HIE a' cur suas ri £24m ri leasachadh Port Chiseoirn

Thathar an dòchas gum bi obair gu leòr ann do suas ri 1,500 duine an cois an leasachaidh as ùire seo aig a' phort

Dh'fhaodadh gum bi obair ann do suas ri 1,500 duine fhathast aig Port Chiseoirn air taobh siar na Gàidhealtachd an cois pròiseact goireasan a leasachadh airson obair ath-nuadhachail a thàladh.

Tha Iomairt na Gàidhealtachd agus nan Eilean (HIE) a' cur maoineachaidh luach suas ri £24m ris an làraich.

Bha Ciseorn uair a' togail chlàran-ola airson obair sa Chuan a Tuath.

Fhuair còrr air 3,000 neach cosnadh aig an làraich ann an 1977 is Clàr Ninian ga thogail ann - clàr anns an robh cuideam de chòrr air 600,000 tunna.

Bha an làrach trang a-rithist sna 1990an agus pìosan de Dhrochaid an Eilein Sgitheanaich gan togail ann.

Tha dòchas gum bi buannachdan eaconamach a cheart gu mòr dhan sgìre an cois an leasachaidh as ùire seo.

Thuirt an Leas-Phrìomh Mhinistear Ceit Fhoirbeis gur e in-ionmhas cho mòr 's a tha air a bhith ann fad deichean de bhliadhnaichean.

Thuirt i: "Tha e riatanach gum faigh Port Chiseoirn agus na coimhearsnachdan timcheall air buannachd à margaidh ath-nuadhachail na cruinne."

Tha e mar phàirt de thaic-airgid suas ri £500m a tha Riaghaltas na h-Alba a' gealltainn thairis air còig bliadhna airson puirt na dùthcha a leasachadh airson an uidheamachd a bhios a dhìth airson tuathan-gaoithe aig muir a thogail.

'S ann aig Ciseorn a tha fear de na docan-tioram as motha san Roinn Eòrpa agus thèid sin a leudachadh.

Thuirt Àrd-oifigear HIE, Stuart Black: "Tha an goireas air cosnaidhean sgileil a chumail ri daoine ann an sgìre dhùthchail airson nan deichean bhliadhnaichean agus tha coltas gun tig fàs mòr air, rud a tha air leth cudromach a chùm seasmhachd choimhearsnachdan air an taobh siar."

'S ann aig Ciseorn a tha fear de na docan-tioram as motha san Roinn Eòrpa