Mae llefarydd y blaid Lafur ar Gymru yn San Steffan, Jo Stevens wedi dweud wrth BBC Cymru bod yr arolwg ymadael, os yw'n gywir, yn dangos "buddugoliaeth enfawr a chyfiawnhad enfawr i Keir Starmer".

"Roedd Keir yn edrych fel ei fod wedi mwynhau'r ymgyrch yn fawr, roedd yn hyderus ac yn hapus, ac fe aethon ni allan gyda maniffesto positif, ac os yw'r arolwg ymadael yn gywir, mae'n edrych fel bod pobl yn ei hoffi".

Ffynhonnell y llun, Getty Images

Mae arweinydd y Ceidwadwyr Cymreig yn y Senedd, Andrew RT Davies, yn dweud ei fod yn "ddig" am ymgyrch etholiadol y blaid.

"Does gen i ddim geiriau all ddisgrifio fy rhwystredigaeth ar rai adegau yn yr ymgyrch", meddai wrth raglen ganlyniadau BBC Cymru.

"Fe welwch fy nicter yng nghyfarfod bwrdd y blaid (Geidwadol) Gymreig yfory", meddai.

Dywedodd fod y blaid wedi talu pris am yr "helbulon dros y pum mlynedd diwethaf".

Ychwanegodd, "o fy nealltwriaeth i doedd y blaid ddim yn barod am yr ymgyrch – dyna un fantais sydd gan blaid mewn grym.

"Y tro cyntaf i mi glywed am yr etholiad oedd wrth yrru ar y bore Mercher hwnnw, darllen ar y cyfryngau cymdeithasol ac yna clywed y prif weinidog yn cyhoeddi am 5 y nos.”

Ffynhonnell y llun, Getty Images

Mae'n 27 mlynedd ers i Lafur ennill etholiad cyffredinol o fod yn wrthblaid.

Mae 19 mlynedd ers iddyn nhw ennill etholiad cyffredinol o gwbl.

Mae gan bawb bleidlais, gan gynnwys arweinwyr y pleidiau - ac roedd yna gamerâu yn eu dilyn fore Iau wrth i'r gorsafoedd bleidleisio agor.

Ffynhonnell y llun, Getty Images

Ffynhonnell y llun, Reuters

Ffynhonnell y llun, Getty Images

Ffynhonnell y llun, Getty Images

Dim ond 10 sedd mae’r arolwg ymadael yn awgrymu bydd yr SNP yn eu hennill. Byddai hynny'n "ganlyniad trychinebus" i'r blaid yn ôl yr Athro Richard Wyn Jones ar raglen S4C.

“Byddai’n golygu mai yr un blaid yw'r blaid fwyaf yng Nghymru, Yr Alban a Lloegr am y tro cyntaf ers 2005, o ran Aelodau Seneddol.

"Os ydy hynny'n wir, fe fyddai’n ganlyniad gwirioneddol wael i'r SNP.”

Ffynhonnell y llun, Getty

Mae Llywydd y Ceidwadwyr Cymreig yn dweud bod Rishi Sunak wedi cael trafferth gyda neges Llafur yn galw am “newid” llywodraeth.

Dywedodd Glyn Davies, cyn Aelod o'r Senedd, fod y wlad eisiau “newid” ac na allai’r prif weinidog symud y ddadl oddi wrth hynny.

Dywedodd fod yr arolwg ymadael yn rhagweld canlyniad oedd yn “fwy siomedig” nag yr oedd yn ei ddisgwyl.

“Ni fydd llawer o ffrindiau da i mi, a llawer o Geidwadwyr da, yn ennill ond mae’n rhaid i ni dderbyn bod y wlad wedi penderfynu ei bod am newid llywodraeth”.

Daniel Davies, Gohebydd Gwleidyddol y BBC, sy'n rhoi cipolwg i ni ar sut, o bosib, y bydd Tŷ'r Cyffredin yn edrych os yw'r arolwg ymadael yn gywir.

Mae Ysgrifennydd Cymru David TC Davies wedi dweud wrth BBC Cymru na fydd yn y Senedd ar ddiwedd noson yr etholiad.

“Ar sail yr arolwg ymadael, does dim siawns y byddwn ni’n ennill, sy’n siomedig.

"Rwyf wedi cael cefnogaeth wych gan y gymdeithas leol, ond y ffaith yw, roedd pobl eisiau newid.

"Dyna'r ffordd y mae'n mynd mewn democratiaeth.

"Fi fydd y cyntaf i gydnabod y bydd buddugoliaeth enfawr i Lafur ac yn sicr ni fyddaf yn y Senedd ar ddiwedd y noson a byddaf yn rhoi hynny ar gofnod”.

Ffynhonnell y llun, Getty Images

Tomos Dafydd
Ceidwadwr

Wrth siarad ar S4C dywedodd Tomos Dafydd Davies, Cadeirydd y Ceidwadwyr yng Nghymru:

“Os 'di’r darogan yn gywir mae’n amlwg am fod yn noson andros o siomedig i’r Blaid Geidwadol, a noson andros o heriol i’r blaid yma yng Nghymru...Dwi’n mawr obeithio y medrwn ni gynnal presenoldeb yma yng Nghymru, dwi ddim yn barod i ddarogan gwae – wedi’r cyfan does 'na yr un bleidlais wedi’i chyfri eto, dim canlyniad wedi’i gyhoeddi.

"Mae wedi bod yn ymgyrch hynod o heriol i’r Blaid Geidwadol, ac mae’n werth cofio bod y llywodraeth yma wedi bod mewn grym ers 14 mlynedd ac yn ceisio ennill etholiad a ffurfio llywodraeth am y pumed tro o'r bron, rhywbeth a fyddai wedi bod yn gwbl ddigynsail. Ond dwi’n cydnabod bod hi wedi bod yn ymgyrch andros o heriol – yn amlwg mae yna ddicter mawr ac anniddigrwydd, ac mae yna ddyhead am newid.”

Yn ôl yr Athro Syr John Curtice, "mae'n debyg bod Llafur wedi sicrhau eu buddugoliaeth ysgubol ddisgwyliedig, er efallai eu bod nhw ychydig yn brin o'r mwyafrif enillodd Tony Blair yn Etholiad Cyffredinol 1997.

"Ond fe allai’r blaid hefyd gyflawni hyn ar gyfran lai o’r bleidlais na’r hyn a sicrhaodd y cyn arweinydd Jeremy Corbyn yn 2017".

Richard Wyn Jones
Athro Gwleidyddiaeth Cymru

Ymateb yr Athro Richard Wyn Jones ar ôl clywed mai 131 o seddi o bosib y caiff y Ceidwadwyr wrth i'r cyfrif fynd yn ei flaen.

Ar sail arolwg ymadael a gafodd ei gynnal gan Ipsos, gan gyfweld â dros 20,000 o bobl mewn 133 o orsafoedd pleidleisio ledled Prydain, mae’r BBC, ITN a Sky News yn rhagweld mai canlyniad yr etholiad cyffredinol fydd:

Mwyafrif ysgubol i'r Blaid Lafur gyda mwyafrif o 170 o seddi.

Mae'r arolwg yn rhagweld y bydd gan y Ceidwadwyr 131 o seddi, Y Democratiaid Rhyddfrydol 61 o seddi, Plaid Cymru gyda phedair sedd, a'r Gwyrddion gyda dwy.

Mae’r arolwg barn wrth i bobl adael y gorsafoedd pleidleisio (exit poll) yn amcangyfrif canlyniad yr etholiad cyn i'r holl bleidleisiau gael eu cyfrif.

Mae’n cael ei ryddhau wrth i'r gorsafoedd gau a’r pleidleisio ddod i ben.

Cynhelir yr arolwg barn gan y cwmni pleidleisio Ipsos, ar gyfer adrannau newyddion y BBC, ITV a Sky ar y cyd.

Gofynnir i bleidleiswyr mewn rhai gorsafoedd pleidleisio wrth iddyn nhw adael i lenwi papur pleidleisio ffug i nodi sut y gwnaethon nhw bleidleisio.

Mae’r canlyniadau’n caniatáu i ddadansoddwyr y BBC ddarogan tua faint o seddi y mae pob plaid wedi’u hennill ledled Prydain.

Does dim rhagolygon seddi ar gyfer pleidiau Gogledd Iwerddon.

Ffynhonnell y llun, Getty Images

Ers i'r Prif Weinidog Rishi Sunak gyhoeddi dyddiad yr etholiad ar 22 Mai mae pob plaid wedi bod yn brysur yn ymgyrchu.

Ond sut mae'r etholiad yn effeithio arnom ni? Ein gohebydd Dafydd Morgan sy'n esbonio.

Am 22:00 bydd y gorsafoedd pleidleisio yn cau wedi iddyn nhw agor am 07:00 bore 'ma

Mae cyfanswm o 235 o ymgeiswyr yn sefyll ar draws 32 o etholaethau Cymru, gyda phob un ac eithrio sedd Ynys Môn yn cael ei hymladd o dan ffiniau newydd.

Mae gohebwyr BBC Cymru ymhob un o'r canolfannau cyfrif ac fe fydd y newyddion a'r canlyniadau diweddaraf i'w weld yma.

Arhoswch gyda ni gydol y nos.