Naidheachdan 11:00m
Am Morair Mandelson
Tha làn-dùil gun tèid am Morair Mandelson ainmeachadh gu h-oifigeil chun na dreuchd mar thosgaire na Rìoghachd Aonaichte chun nan Stàitean Aonaichte. Bha e am measg na dhealbh New Labour, agus bha e na mhinistear chaibineit anns na riaghaltasan a bh' aig Tony Blair agus Gordon Brown. Tha dùil gun tèid e dhan dreuchd anns a' bhliadhna ùir, agus gun deach fios a chur air an Taigh Gheal, agus sgioba ullachaidh Dhòmhnaill Trump.
Covid
Tha cuid an seo an Alba a chaill luchd-dàimh tron phandemic ag ràdh nach eil iad air sgath a chluinntinn on luchd-casaid a tha an-dràsta a' dèanamh rannsachaidh air mar a dh'eug iad. Bha Oifis a' Chrùin air aonad sònraichte a stèidheachadh airson an rannsachaidh, ach cha deach duine a chur fo chasaid thuige seo, agus chan eil ach aon rannsachadh tubaist-bhàsmhoir air tòiseachdainn. Thuirt Oifis a' Chrùin gu bheil mòran chùisean toinnte ann agus gu bheil iad a' dèiligeadh ri teaghlaichean.
Fiachan Riaghaltais
Thàinig lùghdachadh air na ghabh Riaghaltas na Rìoghachd Aonaichte air iasad air a' mhìos seo chaidh. Bha e aig £11.2bn anns an t-Samhain, an taca ri £17.4bn san Dàmhair. Seo a' chiad mhìos slàn de dh'fhiosrachadh o dh'fhoillsich an Seansalair, Rachel Reeves, am buidseat aice.
MV Glen Sannox
Thèid an Glen Sannox ann an seirbheis do Chaledonian Mac a' Bhriuthainn anns a' bhliadhna ùir. Dh'innis a' chompanaidh gun do thòisich an aiseag, a chaidh a thogail aig Gàrradh MhicFhearghais, air slighe Arainn air an 13mh là den Fhaoilleach. Bha dùil rithe bho chionn sia bliadhna.
Earra-Ghàidheal
Thèid meòrachadh air cìs turasachd a stèidheachadh aig coinneimh de Chomhairle Earra-Ghàidheal is Bhòid an-diugh fhathast. Tha grunnan ùghdarrasan ionadail a' beachdachadh air a leithid ged a tha cuid ann an gnìomhachas na turasachd a' cur na h-aghaidh.
Mailèisia
Tha Riaghaltas Mhailèisia air aontachadh ann am prionnsabal gus tòiseachdainn air iomairt feuch lorg fhaighinn air sprùilleach an itealain MH370 aig Malaysian Airlines a chaidh às an t-sealladh bho chionn deich bliadhna. Bha 239 duine air bòrd oirre an uair sin. Tha dùil gun tèid sgrùdadh a dhèanamh air pàirt den Chuan Ìnnsinneach air nach deach sgrùdadh a dhèanamh fhathast.
Siria
Tha luchd-dioplòmasach Aimeireaganach a' tadhal air Siria airson a' chiad uair ann an còrr is 10 bliadhna gus coinneachadh ri ceannardan ùra Ioslamach. Tha na còmhraidhean leis a' bhuidhinn HTS a' tighinn a dh'aindeoin agus gu bheilear ga meas mar bhuidhinn cheannairc.