Cosgais comhairle mun A83 "do-chreidsinneach"

'S e tunail mìle de dh'fhaid, a chosgadh £470m, a b' fheàrr le Còmhdhail Alba

Thuirt BPA air Ghàidhealtachd gu bheil mar a chaidh cha mhòr £20m a chosg le Riaghaltas na h-Alba air cosgaisean comhairleachaidh mun Rest and Be Thankful ann an Earra-Ghàidheal "do-chreidsinneach".

Chaidh an t-airgead a phàigheadh do cheithir chompanaidhean eadar-dhealaichte, a rèir fhigearan ùra a fhuair Tòraidhean na h-Alba.

Thàinig grunn mhaoimtean-slèibhe a-nuas air an A83 sna bliadhnaichean mu dheireadh, le trafaig ga cur taobh Seann Rathaid an Airm fhad 's a bhathas a' dèiligeadh ris air an rathad mhòr fhèin.

Chaidh fuasglaidhean sa mheadhan-ùine agus san fhad-ùine a chur air adhart, agus Còmhdhail Alba ag ràdh gur e roghainn sam bhiodh tunail mìle de dh'fhaid a' cur dìon air an rathad, 's a chosgadh £470m, a b' fheàrr leothasan.

Thuirt am BPA Tòraidheach 'son na Gàidhealtachd 's nan Eilean, Tim Eagle, gum feum an Riaghaltas tòiseachadh air obair-togail cho luath 's a ghabhas.

"Tha sinn dìreach an dùil gun aithnich Riaghaltas na h-Alba gu bheil seo na phrìomhachas mòr dha-rìribh, 's gun lìbhrig iad e," thuirt e.

"Chan eil cuimhne agamsa, 's chan fhaca mi sgrùdadh mionaideach 's chan eil mi air a bhith sa Phàrlamaid fada gu leòr a bheachdachadh air drochaid ùr Linne Fhoirthe.

"Ach 's e mo thuigse gun deach sin a thoirt gu buil caran luath bho dh'aithnich iad an trioblaid san t-seann drochaid gu nuair a thog iad an drochaid ùr.

"B' e clàr-ama reusanta a bha sin. Agus cha toir na rudan seo bliadhna no dhà - 's dòcha gun toir iad 10 no 15 bliadhna.

"Ach 's e clàr-ama fada dha-rìribh a tha seo, agus tha e riatanach dha-rìribh.

Adhbhar Tàire

"Chan eil e buileach coltach ris an A96, tha sin ag obair ged a tha e na thrioblaid.

"Tha an A9 ag obair ged a tha e na thrioblaid.

"Chan eil an rathad seo fiù 's ag obair - chan fhaigh thu air an A83 a chleachdadh meadhan a' Gheamhraidh dàrna leth na h-ùine.

"Tha thu air Seann Rathad an Airm, tha conbhoidhean an sàs, ach 's e rathad riatanach a th' ann.

"Chan ann mu dhùblachadh an rathaid a tha seo, 's ann mu dheidhinn lìbhrigeadh rathaid shàbhailte a tha e do mhuinntir na sgìre," thuirt e.

Fhreagair labhraiche às leth Còmhdhail Alba gu bheil iad ag aithneachadh gu bheil na clàran-ama a tha an lùib phròiseactan nan adhbhar tàire do luchd-còmhnaidh, ghnothachasan agus choimhearsnachdan, ach gum feum iad dèanamh cinnteach gum faigh iad na fuasglaidhean ceart anns na h-àiteachan ceart.