Cead do chàball nan Eilean Siar

Chaidh cead a thoirt seachad airson càball dealain ùr a stèidheachadh eadar na h-Eileanan an Iar is tìr-mòr.

Thàinig dearbhadh madainn Diardaoin gum bi càball 1.8GW eadar Àranais is a' Mhanachainn am measg sgeamaichean a tha a' faighinn cead bho Ofgem.

'S iad seo pròiseactan 'son ùrachadh a thoirt air a' Ghriod Nàiseanta is a tha air am meas deatamach airson targaidean a thaobh cumhachd aig muir a ruighinn ann an 2030.

'S e clach-mhìle mhòr a tha seo is iomairt air a bhith a' dol anns na h-Eileanan fad còrr is 20 bliadhna airson a' chàbaill.

As aonais an leasachaidh, cha bhiodh e comasach leasachaidhean mòra a thaobh cumhachd ath-nuadhachail a chur air adhart anns na h-Eileanan an Iar.

Chuir a' chompanaidh SSEN fàilte mhòr air an naidheachd is iad ag ràdh gur e ceum mòr air adhart a th' ann.

A' bruidhinn air Aithris na Maidne Diardaoin, rinn stiùiriche leasachaidh Chomhairle nan Eilean Siar, Calum Iain MacÌomhair, toileachas mòr.

"Tha mi air mo dhòigh. Tha na bliadhnaichean fada air a dhol seachad an seo fhad 's a bha sinn an dèidh 's a bhith an sàs 'son a' chàbaill seo", thuirt Mgr MacÌomhair.

"Tha briseadh-dùil an dèidh briseadh-dùil an dèidh 's a bhith ann ach bha sinn misneachail is 's e là math a tha seo, là math 'son leasachadh anns na h-Eileanan Siar", thuirt e.

Thuirt Mgr MacÌomhair gu bheil e riaraichte le càball 1.8GW is e ag ràdh gum bi àite ann 'son leasachaidhean aig muir is tìr, cho math ri cothrom 'son phròiseactan coimhearsnachd.

Dh'innis e gu bheil e an dòchas ann gun tig an càball ro 2030 is gun lean còmhraidhean a thaobh sin, is thog e cuideachd air na buannachdan mòra a tha CnES a' sùileachadh.

"Tha cumhachd ath-nuadhachail mu thimcheall air na h-Eileanan a bheir buannachdan eaconomaigeach agus buannachdan coimhearsnachd.

"Bidh tòrr obraichean a' tighinn às is fosglaidh e roinnean ùra dhan eaconomaidh. Tha sinn an dèidh 's a bhith làn den bheachd sin 'son 20 bliadhna.

"Tha cothroman mòra ann agus 's e briseadh-dùil dha-rìribh a bhiodh ann mura biodh an càball air tighinn.

"'S e briseadh-dùil a th' ann gun tug e cho fada ri thighinn ach aig a' cheann-thall, 's e là math a th' ann an-diugh", thuirt e.