...

Mae Jac Jones wedi bod yn dathlu cael trydydd yn yr unawd cerdd dant gydag ysgytlaeth siocled (ei hoff flas!).

Mae ei rieni, Betsan a Llion, o ardal Meifod yn falch iawn ohono.

Mae'r arlwy'n eang ac yn amlwg yn boblogaidd iawn yn yr ardal fwyd.

Gyda 10 stondin - o fyrgyr a sglodion i nŵdls a bwyd Jamaicaidd - gobeithio bod digon yma i fwydo pawb!

Mae Elen Ifan, Bardd y Mis Radio Cymru, wedi ysgrifennu cerdd am Eisteddfod yr Urdd Sir Gâr.

Mae’r teulu Watts o Gaerdydd ymhlith nifer sy’n mwynhau picnic yn yr haul.

Bu Joshua, 8, ar y dde yn cystadlu yn y dawnsio gwerin heddiw, a bydd yntau a’i frawd Oliver, 6, yn rhan o gyflwyniad dramatig fory.

Dydy eu chwaer fach Caitlin ddim cweit ddigon hen i gystadlu eto!

Cafodd ffans Cyw y cyfle i weld cymeriadau'r sioe wyneb yn wyneb ar y maes heddiw.

Fel arfer, dim ond ar y sgrin y mae Plwmp, Llew, Cyw a Bolgi i'w gweld, ond eleni maen nhw wedi cael dod i Lanymddyfri i weld eu holl ffrindiau.

Tair o aelodau Parti’r Efail - Isla, Seren ac Angharad - yn hapus iawn gyda thrydydd yn yr Ensemble Offerynnol.

Dywedodd Isla: “Ro’n ni’n nerfus dipyn bach, ond pan o’n i’n gwneud e ar y llwyfan o’n i fel ‘waaaaa!’”

Llongyfarchiadau ferched!

Emma yn cael hoe mewn trol ar ôl crwydro'r maes, gyda Tad-cu a Mam-gu.

Dyma dro cyntaf Emma yn Eisteddfod yr Urdd ond mae Peter, ei thad-cu yn hen gyfarwydd â’r ŵyl ac yntau wedi cystadlu yn 1951 yn Abergwaun!

Mae'r Eisteddfod eleni ym mro yr emynydd William Williams, Pantycelyn ac mae yna groeso arbennig i eisteddfodwyr yng nghapel Pantycelyn yn ystod yr wythnos.

Wyddoch chi bod y cyflwynydd a'r golygydd gwleidyddol, Vaughan Roderick, yn un o ddisgynyddion yr emynydd? Ddoe ar Radio Cymru bu ef a'i chwaer yn olrhain ei hanes ac yn asesu ei gyfraniad.

Mae cyfle i glywed y rhaglen yma.

Roedd Yr Arddorfa dan ei sang ar gyfer y Sioe Cyw gyntaf yr wythnos.

Safle Cwiar Na Nog yw ardal newydd ar gyfer aelodau ifanc LHDT+ yr Urdd a’r rheiny sy’n awyddus i ddysgu mwy am y gymuned LHDT+ yng Nghymru.

Bydd llawer o hwyl i’w gael yma drwy’r wythnos gan gynnwys Disgo Distaw!

Dywedodd Cadeirydd y Pwyllgor Cyllid, Gethin Thomas, ei fod wedi ei syfrdanu gyda haelioni’r bobl leol cyn yr Eisteddfod.

“O’n i yn poeni na fydden ni yn cyrraedd y targed” meddai.

“O’dd gyda ni darged bo ni’n croesi £300,000, ac mae’n braf dweud ein bod ni wedi croesi’r £300,000 erbyn heddi…

"Mae’n hynod o heriol a mae’n anodd iawn ar bobl i gael dau ben llinyn ynghyd ond mae’n rhaid i ni 'weud, ry’n ni’n hynod, hynod ddiolchgar i drigolion Sir Gâr am gyfrannu.”

Casi, Osian, Caio a Dave yn mwynhau danteithion ar y maes – rhaid cadw’r lefelau egni’n uchel!

Mae'r Mudiad Meithrin ac S4C ymhlith y rhai sydd wedi sicrhau digon o weithgareddau i'r plant lleiaf - y manylion yma.

Ffynhonnell y llun, Mudiad Meithrin

Nid dim ond cymeriadau mewn gwisgoedd anifeiliaid lliwgar yw’r rhain.

Mae’r chwech ‘Awen’ yma’n mynd i fod yn chwarae rhan ganolog ym mhrif seremonïau’r dydd.

Ffynhonnell y llun, Urdd Gobaith Cymru

Fe ddaeth y syniad gan griw Cwmni Theatr yr Urdd, gan ddefnyddio’r syniad bod person yn cael ei drawsnewid wedi iddyn nhw ennill y brif wobr yn eu maes.

"'Dan ni 'di penderfynu cael gafael ar y seremonïau ac ail-wampio nhw 'chydig bach," dywedodd Branwen Davies, trefnydd Theatr Ieuenctid yr Urdd.

"Mae bob un o'r awenau yma'n gymeriadau gwahanol gyda gwisg gwahanol.

"'Dan ni jyst isio' rhoi'r bri 'na 'nôl."

Cafodd y gwisgoedd eu dylunio gan Efa Dyfan, ac mae’r chwe chymeriad yn cael eu chwarae gan aelodau Theatr Ieuenctid yr Urdd.

Dim rhagolygon o law yr wythnos yma, ond lefelau UV a phaill yn uchel, felly byddwch yn barod!

Mae brwdfrydedd mawr wedi bod yn lleol, medd Carol Dyer o bwyllgor apêl Llanymddyfri.

“O’n i’n mynd amgylch siopau a busnesau i’w hannog nhw ac ateb eu cwestiynau nhw,” meddai

“Ambell waith o’n i’n gorfod esbonio i bobl beth oedd Eisteddfod yr Urdd achos mae’n rhaid cofio, nid pawb sydd wedi bod i Eisteddfod yr Urdd…

"Mae hyd yn oed y rhai sydd newydd agor busnesau a ddim wedi byw ‘ma am gyfnod, maen nhw wedi mynd i fewn i ysbryd yr ŵyl, ac wedi deall yn iawn beth yw Mr Urdd.”

Mae ‘na bymtheg o feinciau wedi eu creu gan ddisgyblion rhai o ysgolion y Sir.

Dywedodd yr artist Karen McRobbie fod aelodau'r 'sied ddynion' yn Nrefach wedi helpu'r prosiect a noddwyr lleol wedi rhoi'r pren.

“Mae pymtheg o feinciau wedyn wedi mynd allan at wahanol ysgolion yn y Sir ac ar bob mainc mae yna chwedl neu stori sy’n bwysig i Gaerfyrddin arnyn nhw," dywedodd.

“Ni ‘di bod yn creu y fainc yma er mwyn ei roi ar faes yr Eisteddfod” meddai Macsen.

“Ni ‘di rhoi llawer o bethau sy’n ymwneud â Llangyndeyrn arno fe. Mae gyda ni dractorau tu ôl y gatiau, y capel gyda’r gloch, a phethau fel yna.

"Fi’n hapus taw Llangydeyrn ni’n neud fel rhan o brosiect 23 achos os bydden ni ddim yn neud e, sai’n credu bydden i’n gwybod lot am Llangyndeyrn.”