Colled annisgwyl i Blaid Cymru yn Sir Benfro, ble mae Cris Tomos wedi colli ei sedd i'r ymgeisydd annibynnol Shon Rees.

Plaid Cymru - 44 sedd

Annibynnol/Arall - 23

Llafur - 1

Democratiaid Rhyddfrydol - 1

Dros Ginio
BBC Radio Cymru

Dywedodd Dr Huw Lewis, uwch ddarlithydd mewn gwleidyddiaeth ym Mhrifysgol Aberystwyth, ar Dros Ginio ei bod yn ymddangos fod canlyniadau gwael y Ceidwadwyr yn Lloegr yn cael ei adlewyrchu yma hefyd.

"Os ydyn ni yn mynd i gredu yr adroddiadau sydd wedi dod hyd yn hyn, mae hi yn ymddangos fel bod y canlyniad Cymru yn mynd i ddilyn patrwm lled siomedig fel ddigwyddodd yn Lloegr dros nos.

"Gyda golwg o gymharu y canlyniadau yma gyda chanlyniadau etholiad cyffredinol 2019, fe fydd hi'n ddiddorol gweld y troedleoedd etholiadol y sicrhaodd y Ceidwadwyr mewn seddi San Steffan yng Nghymru yn yr etholiad diwethaf – mewn ardaloedd fel Delyn, Pen-y-bont a’r seddi yng Nghlwyd - i ba raddau y bydd yr etholiadau yma yn dangos bod hynny ddim wedi arwain at droedle yr un mor gryf ar lefel llywodraeth leol."

Yn Sir Conwy mae tad a mab wedi eu hail-ethol i'r cyngor ar gyfer ward Bae Cinmel.

Mae Nigel (chwith) a Michael Smith, y ddau'n aelodau annibynnol, wedi cadw eu seddi yn gyfforddus.

Vaughan Roderick
Golygydd Materion Cymreig y BBC

Yn Lloegr, yr hyn sydd yn ddiddorol yw ein bod ni'n gweld parhad y fflip yma o safbwynt dosbarth ac addysg o’r Ceidwadwyr i Lafur ac o Lafur i’r Ceidwadwyr.

Hynny yw, Llafur yn gwneud yn dda yn yr ardaloedd hynny lle mae 'na nifer sylweddol o bleidleiswyr ifanc a lle mae 'na nifer sylweddol o bleidleiswyr sydd â gradd coleg.

Mae hynny’n ymddangos i fi yn newid hanesyddol, wrth i’r Ceidwadwyr yn raddol droi yn fwy o blaid populist dosbarth gwaith, a cholli gafael ar y dosbarth canol a phobl sydd ag addysg drydyddol.

Mae'n ganrif eleni ers i Lafur golli etholiad mawr yng Nghymru, ac os unrhywbeth mae eu gafael nhw yn tynhau, oherwydd mae y llanw yna o safbwynt yr ifanc a’r addysgiedig yn rhedeg o’u plaid nhw yng Nghymru, ond dyw y llanw yn y dosbarth gwaith o blaid y Ceidwadwyr ddim yn digwydd yn yr un modd.

Felly mae'r Ceidwadwyr Cymreig mewn dipyn o gornel a dweud y gwir.

Mae arweinydd Cyngor Sir Penfro, David Simpson, wedi cadw ei sedd yn Llanbedr Felfre.

Mae ein gohebydd Aled Scourfield yn rhagweld na fydd mwyafrif gan yr un blaid yn y sir, ac felly y bydd trafodaethau dros y penwythnos ynghylch arweinyddiaeth.

Mae Jina Gwyrfai wedi cipio ward Yr Eifl o ddwy bleidlais i Blaid Cymru, a hi felly fydd yn cynrychioli'r ward ar Gyngor Gwynedd.

Fe gafodd hi 198 a Cian Ireland o Lafur 196.

Newyddion da i'r blaid Lafur yn Rhondda Cynon Taf, wrth i arweinydd y cyngor Andrew Morgan gael ei ailethol.

Ond dyw hi ddim yn newyddion cystal i Pauline Jarman o Blaid Cymru, sy'n colli ei sedd ar y cyngor wedi 46 mlynedd ar ôl methu ag ennill un o'r ddwy sedd yn Aberpennar yn dilyn newidiadau i ffiniau'r wardiau yno.

Mae ffynhonnell wedi dweud wrth BBC Cymru y gallai Richard John, arweinydd cyngor Sir Fynwy, golli ei sedd i'r Democrat Rhyddfrydol Martin Blakebrough, o'r elusen gyffuriau Kaleidoscope.

Mae rhai seddi yn y sir yn debyg o gael ail gyfrif, a chanlyniadau agos.

Mae Plaid Cymru wedi sicrhau 37 o'r 69 o seddi ar Gyngor Gwynedd, sy'n golygu bod y blaid wedi cael mwyafrif yn y sir.

Mae 'na ragor o ganlyniadau i gael eu cyhoeddi o Wynedd.

Fe glywson ni'n gynharach bod Alwyn Gruffydd o Lais Gwynedd wedi colli ei sedd yn ward Glaslyn.

Dywedodd wrth Cymru Fyw ei fod yn siomedig, ond bod pobl "wedi cael cyfle i ddeud eu deud" ac wedi dewis ymgeisydd arall.

Ychwanegodd bod yr ymgyrch wedi bod yn un "eilradd" o safbwynt Llais Gwynedd, gyda'r blaid "ddimyn tanio fel yr oedden ni".

Mae arweinydd Llafur Cyngor Caerffili, Philippa Marsden wedi colli ei sedd i ddau gynghorydd Annibynnol.

Derbyniodd 213 o bleidleisiau.

Cafodd ei gwrthwynebwyr a enillodd ward Ynysddu, Jan Jones (Annibynnol) 1162 o bleidleisiau. Cafodd Janine Reed (Annibynnol) 1150 o bleidleisiau.

Dywed cyn-arweinydd Cyngor Sir Powys, Rosemarie Harries, nad oedd hi'n disgwyl colli ei sedd.

Dywed bod penderfyniadau anodd gan y cyngor yn sgil cyfyngiadau ariannol, ynghyd â brwydr dda gan ei gwrthwynebydd o'r Democratiaid Rhyddfrydol wedi bod yn rhannol gyfrifol am y canlyniad.

Ychwanegodd ei bod yn falch iawn o'r hyn y mae wedi ei gyflawni fel arweinydd benywaidd cyntaf y cyngor.

Dywedodd hefyd y bydd yn rhaid i gynghorwyr "fod yn ddoeth" wrth ddewis arweinydd nesaf Cyngor Sir Powys.

Mae Alwyn Gruffydd o Lais Gwynedd wedi colli sedd ward Glaslyn i Margaret June Jones o Blaid Cymru.

Gareth Pennant
Gohebydd gwleidyddol BBC Cymru

Mae Llafur yng Nghaerdydd yn credu gallen nhw ennill hyd at ddwy ran o dair o’r seddi yng nghyngor y brifddinas.

Yn ôl ffynhonnell o fewn y blaid, maen nhw’n obeithiol o ennill hyd at 50 allan o’r 79 o seddi.

Ar “ddiwrnod rhagorol”, fe allen nhw ennill hyd at 60 o seddi, ychwanegodd y ffynhonnell.

Yn yr etholiad diwethaf yn 2017, fe enillodd Llafur 40 allan o’r 75 o seddi.

Does 'na ddim canlyniadau wedi cyrraedd o awdurdod mwyaf Cymru, Caerdydd, eto.

Mae yna 79 o seddi ar gael ar draws 29 o wardiau yn y brifddinas.

Y blaid Lafur sydd wedi bod yn rheoli ers deng mlynedd - maen nhw yn gobeithio cadw eu seddi presennol a'u mwyafrif fan bellaf.

Mae disgwyl y canlyniadau tuag at ddiwedd y prynhawn.

Owain Clarke
Gohebydd BBC Cymru

Mae ffynhonnell Geidwadol ym Mhowys yn ofni y bydd y blaid yn cael ei threchu'n argyhoeddiadol yn Sir Fynwy, medd ein gohebydd Owain Clarke.

Dywed Elfed Wyn ab Elwyn, 24, o Blaid Cymru ei fod wrth ei fodd cael ei ethol i gynrychioli ward Bowydd a’r Rhiw, Blaenau Ffestiniog ar Gyngor Gwynedd - fe fydd yn un o'r cynghorwyr ieuengaf.

Ar ei gyfri' Facebook dywedodd: "Braint ydi cyhoeddi fy mod i wedi cael fy ethol dros ward Bowydd a Rhiw!

"Diolch i chi gyd am roi eich ffydd ynof i, ac dwi'n edrych ymlaen yn arw at gael dechrau'r gwaith!! (A taclo y rhestr mawr dwi wedi cael gan y chi ar stepan drws!)"

Ffynhonnell y llun, Elfed Wyn ab Elwyn

Mae'r canlyniadau cyntaf o Geredigion wedi ein cyrraedd ni.

Yn ward Aberystwyth Penparcau, mae Steve Davies a Carl Worrall wedi eu hethol dros Blaid Cymru.

Doedd dim rheolaeth lawn gan yr un blaid y tro diwethaf, ond mae Ceredigion yn sir y bydd Plaid Cymru'n ei thargedu.