Dyna'r cyfan gennym ni ar y llif byw, ar ddiwrnod o newid i wleidyddiaeth ar lefel lleol yng Nghymru.

Yr enillwyr amlwg oedd Llafur, gipiodd reolaeth ym Mlaenau Gwent a Phen-y-bont ar Ogwr, ond gollodd eu gafael ar Gastell-nedd Port Talbot.

Roedd hi'n ddiwrnod da iawn i Blaid Cymru hefyd. Er iddyn nhw weld gostyngiad yn nifer eu cynghorwyr ar draws y wlad, fe lwyddon nhw i gymryd rheolaeth yn Ynys Môn, Ceredigion a Sir Gâr.

Y Ceidwadwyr oedd ar eu colled, gan golli'r unig sir yr oedden nhw'n ei rheoli - Sir Fynwy.

Mae disgwyl canlyniadau terfynol Sir y Fflint yfory oherwydd ailgyfrif mewn dwy ward, ond mae hi eisoes yn glir na fydd gan yr un blaid fwyafrif yno.

Mae un ward eto i gyhoeddi yng Nghastell-nedd Port Talbot hefyd. Oherwydd marwolaeth ymgeisydd, ni fydd etholiad yno nes 23 Mehefin. Ond hyd yn oed heb ganlyniad y ward honno, ry'n ni eisoes yn gwybod fod Llafur wedi colli rheolaeth o'r cyngor hwn.

Rydyn ni hefyd yn disgwyl canlyniad un ward ym Mro Morgannwg yn hwyr iawn heno, neu yn yr oriau mân. Canlyniadau'r sir honno sydd ar goll o'r ffigyrau uchod.

Bydd trafodaethau brwd dros y dyddiau nesaf felly i benderfynu pwy fydd yn arwain yr holl gynghorau ble nad oes mwyarif i'r un blaid.

Mae crynodeb o'r diwrnod ar gael i'w ddarllen ar ein hafan.

Ry'n ni bellach yn clywed y bydd hi'n cymryd "ychydig oriau" i ailgyfrif ward Dinas Powys ym Mro Morgannwg.

Honno yw'r unig ward rydyn ni'n disgwyl canlyniad amdani heno.

Dyma'r sefyllfa ddiweddaraf yn y Fro (wedi 50 o'r 54 sedd):

• Llafur - 25
• Ceidwadwyr - 12
• Annibynnol/Arall - 8
• Plaid Cymru - 5

Mae angen 28 am fwyafrif, ond am mai dim ond dau ymgeisydd Llafur sydd yna yn ward Dinas Powys, a phedair sedd ar gael, 27 yw'r mwyaf y gall Llafur ennill.

Ni fydd mwyafrif gan yr un blaid ym Mro Morgannwg eleni felly - yr un sefyllfa â 2017 - ond mae Llafur wedi gwneud enillion yma.

Llafur Cymru

Dywedodd llefarydd ar ran y blaid Lafur eu bod yn siomedig gyda'u canlyniad yng Nghastell-nedd Port Talbot, wrth iddi ddod i'r amlwg y bydd y blaid yn colli rheolaeth o'r cyngor.

Mae un ward eto i gyhoeddi. Oherwydd marwolaeth ymgeisydd, ni fydd etholiad yno nes 23 Mehefin.

Ond hyd yn oed heb ganlyniad y ward honno, ry'n ni eisoes yn gwybod fod Llafur wedi colli rheolaeth o'r cyngor.

"Ry'n ni'n siomedig na chafodd y canlyniadau gwych a welwyd ledled Cymru eu hadlewyrchu yma yng Nghastell-nedd Port Talbot," meddai'r llefarydd.

"Byddwn yn gweithio gyda'n gilydd fel cynghorwyr Llafur ar draws y sir i ailadeiladu, symud ymlaen ac adennill rheolaeth gyda phob cyfle a ddaw."

Ym Mro Morgannwg, maen nhw bellach yn ailgyfrif ar gyfer ward Dinas Powys.

Yr unig ward sydd ar ôl ledled Cymru ble rydyn ni'n disgwyl am ganlyniad heno...

Dywed Tudor Thomas, is-gadeirydd y Blaid Lafur ym Mynwy, nad yw'n syndod bod canlyniadau'r Ceidwadwyr yn wael wedi'r holl helyntion am bartïon yn ystod y cyfnod clo.

"Roeddwn i'n un a fethodd fynd i angladd yn y cyfnod hwn," meddai.

Y Ceidwadwyr oedd yn rheoli Cyngor Sir Fynwy, ond fe gollon nhw eu gafael ynddo heddiw.

Pedair sedd sydd eto i gael eu cyhoeddi ym Mro Morgannwg. Dim ond Dinas Powys sydd ar ôl bellach.

Dyma'r sefyllfa ddiweddaraf (50 o'r 54 sedd):

• Llafur - 25
• Ceidwadwyr - 12
• Annibynnol/Arall - 8
• Plaid Cymru - 5

Mae angen 28 am fwyafrif, ond am mai dim ond dau ymgeisydd Llafur sydd yna yn ward Dinas Powys, a phedair sedd ar gael, 27 yw'r mwyaf y gall Llafur ennill.

Ni fydd mwyafrif gan yr un blaid ym Mro Morgannwg eleni felly - yr un sefyllfa â 2017 - ond mae Llafur wedi gwneud enillion yma.

Mae llu o gynghorwyr newydd wedi cael eu hethol yng Ngheredigion heddiw, wrth i Blaid Cymru gymryd rheolaeth o'r cyngor.

Dau o'r wynebau newydd ydy Ceris Jones a Matthew Vaux.

Dywedodd Ms Jones ei bod yn "dal yn eitha' surreal" ond ei bod yn "barod am y sialens".

Ychwanegodd Mr Vaux fod y canlyniad wedi bod "werth y gwaith caled yn mynd 'rownd dros y mis diwethaf".

Vaughan Roderick
Golygydd Materion Cymreig y BBC

Dim ond Bro Morgannwg sydd eto i gyhoeddi heno, ac maen nhw'n ara' deg bach yn cyrraedd y lan.

Dyma'r sefyllfa ar hyn o bryd, gyda 42 o'r 54 sedd wedi cyhoeddi:

• Llafur - 21
• Ceidwadwyr - 12
• Plaid Cymru - 5
• Annibynnol/Arall - 4

Mae'n deg dweud fod ambell un o gefnogwyr y pleidiau wedi blino ar orfod disgwyl cyhyd am y canlyniadau llawn!

Mae'r dyn busnes Mustapha Maohub yn credu mai ef yw'r person cyntaf o gefndir Gogledd Affrica i gael ei ethol yng Nghymru.

Ganed Mr Maohub ym Moroco, ac mae wedi byw yng Nghwm Cynon ers 29 mlynedd.

Credir hefyd mai ef yw'r person cyntaf o leiafrif ethnig i wasanaethu ar gyngor Rhondda Cynon Taf ers Dr Shah Imtiaz, a fu'n gynrychiolydd am 35 mlynedd hyd at ddechrau'r 2000au.

Anogodd Mr Maohub eraill i “fynd amdani".

“Rwy’n camu i mewn i ddangos iddynt y gellir ei wneud a bod drws agored,” meddai.

“Os gallaf i ei wneud, fe all unrhyw un ei wneud.”

Newyddion S4C

Wrth ymateb i'r canlyniadau ar raglen Newyddion S4C dywedodd arweinydd Plaid Cymru, Adam Price, bod y canlyniadau yn rhai "ysgubol" i Blaid Cymru wrth iddyn nhw gael rhedeg pedwar cyngor unedol gyda mwyafrif am y tro cyntaf erioed.

"Fe fydden ni eisiau 'neud yn well yn siroedd Penfro a'r Rhondda - roedd yna golledion yn y fan honno - ond eto mae canlyniad Sir Wrecsam yn arwyddocaol ac yn dangos ei bod yn bosib i ni dorri tir newydd mewn ardal na sy'n draddodiadol i ni yn wleidyddol."

Post Prynhawn
BBC Radio Cymru

Wrth ymateb ar raglen y Post Prynhawn dywedodd y Gweinidog Addysg, Jeremy Miles, ei fod yn credu bod y canlyniadau yn dangos fod pobl Cymru wedi blino ar Lywodraeth Geidwadol y DU.

"Dwi'n credu bod y canlyniadau yn dangos fod pobl yng Nghymru wedi blino erbyn hyn ar y Torïaid - gan fod yna fwy o bwyslais ar amddiffyn ymddygiad Boris Johnson nag amddiffyn buddiannau pobl Cymru.

"Fel plaid ar draws y DU ry'n ni wedi 'neud yn dda - mae cynnydd i'r blaid Lafur hefyd yn Yr Alban," ychwanegodd.

Llafur - 25

Annibynnol/Arall - 20

Plaid Cymru - 12

Democratiaid Rhyddfrydol - 2

Gwyrddion - 1

Bydd yn rhaid disgwyl nes diwedd fis nesaf am ganlyniad un ward oherwydd marwolaeth ymgeisydd, sy'n golygu nad oes etholiad yno nes 23 Mehefin.

Mae John Davies, cyn-arweinydd Cyngor Sir Penfro eisoes yn edrych ymlaen at y trafodaethau dros y dyddiau nesaf i benderfynu pwy fydd yn rheoli'r cyngor am y blynyddoedd nesaf.

Fe wnaeth Mr Davies gadw ei sedd fel ymgeisydd annibynnol dros ward Eglwyswrw yn ddiwrthwynebiad.

“Mae llais annibynnol yn dal yn glir iawn yma yn Sir Benfro. Mae hi wedi bod yn ddiwrnod da i’r llais annibynnol yn Sir Benfro," meddai.

Ychwanegodd y bydd "lot o negydu ac edrych ar flaenoriaethau” dros y dyddiau nesaf.

Roedd 'na ddigwyddiad go anarferol yn y cyfrif yn Sir Fynwy y prynhawn 'ma, wedi i ddau ymgeisydd gael union yr un nifer o bleidleisiau.

Sut oedden nhw am benderfynu felly ai Tomos Davies o'r Ceidwadwyr ta Bryony Nicholson o'r blaid Lafur fyddai'n cynrychioli ward Llan-ffwyst am y blynyddoedd nesaf?

Wel, taflu darn arian wrth gwrs!

Yn anffodus i Ms Nicholson, hi wnaeth ddyfalu, a dyfalu'n anghywir, gan olygu mai Mr Davies fydd yn cynrychioli'r ward.

Mae Prif Weinidog Cymru, Mark Drakeford wedi dweud wrth BBC Cymru ei fod wedi bod yn “ddiwrnod da i Lafur yma yng Nghymru”.

“Rydyn ni wedi gwneud enillion ym mhob rhan o Gymru,” meddai, gan wneud “yn arbennig o dda lle bu’r Ceidwadwyr yn brif wrthwynebwyr i ni”.

Dywedodd arweinydd Llafur Cymru ei fod yn gosod sail i'r blaid ennill seddi yn ôl a gollwyd yn etholiad cyffredinol 2019.

Ychwanegodd fod nifer o bleidleiswyr wedi dweud wrtho “eu bod am ddefnyddio eu pleidlais i fynegi eu hanfodlonrwydd gyda Llywodraeth y DU sydd mor ddi-gyswllt”.

Dywedodd ei fod yn rhoi Llafur mewn “lle ffafriol” i wneud enillion mewn seddi eraill hefyd.

Yn ôl Mr Drakeford mae hyn ac etholiadau’r llynedd “yn dweud rhywbeth arwyddocaol wrthym am y ffordd y mae Cymru’n teimlo am ei llywodraeth bresennol yn San Steffan a’r math o lywodraeth y byddai’n well ganddi ei chael nid yn unig yma yng Nghymru, nid yn unig mewn cynghorau lleol, ond ar lefel y DU hefyd".

Ffynhonnell y llun, Getty Images

Dim ond un awdurdod sydd eto i gyhoeddi canlyniad llawn heno, sef Bro Morgannwg.

Ni fydd canlyniadau llawn yn Sir y Fflint nes yfory oherwydd ailgyfrif mewn dwy ward, ond mae hi eisoes yn glir na fydd gan yr un blaid fwyafrif yno.

Bydd yn rhaid disgwyl nes diwedd fis nesaf am ganlyniad terfynol yng Nghastell-nedd Port Talbot hefyd oherwydd marwolaeth ymgeisydd, sy'n golygu nad oes etholiad ar un ward nes 23 Mehefin.

Mae hi eisoes yn glir fod Llafur wedi colli rheolaeth o'r cyngor hwn.

Cynghorydd newydd arall yng Ngheredigion ydy, Ceris Jones, sydd wedi ennill sedd Llanfihangel Ystrad i Blaid Cymru gyda mwyafrif o dair pleidlais yn unig.

“Roedd e’n agos, agos iawn ond dwi’n ddiolchgar i bawb sy wedi pleidleisio a dwi’n edrych ymlaen at gydweithio gyda phobl Llanfihangel Ystrad."

Llafur - 59

Plaid Cymru - 8

Annibynnol/Arall - 6

Ceidwadwyr - 2