Rabhadh "gu math mòr" gum bi teintean fiadhaich an Alba Dihaoine

Tha rabhadh ga thoirt gu bheil cunnart gu math mòr ann gum bi teintean fiadhaich ann an Alba Dihaoine.

Tha an rabhadh an sàs airson a h-uile sgìre ìosal san dùthaich.

Tha dùil gun èirich i gu 18C Dihaoine, agus i air a bhith na turadh 's caran blàth an t-seachdain seo.

Ma tha rabhadh ga sgaoileadh airson teine fiadhaich, bithear an dùil gum bi an teine sin co-dhiù 1,000 meatar ceàrnagach de mheud, agus a' gabhail gun smachd.

Tha rabhadh "gu math àrd" an sàs mar thà airson meadhan agus iar-dheas na h-Alba airson teintean fiadhaich.

Bidh teintean fiadhaich a' tachairt mar as trice ann an sgìrean far a bheil stuth planntrais tioram a cheadaicheas dhan teine sgapadh gu luath.

Thuirt an Comanndair Buidhne Murray Dalgleish aig Seirbheis Smàlaidh is Teasairginn na h-Alba gum bu chòir don phoball a bhith "air leth faiceallach" mus dèan iad dad sa bheil lasraichean an sàs.

"Faodaidh stoc, talamh àitich, coilltean a tha fo dhìon agus làraichean ùidh shòinraichte shaidheansail uile a bhith air an sgrios leis na teintean seo - a thuilleadh air beatha dhaoine a tha a' fuireach 's ag obair ann an coimhearsnachdan dùthchail," thuirt e.

"Faodaidh dol-a-mach Mhic-an-duine lùghdachadh mòr a thoirt air a' chunnart gun tòisich teine fiadhaich, agus mar sin tha e èiseil dha-rìribh gum bi aire dhaoine air sàbhailteachd ann an àrainneachdan dùthchail, 's gun lean iad an Còd Albannach airson Cothrom air a Bhlàr A-muigh an-còmhnaidh."