Naidheachdan 11:00m

Buidseat na h-Alba

Cuiridh Rùnaire an Ionmhais, Shona Robison, a plana airson buidseat na h-Alba mu choineimh na Pàrlamaid aig Holyrood feasgar. Tha dùil am measg eile ri tuilleadh airgid dhan NHS agus cuideachadh do ghnìomhachas air an tug àrdachadh san àrachas nàiseanta air feadh na Rìoghachd Aonaichte buaidh. Thèid an dreach-bhuidseat air adhart gu bhòt anns an Fhaoilleach.

Lucy Letby

Rinn poilis ann an Cheshire tuilleadh ceasnachaidh fo mhionnan air Lucy Letby mu bhàs dhithis naoidhean agus cùisean eile aig Ospadal Countess of Chester agus aig Ospadal nam Ban ann an Liverpool far an do rinn Letby a trèanadh mar nurs. Chaidh a dìteadh ron seo airson seachdnar bhèibidhean a mhurt agus oidhirp air seachdnar eile a mhurt eadar 2015 agus 2016. Thuirt a neach-lagha gu bheil Lucy Letby fhathast a' cumail a-mach gu bheil i neo-chiontach.

Coirea a Deas

Tha na pàrtaidhean dùbhlanach ann an Coirea a Deas a' feuchainn ri casaidean a chur air a' Cheann-suidhe Yoon Suk Yeol an dèidh dha lagh an airm a chur an sàs airson ùine ghoirid mus do chuir e às don cho-dhùnadh sin. Dh'fhàg luchd-comhairleachaidh Mhgr Yoon an dreuchd 's tha na h-aonaidhean a' maoidheadh gun tèid iad air stailc gus am fàg e a dhreuchd.

Bradan

Tha Comataidh nan Cùisean Albannach aig Westminster a' gabhail fianais an-diugh mu àrach a' bhradain 's a' bhuaidh air an àrainneachd ma bhios leudachadh sa ghnìomhachas. Cluinnidh a' chomataidh bho bhuidhnean glèidhteachais agus bhon dà chompanaidh bhradan as motha an Alba, Mowi agus Scottish Sea Farms.

Goid à Bùthainnean

Tha goid à bùthainnean anns na h-Eileanan Siar aig an ìre as motha ann an còrr is còig bliadhna. Bha aithris ann air 18 cùis am-bliadhna a rèir nam Poileas, ach tha dragh ann gum faodadh an àireamh cheart a bhith nas motha buileach. Thuirt an t-Àrd-Inspeactair Jane NicCoinnich gun bheil cuid de bhùthainnean a tha ag aithris a h-uile cùis aca, ach gu bheil feadhainn eile nach eil gan clàradh idir.

Aonghas Brianan MacNìll

Ghabh seann bhall-pàrlamaid nan Eilean Siar ann an Westminster, Aonghas Brianan MacNìll, ballrachd ann am Pàrtaidh Alba. Bha e a' riochdachadh na sgìre dhan SNP bho 2005 gus an deach a chur a-mach às a' phàrtaidh an-uiridh. Sheas e mar neo-eisimeileach anns an taghadh choitcheann san Iuchar am-bliadhna san do shoirbhich Torcuil Crichton dha na Làbaraich.