Naidheachdan 11:00m

Southport

Thuirt Sir Keir Starmer gur e "loidhne sa ghainmheach" a bu chòir a bhith ann am murt triùir nigheanan òga ann an Southport an-uiridh. Dh'innis an Riaghaltas an-raoir gum biodh rannsachadh poblach ann mu fhàiligeadh na stàite ann an cùis Axel Rudakabana a thug an ionnsaigh orra. Tha e air tighinn am follais gun deach Rudakabana, a tha 18 bliadhna de dh'aois, a thoirt gu aire prògraim cheanairc trì tursan, agus gum b' aithne dha na h-ùghdarrasan gun robh e beò-ghlaicte le fòirneart. Ann an aithris bho Shràid Downing anns a' mhadainn chuir am Prìomhaire dìon air a cho-dhùnadh fiosrachadh mun chùis a chumail dìomhair fhad 's a bha an rannsachadh a' dol air adhart.

Obar Dheathain

Tha poilis den bheachd gur ann a dh'aona-ghnothaich a chaidh teine a chur a dhol aig bloc fhlataichean aig Aulton Court ann an Obar Dheathain an-raoir. Chaidh aon duine a thoirt dhan ospadal 's chaidh cobhair a dhèanamh air sianar eile air an làraich.

Dòmhnall Trump

Thòisich Dòmhnall Trump a dhàrna teirm mar Cheann-Suidhe le bhith a' toirt mathanas do mhìle gu leth de a luchd-taice a thug ionnsaigh air a' Chapitol ann an 2021. Chuir e ainm cuideachd ri òrdughan mu chonnadh, chosgaisean bith-beò agus inimreachas, agus ghairm e èiginn nàiseanta air a' chrìch le Meagsago.

Gàsa

Tha stuth cobhair a' ruigheachd Ghàsa air an treas là den fhosadh eadar Hamas agus Israel. Dh'innis Hamas gun saoir iad an ath bhuidheann de dh'Israelich a tha am bruid aca Disathairne mu choinneimh saoirse do Phailistinianaich a tha an grèim aig Israel.

Cion-cosnaidh

Bha lùghdachadh beag ann an àireamh a' chion-chosnaidh an Alba sna trì mìosan eadar an t-Sultain agus an t-Samhain. Thuirt Oifis nan Staitistig Nàiseanta gun robh an ìre aig 3.8%, sìos 0.2%, agus nas lugha na ìre na Rìoghachd Aonaichte gu lèir aig 0.4%.

An t-Eilean Sgitheanach

Tha dragh air feadhainn ann an ceann a deas an Eilein Sgitheanaich mu phlana airson campa eile do luchd-obrach. Tha Balfour Beatty an turas seo airson àite-fuirich a chur air dòigh faisg air Breacais do 450 duine a bhiodh ag obair air na loidhnichean dealain ùra tron eilean. Tha sin a bharrachd air plana airson campa eile do 350 duine faisg air an Àth Leathann.

Am Prionnsa Harry

Thòisich èisteachd aig an Àrd-Chùirt ann an Lunnainn mu chùis-lagha a' Phrionnsa Harry an aghaidh an Sun agus a' bhuidheann phàipearan-naidheachd NewsGroup, dham buin an Sun. Tha am Prionnsa a' fàgail air a' phàipear-naidheachd agus air luchd-naidheachd gun robh iad a' trusadh naidheachdan gu mì-laghail. Tha NGN ag ràdh nach do rinn iad dad ceàrr.