Dyma'r pumed isetholiad i'r Senedd ers dechrau datganoli yn 1999, a gydag etholiad y flwyddyn nesaf ar y gorwel dyma'r mwyaf arwyddocaol.

Mae Caerffili wedi bod yn gadarnle i Lafur ers dros ganrif, gyda'r blaid yn ennill yma ym mhob etholiad i San Steffan ers sefydlu'r etholaeth yn 1918, ac ym mhob etholiad i Fae Caerdydd.

Ond mae'n ymddangos mai Plaid Cymru a Reform sydd fwyaf hyderus yma heno.

Pe bai Llafur yn colli heno, byddai hynny'n gadael Llywodraeth Lafur Cymru ddwy bleidlais yn brin o fwyafrif yn Senedd Cymru, gan ei gwneud hi'n anoddach i'r llywodraeth basio'i chyllideb ar gyfer y flwyddyn nesaf.

O ganlyniad, byddai dod i gytundeb gydag unig aelod y Democratiaid Rhyddfrydol yn Senedd Cymru - fel wnaeth y llywodraeth eleni i basio'i chynlluniau gwario - ddim yn ddigon.

Daniel Davies
Gohebydd Gwleidyddol BBC Cymru

Os am dystiolaeth bod canolfan hamdden Caerffili yn ganolbwynt y byd gwleidyddol heno, 'drychwch ar yr holl gamerâu a gohebwyr sydd yma o'r sianeli teledu.

Mae tîm BBC Cymru wedi bod yn siarad gyda ffynonellau Plaid Cymru a Reform, sydd yn darogan y bydd y canlyniad yn agos.

Fe soniodd un ffynhonnell am ail-gyfri posib.

Er hyn, dim ond newydd ddecrhrau mae’r cyfri', ac fe allai’r dyfalu yma fod ar sail yr wythnosau diwethaf o ymgyrchu.

Daniel Davies
Gohebydd Gwleidyddol BBC Cymru

Dyw ffynonellau Llafur ddim yn disgwyl ennill yma heno. Fe fyddai dod yn drydydd, tu ôl i Reform a Phlaid Cymru, yn ergyd drom i Eluned Morgan, a Keir Starmer.

Fe wnaeth Llafur gyhoeddi datganiad i’r wasg ar ôl i’r gorsafoedd pleidleisio gau – a dyw e ddim yn ddatganiad sy’n llawn hyder.

“Mae wedi bod yn ymgyrch anodd i’r blaid am nifer o resymau,” meddai.

Ar lefel ddynol, allwch chi ddeall pam maen nhw’n dweud hynny. Doedd neb moyn ymladd isetholiad dan amgylchiadau mor drist yn dilyn marwolaeth sydyn Hefin David, fis Awst.

Ar ôl i'r blychau pleidleisio gau, dywedodd llefarydd ar ran Llafur Cymru: "Hoffai Llafur Cymru ddiolch i bawb a ddaeth allan i gefnogi ein hymgyrch a phleidleisio dros Richard Tunnicliffe heddiw.

"Roedd Hefin David wrth ei fodd â'r etholaeth hon a'i phobl. Mae wedi bod wrth wraidd ein hymgyrch drwyddi draw.

"Mae hon wedi bod yn ymgyrch anodd i'r blaid am amrywiaeth o resymau, ond rydym yn falch o'r hyn y mae ein staff a'n gwirfoddolwyr wedi'i gyflawni dros y chwe wythnos diwethaf ac wedi ymrwymo i barhau i ymladd dros Gaerffili a'r Cymoedd."

Ffynhonnell y llun, Getty Images

Roedd y bleidlais heddiw wedi ei chynnal yn dilyn marwolaeth Hefin David, oedd wedi cynrychioli Caerffili yn Senedd Cymru ers 2016.

Fe fydd pwy bynnag sy'n ennill heno yn cymryd y sedd honno ym Mae Caerdydd.

Ond gan fod etholiad i'r Senedd gyfan ym mis Mai y flwyddyn nesaf, fe fydd rhaid i'r buddugwr fynd drwy'r broses yma i gyd eto ymhen rhai misoedd.

Mae'n bwysig dweud na fydd etholaeth Caerffili yn aros yr un fath ar gyfer yr etholiad yn 2026 - gan ddod yn rhan o etholaeth fwy Blaenau Gwent Caerffili Rhymni.

Fe allwch chi ddarllen mwy am y newidiadau a'r etholaethau newydd yma.

Ffynhonnell y llun, PA Media

Felly mae'r blychau pleidleisio bellach wedi cau, ac mae disgwyl cadarnhad o'r aelod newydd yn oriau man y bore.

I'ch atgoffa chi, roedd wyth o ymgeiswyr ar y papurau pleidleisio heddiw:

• Democratiaid Rhyddfrydol: Steve Aicheler
• Gwlad: Anthony Cook
• Y Blaid Werdd: Gareth Hughes
• Ceidwadwyr: Gareth Potter
• Reform UK: Llyr Powell
• UKIP: Roger Quilliam
• Llafur: Richard Tunnicliffe
• Plaid Cymru: Lindsay Whittle

Fe allwch chi ddarllen mwy am bob un a chrynodeb o'u haddewidion yma.

Wrth i'r blychau pleidleisio gau, mae sawl ffynhonnell o'r Blaid Llafur wedi dweud wrth BBC Cymru y bydd y blaid yn colli isetholiad Caerffili.

Dywedodd un ffynhonnell y byddai'r golled yn "ergyd i Starmeriaeth nid i'r prif weinidog Eluned Morgan", gyda Ms Morgan wedi bod yn gymharol boblogaidd ar y stepen ddrws.

Ond rhybuddiodd y ffynhonnell fod angen i'r prif weinidog "hawlio ei hun" a gwahaniaethu Llafur Cymru gymaint â phosibl oddi wrth blaid y DU yn ystod y cyfnod cyn yr etholiad nesaf.

Mae disgwyl i Aelodau Senedd Llafur gynnal cyfarfod fore Gwener.

Croeso at ein llif byw arbennig wrth i'r blychau pleidleisio gau yn isetholiad Caerffili.

Fe gewch chi'r diweddara' o'r cyfri' yng Nghaerffili yma gydol y nos, felly arhoswch gyda ni.