"Nì sinn a' chùis ach tha sinn a' dol ga ionndrainn"

Feumaidh Aonghas MacLeòid 's a bhean gearradh air ais air na chleachdas iad de chumhachd an dèidh Sochair Connaidh a' Gheamhraidh a chall

Tha Aonghas MacLeòid agus a chèile, Cathy, am measg nam mìltean de dhaoine sa Rìoghachd Aonaichte a chaill Sochair Connaidh a' Gheamhraidh.

'S e taic-airgid a bha sin don a h-uile peinnseanair airson coinneachadh ris na cunntasan cumhachd aca tro na mìosan as fhuaire den bhliadhna, ach dh'atharraich an riaghaltas ùr Làbarach am poileasaidh.

Cha tèid am pàigheadh a-nis a thoirt seachad ach don fheadhainn as miosa dheth.

"Chan fhaigh sinne am-bliadhna e," mhìnich Aonghas,"tha sinn fèir beagan fos cionn an threshold mar a chanas iad."

Aonghas MacLeòid a' dèanamh agallaimh do BBC Naidheachdan mu bhuaidh phrìsean cumhachd a' tha a' sìor dhol an-àirde

Chaidh sinn a bhruidhinn ri Aonghas agus Cathy nan dachaigh ann an Tolastadh a' Chaolais air Taobh Siar Leòdhais.

Tha teine mòr a' dol san t-seòmar-suidhe. A bharrachd air gual feumaidh iad pàigheadh airson ola, gas agus dealain.

Tha Aonghas ag ràdh gu bheil prìsean airson a h-uile càil a' sìor èirigh.

'S iongantach mura bi an t-àrdachadh 1.2% air cuibhreachadh nam prìsean cumhachd aig toiseach 2025 a dh'ainmich Ofgem a' cur uallaich a bharrachd air a' chàraid.

"Feumaidh sinn gearraidhean a dhèanamh. Cha bhi sinn a' cur an teine ann an seo air cho tràth den latha, agus cha bhi sinn a' cur an teasachaidh air cho tràth agus a tha e a' dol dheth nas tràithe air an oidhche.

"Tha mi a' dol dhan leabaidh nas tràithe," thuirt e le gàire.

Chan eil an teine air cho fada aca tron là an taca ri mar a bha

A bharrachd air gearradh air ais air na tha iad a' cleachdadh de chonnadh agus de chumhachd, tha Aonghas ag ràdh nach eil iad a' falbh air làithean-saora mar a chleachd iad.

Aig a' cheart àm tha e ag aithneachadh gu bheil cuid ann a tha nas miosa dheth.

"An seo sna h-Eileanan Siar, tha bochdainn connaidh oirnn nas miosa na ann àn àite eile sa rìoghachd agus tha buaidh mhòr gu bhith aige air an t-sluagh.

"Tha feadhainn ann nas bochda na tha sinne a tha gu math feumach air.

"Nì sinn a' chùis ach tha sinn a' dol ga ionndrainn," thuirt e.

Tha Aonghas a' sireadh comhairle air dè na sochairean eile a dh'fhaodadh taic a thoirt dhaibh le na cunntasan aca

Dh'innis Aonghas dhuinn gun do chuir e coinneamh air dòigh le Seirbheis Comhairleachaidh a' Phobaill ann an Steòrnabhagh gus am faigh e stiùireadh mu na sochairean eile air am faodadh iad a bhith airidh.

Tha e cuideachd ag iarraidh gun lean Riaghaltas na h-Alba le Sochair Connaidh a' Gheamhraidh ged a tha iadsan ag ràdh gum feum iad atharrachadh ri linn 's mar a rinn Riaghaltas na Rìoghachd Aonaichte.

'S e an teachdaireachd aige do na ministearan ann an Westminster gun toir iad sùil às ùr air an sgeama gus am bi e nas cothromaiche: "Tha mi a' smaoineachadh gun robh iad gu math dall.

"'S e a' chiad rud a rinn iad nuair a fhuair iad a-steach agus bha sin gu math ceàrr.

"Bha mi gu math diombach airson sin.

"Mar a bha Sir Keir Starmer ag ràdh, 'the ones with the broadest shoulders will carry the burden', ach cha b' ann mar sin a chaidh e."