Dim problem... os ydy Mam yn teimlo'n glên... ac yn gryf!

Dyw hi ddim yn 'Steddfod heb y cystadlu, ac y'n ni wedi bod yn cadw golwg ar holl ganlyniadau'r Brifwyl ym Moduan.

Ewch i'n tudalen ganlyniadau i weld pwy ddaeth i'r brig a chlipiau o'r perfformiadau!

Guto, Noa a Taid wedi dod dros y caeau o Gilgwyn i gael blas ar yr Eisteddfod.

Mewn sgwrs yn ardal Maes D am strategaeth yr Eisteddfod, mae’r prif weithredwr Betsan Moses yn dweud eu bod yn awyddus i drafod sut ddylai’r ŵyl edrych yn y dyfodol.

Ond bydd yr Eisteddfod hefyd yn gorfod edrych ar bethau o safbwynt costau, ac ystyried beth sy’n gynaliadwy.

“Ydi wyth diwrnod yn rhy hir?” meddai, wrth gyfeirio at un esiampl.

“Mae hwnna’n rhywbeth bydd y bwrdd yn gorfod edrych arno.”

Mae’n dweud bod llawer o bethau sy’n cael eu llogi ar gyfer yr Eisteddfod yn gorfod cael cytundebau o bythefnos.

“Mae ‘na reswm pam bod lot o wyliau yn bump diwrnod,” meddai.

Cystadleuaeth gynta'r dydd yw'r Grŵp Offerynnol Agored, cyn cystadlaethau'r Unawdau dros 25 tan ganol y prynhawn.

Gallwch wylio'r cyfan ar Sedd yn y Pafiliwn.

BBC Radio Cymru

"Mae 'di bod yn fraint ac anrhydedd cael gweithio efo cenedlaethau o blant a phobl ifanc," dywedodd Siân Eirian ar Radio Cymru ar ôl cael ei hurddo.

"Wrth edrych yn ôl mae wedi bod yn brofiad cwbl anhygoel."

Un arall gafodd ei hurddo oedd yr Athro Laura McAllister a dywedodd ei fod yn "golygu cymaint iddi".

"Mae'n hynod o arbennig i fi yn bersonol - cael rhywbeth gan eich cenedl eich hun i gydnabod be' 'dan ni gyd yn 'neud i sicrhau'r iaith, ond hefyd sicrhau statws Cymru ar lwyfan y byd.

Cafodd Mared Elin Dafydd sioc ar ei hymweliad ag Awstralia yn ddiweddar, pan gafodd wahoddiad i fynd i'r Eisteddfod... a hynny ochr arall y byd!

"Doedd pobl ddim i'w weld yn ymwybodol ei fod e wedi dod o Gymru!"

Mae rhai telynorion wedi lleisio'u siom nad oes cystadleuaeth i unawdwyr offerynnol gwerin yn y Tŷ Gwerin.

Bethan a Huw o Creigiau sy’n edrych ymlaen i groesawu’r Eisteddfod flwyddyn nesa' i Rondda Cynon Taf!

“Ni’n edrych ymlaen yn fawr i gael yr Eisteddfod yn ein ardal ni! Ma fe’n gyffrous!”

Yn ffan o lyfrau ffuglen gwyddonias ac arswyd Cymraeg? Ewch draw i'r Babell Lên am 12:00 er mwyn clywed sgwrs rhwng Llŷr Titus, Iestyn Tyne a Peredur Glyn.

Dyma aelodau o Gymuned Dawnsfa Cymru, sydd wedi bod yn perfformio ar y Maes yn ystod yr wythnos

Prif ddefod dydd Gwener yw'r Cadeirio - ond ry'n ni eisoes wedi gweld sawl un o brif wobrau'r Eisteddfod yn cael eu trosglwyddo i'r enillwyr.

Pwy felly sydd wedi dod i'r brig?

Y Goron

Gwobr Goffa Daniel Owen

Dysgwr y Flwyddyn

Y Fedal Ryddiath

Y Fedal Ddrama

Mae Elsi o Landwrog yn dangos bod mynd o hyd mewn teganau hen ffasiwn...

... tra bod Cian, Meilir, Ela a Lwsi yn cael hwyl ar y gêm Connect 4.

A oes heddwch? Gyda chlec y cledd, mae Cylch yr Orsedd bellach wedi cau am eleni.

Mae’r seremoni nawr yn gorffen gyda phawb yn gyd-ganu Hen Wlad Fy Nhadau.

Fe fydd yr Orsedd wrth eu gwaith yn ddiweddarach y prynhawn 'ma ar gyfer y brif seremoni - Y Cadeirio.

Mae arweinydd Cymru a’r Byd, Esyllt Nest Roberts de Lewis, yn rhywun sydd wedi chwarae rhan flaenllaw mewn addysg Gymraeg ym Mhatagonia, ac yn cael ei hurddo dan yr enw Esyllt Nest.

Mae Carlo Rizzi, arweinydd Opera Cenedlaethol Cymru, yn cael ei dderbyn i’r Orsedd fel Carlo ap Luigi.

Mae un o sylfaenwyr Sesiwn Fawr Dolgellau, Ywain Myfyr, hefyd yn ymuno â’r Orsedd heddiw - wedi i’w fab, Gruffydd Sion Ywain, gael ei urddo ddydd Llun.

Wrth i'r Orsedd dderbyn yr aelodau newydd, mae 'na un cwestiwn pwysig i'w ateb - beth fyddai eich enw barddol chi?

Lois o griw Cymru Fyw fu'n holi'r union gwestiwn ar y maes yr wythnos hon...

Mared ac Eldra o Uwchmynydd sydd yn gwylio’r seremoni i gefnogi nifer o bobl leol, gan gynnwys “chwaer Nain ac fy athrawes Ysgol Sul” 🤩

Mae'r darlledwr Geraint Lloyd wedi ei urddo fel Geraint o Ledrod.

Mae’r cyflwynydd, John Roberts hefyd yn cael ei urddo, gyda’i enw yn gyfeiriad at ei raglen ar Radio Cymru - Sion Bwrw Golwg.

Mae dau gyn bêl-droediwr Cymru wedi cael eu hurddo hefyd - Yr Athro Laura McAllister, sydd nawr yn ffigwr amlwg mewn gweinyddiaeth pêl-droed (Laura o Benybont), a John Mahoney, oedd yn rhan o’r tîm gyrhaeddodd wyth olaf Euro 1976 (Sion Treganna).

Roedd y Pafiliwn Mawr yn orlawn neithiwr ar gyfer Gig y Pafiliwn, a'r egni'n uchel.

Wedi colli'r hwyl? Cofiwch fod modd gwrando'n ôl ar BBC Radio Cymru.

Elain Wyn Tomos o Gaernarfon yw’r cyntaf i gael ei derbyn i’r Orsedd eleni - dan yr enw Elain Wyn.

Y tri cyntaf i gael eu hurddo i’r Wisg Las yw’r gwleidydd Mabon ap Gwynfor (Mabon ap Gwynfor), prif lyfrgellydd Cymru Pedr ap Llwyd (Llwyd Ardudwy), ac Anwen Butten, capten tîm Cymru yng Ngemau’r Gymanwlad (Anwen Cellan).

Mae ‘na ddau â chysylltiadau blaenllaw gyda’r Urdd hefyd yn cael eu hurddo - Dyfrig Davies (Dyfrig Blaengwyddon Fach) a Sian Eirian (Sian Eirian).

Mae Kristoffer Hughes yn cael ei urddo i’r Orsedd fel Llŷr Môn. Ond byddwch chi o bosib yn fwy cyfarwydd ag ef fel y perfformiwr drag Maggi Noggi!