Rabhadh sìde is tuilleadh sneachda ga ghealltainn

Tha na rathaidean an dèidh bhith cunnartach air a' Ghàidhealtachd

Tha na poilis ag iarraidh air daoine gun a bhith a' siubhal air rathaidean na h-Alba Disathairne is dùil gun tig tuilleadh sneachda le Stoirm Bert.

Tha rabhadh òmar le Oifis na Sìde an sàs mar-tha airson pàirtean dhen Ghàidhealtachd, Siorrachd Obar Dheathain, Peairt is Ceann Rois agus Sgìre Aonghais.

Ruithidh sin bho 07:00 gu 17:00 Disathairne, le cunnart nas motha ann gun toir an aimsir buaidh air còmhdhail agus dealan.

Tha an rabhadh bho Phoileas Alba a' gabhail a-steach a h-uile rathad tuath air meadhan na h-Alba.

Cuideachd, chaidh grunn rabhaidhean buidhe a' buntainn ri sneachd, gaoth làidir agus uisge trom a chur a-mach airson Alba thairis air an deireadh-sheachdain.

Thuirt na poilis gum bu chòir dhan a h-uile duine faighneachd dhaibh pèin am feum iad siubhal air na rathaidean.

Tha Còmhdhail Alba ag ràdh gum faodadh sneachd domhainn a bhith air cuid de rathaidean, gu h-àraid air talamh àrd, agus gum faodadh cuid de choimhearsnachdan a bhith air an gearradh dheth.

Dh'fhaodadh coimhearsnachdan an dealan agus lìonraidhean fòn a chall cuideachd.

A thuilleadh air an sin, tha buaidh ga thoirt air seirbheisean rèile agus dh'iarr ScotRail air luchd-siubhail sùil a chumail air fiosrachadh mun dèidhinn Dihaoine agus air an deireadh-sheachdain.

Tha cuideachd grunn sgoiltean dùinte air a' Ghàidhealtachd Dihaoine.